କ୍ୟାଭିଟି ୱାଲ୍ସ ୧୦୧ : ତାହାର ଫାଇଦା ଓ କେଉଁଠି ନିର୍ମାଣ କରାଯିବା ତାହା ବୁଝିବା

କ୍ୟାଭିଟି ୱାଲ୍‌‌ର ଫାଇଦା

ପାରମ୍ପରିକ ନିଦା କାନ୍ଥ ଅପେକ୍ଷା କ୍ୟାଭିଟି ୱାଲ୍‌‌‌ର ଅନେକ ଫାଇଦା ରହିଛି, ସେଗୁଡ଼ିକ ହେଲା:

• ୧. ଆର୍ଦ୍ରତାକୁ ପ୍ରତିରୋଧ କରିବା

• ରହିବା ପାଇଁ ଏକ ସ୍ୱାସ୍ଥ୍ୟକର ଏବଂ ଆରାମଦାୟକ ପରିବେଶ ସୃଷ୍ଟି କରିବା ପାଇଁ ଆର୍ଦ୍ରତାର ପ୍ରତିରୋଧ ଏକ ଅତ୍ୟାବଶ୍ୟକ ଦିଗ ଅଟେ । ବିଲଡିଂରେ ଆର୍ଦ୍ରତା ବିଭିନ୍ନ ପ୍ରକାର ସମସ୍ୟା ସୃଷ୍ଟି କରିପାରେ । ଏହା କାରଣରୁ ଶିଉଳି/ଫିମ୍ପି ବୃଦ୍ଧି ହେବା ସହିତ ବିଲଡିଂ ଢାଞ୍ଚା କ୍ଷତିଗ୍ରସ୍ତ ହୋଇଥାଏ । ତେଣୁ, ଆର୍ଦ୍ରତାକୁ ରୋକିବା ପାଇଁ ଏକ ସକ୍ରିୟ ପଦକ୍ଷେପ ଗ୍ରହଣ କରାଯିବା ଗୁରୁତ୍ୱପୂର୍ଣ୍ଣ ହୋଇଥାଏ ।

• ୨. ତାପଜ ଇନସୁଲେସନ୍

• ଭିନ୍ନ ଭିନ୍ନ ତାପମାତ୍ରା ବିଶିଷ୍ଟ ଦୁଇଟି ପୃଷ୍ଠଭାଗ କିମ୍ବା ଅଞ୍ଚଳରେ ତାପର ସ୍ଥାନାନ୍ତରକୁ ହ୍ରାସ କରିବା ପାଇଁ ତାପଜ ଇନସୁଲେସନ୍ ବା ଥର୍ମାଲ୍ ଇନସୁଲେସନ୍ ସାମଗ୍ରୀ ଓ କୌଶଳ ବ୍ୟବହୃତ ହୋଇଥାଏ । ବିଲଡିଂ ଡିଜାଇନର ଏହା ଏକ ମହତ୍ତ୍ୱପୂର୍ଣ୍ଣ ଦିଗ ଅଟେ । ଏହା ଘର ଭିତର ତାପମାତ୍ରାକୁ ନିୟନ୍ତ୍ରଣ କରିଥାଏ, ବିଜୁଳି ଖର୍ଚ୍ଚକୁ ହ୍ରାସ କରିଥାଏ ଏବଂ ଆରାମର ସ୍ତରକୁ ବୃଦ୍ଧି କରିଥାଏ ।

• ୩. ଧ୍ୱନି ଇନସୁଲେସନ୍

• ଧ୍ୱନି ଇନସୁଲେସନ୍ ବା ଏକଷ୍ଟିକ୍ ଇନସୁଲେସନ୍ ଅଥବା ସାଉଣ୍ଡପ୍ରୁଫିଂ ହେଉଛି ଏକ କୌଶଳ ଯାହା ଦୁଇଟି ଜାଗା ମଧ୍ୟରେ କୋଳାହଳର ମାତ୍ରାକୁ ହ୍ରାସ କରିବା ପାଇଁ ବ୍ୟବହାର କରାଯାଇଥାଏ । ଧ୍ୱନି ବା ସାଉଣ୍ଡ ଇନସୁଲେସନ୍ ଉଭୟ ଆବାସିକ ଏବଂ ବ୍ୟବସାୟିକ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଅଟେ । ଏହା ଗୋପନୀୟତାକୁ ଉନ୍ନତ କରିଥାଏ, ଧ୍ୱନି ପ୍ରଦୂଷଣକୁ ହ୍ରାସ କରିଥାଏ ଓ ଆରାମର ସ୍ତରକୁ ବୃଦ୍ଧି କରିଥାଏ ।

• ୪. ଚୂନା ଦାଗର ପ୍ରତିରୋଧ

• କାନ୍ଥରେ ଚୂନା ଦାଗ ଏକ ସାଧାରଣ ସମସ୍ୟା ଅଟେ । କଂକ୍ରିଟ୍ କିମ୍ବା ଇଟା କାନ୍ଥରେ ରହିଥିବା ଲବଣ ଓ ଅନ୍ୟାନ୍ୟ ଉପାଦାନଗୁଡ଼ିକ ପାଣିରେ ଦ୍ରବୀଭୂତ ହୋଇ କାନ୍ଥର ପୃଷ୍ଠଭାଗକୁ ଚାଲିଆସେ ଓ କ୍ରମଶଃ ତାହା ଶୁଖି ଚୂନା ଚୂନା ଦାଗ ଛାଡ଼ିଯାଏ । ଏହା ଅସୁନ୍ଦର ଦେଖା ଯିବା ସହିତ ସମୟକ୍ରମେ କାନ୍ଥର ପୃଷ୍ଠଭାଗକୁ କ୍ଷତିଗ୍ରସ୍ତ ମଧ୍ୟ କରିଥାଏ ।
  

• ଆଉ କେତେକ ଫାଇଦାଗୁଡ଼ିକ ହେଲା:

  • ବର୍ଦ୍ଧିତ ସ୍ଥାୟିତ୍ୱ:

    
    କ୍ୟାଭିଟି ୱାଲ୍‌‌ର ଦୁଇ ପରସ୍ତକୁ ସଂଯୁକ୍ତ କରିବା ପାଇଁ ବ୍ୟବହୃତ ହୋଇଥିବା ଧାତବ ଟାଏଗୁଡ଼ିକ କାନ୍ଥକୁ ଅଧିକ ଶକ୍ତି ଏବଂ ସ୍ଥିରତା ଦେଇଥାଏ ଏବଂ କାନ୍ଥର ଫାଟ ଓ ଅନ୍ୟାନ୍ୟ ଢାଞ୍ଚାଗତ ସମସ୍ୟାକୁ ପ୍ରତିରୋଧ କରିବାରେ ସହାୟକ ହୋଇଥାଏ ।

  • ବର୍ଦ୍ଧିତ ଡିଜାଇନ୍ ନମନୀୟତା:

    
    କ୍ୟାଭିଟି ୱାଲ୍ ବିଭିନ୍ନ ପ୍ରକାର ସାମଗ୍ରୀରେ ନିର୍ମିତ ହୋଇପାରିବ, ଯଥା- ଇଟା, କଂକ୍ରିଟ୍ ବ୍ଲକ୍ କିମ୍ବା ପଥର । ଏହାଦ୍ୱାରା ଆର୍କିଟେକ୍ଟଙ୍କୁ ବର୍ଦ୍ଧିତ ଡିଜାଇନ୍ ନମନୀୟତା ମିଳିଥାଏ ।
    

  • ସ୍ଥାୟିତ୍ୱ:

    
    କ୍ୟାଭିଟି ୱାଲ୍‌‌ଗୁଡ଼ିକ ନ୍ୟୂନତମ ରକ୍ଷଣାବେକ୍ଷଣ ସହିତ ଅନେକ ଦଶନ୍ଧି ଧରି ଚାଲିପାରେ ।

ସାମଗ୍ରିକ ଭାବେ ଦେଖିବାକୁ ଗଲେ, କ୍ୟାଭିଟି ୱାଲ୍‌‌‌ର ଉପରୋକ୍ତ ଫାଇଦା କାରଣରୁ ଏହା ଉଭୟ ଆବାସିକ ଏବଂ ବ୍ୟବସାୟିକ ବିଲ୍‌‌ଡିଂ ପାଇଁ ଏକ ଲୋକପ୍ରିୟ ଏବଂ ଫଳପ୍ରଦ ନିର୍ମାଣ ପଦ୍ଧତି ଅଟେ । ଉନ୍ନତ ଇନସୁଲେସନ୍, ଆର୍ଦ୍ରତା ନିୟନ୍ତ୍ରଣ, ସ୍ଥାୟିତ୍ୱ ଧ୍ୱନି ଇନସୁଲେସନ୍ ଏବଂ ଡିଜାଇନ୍ ନମନୀୟତା ଦେଉଥିବା କ୍ୟାଭିଟି ୱାଲ୍ ଅଧିକ ଆରାମଦାୟକ, ଶକ୍ତି ଦକ୍ଷ ଏବଂ ଦୀର୍ଘସ୍ଥାୟୀ ବିଲ୍‌‌ଡିଂ ନିର୍ମାଣରେ ସହାୟକ ହୋଇପାରିବ ।

କ୍ୟାଭିଟି ୱାଲ୍ କେଉଁଠି ନିର୍ମାଣ କରାଯାଇପାରିବ?

କ୍ୟାଭିଟି ୱାଲ୍ ଏକ ପ୍ରକାର ନିର୍ମାଣ କାର୍ଯ୍ୟ ଅଟେ ଯେଉଁଠି କାନ୍ଥର ଦୁଇଟି ପରସ୍ତ ଏକ ଗହ୍ୱର ବା ଫାଙ୍କ ଦ୍ୱାରା ପୃଥକୀକୃତ ହୋଇଥାଏ । କାନ୍ଥ ମଝିରେ ରହିଥିବା ଫାଙ୍କରେ ସାଧାରଣତଃ ଇନସୁଲେସନ୍ ସାମଗ୍ରୀ ଭର୍ତ୍ତି କରାଯାଇଥାଏ । ଯାହା କାରଣରୁ ଘରର ଶକ୍ତି ଦକ୍ଷତା ବୃଦ୍ଧି ହେବା ସହ ତାହାକୁ ଧ୍ୱନି ଇନସୁଲେସନ୍ ମିଳିଥାଏ । କ୍ୟାଭିଟି ୱାଲ୍ ସାଧାରଣତଃ ଆବାସିକ ଏବଂ ବ୍ୟବସାୟିକ ନିର୍ମାଣରେ ବ୍ୟବହୃତ ହୋଇଥାଏ । ବିଲଡିଂର ଡିଜାଇନ୍ ଏବଂ ଆବଶ୍ୟକତା ଅନୁସାରେ ଏହାକୁ ବିଭିନ୍ନ ସ୍ଥାନରେ ନିର୍ମାଣ କରାଯାଇପାରିବ ।

କ୍ୟାଭିଟି ୱାଲ୍ ସାଧାରଣତଃ ନିମ୍ନଲିଖିତ ସ୍ଥାନଗୁଡ଼ିକରେ ନିର୍ମିତ ହୋଇପାରିବ:

• ୧. କବାଟ କିମ୍ବା ଝରକାରେ କ୍ୟାଭିଟି ୱାଲ୍

• କ୍ୟାଭିଟି ୱାଲ୍ ନିର୍ମାଣ କରିବା ସମୟରେ କବାଟ ଓ ଝରକା ପାଇଁ ଛଡ଼ାଯାଇଥିବା ଜାଗାଗୁଡ଼ିକ ଉପରେ ବିଶେଷ ଧ୍ୟାନ ଦିଆଯିବା ଉଚିତ । ଏହି ଜାଗାଗୁଡ଼ିକୁ ‘ରିଭିଲ୍ସ’ କୁହାଯାଏ । କ୍ୟାଭିଟି ୱାଲ୍ ଯେପରି ଫଳପ୍ରଦ ଇନସୁଲେସନ୍, ଥଣ୍ଡା/ଉତ୍ତାପ ପ୍ରତିରୋଧ ଏବଂ ଢାଞ୍ଚାଗତ ସ୍ଥିରତା ପ୍ରଦାନ କରେ ଏହା ସୁନିଶ୍ଚିତ କରିବା ପାଇଁ ଉପରୋକ୍ତ ସ୍ଥାନଗୁଡ଼ିକ ବିଶେଷ ଯତ୍ନ ଆବଶ୍ୟକ କରିଥାଏ ।

• ୨. ଛାତରେ କ୍ୟାଭିଟି ୱାଲ୍

• ଇନସୁଲେସନ୍, ସାଉଣ୍ଡପ୍ରୁଫିଂ ଏବଂ ଢାଞ୍ଚାଗତ ସ୍ଥାୟିତ୍ୱ ପାଇଁ ଛାତର ନିର୍ମାଣରେ ମଧ୍ୟ କ୍ୟାଭିଟି ୱାଲ୍ ବ୍ୟବହାର କରାଯାଇପାରିବ । ଛାତରେ ରାଫ୍ଟରଗୁଡ଼ିକ ମଧ୍ୟରେ ସାଧାରଣତଃ କ୍ୟାଭିଟି ୱାଲ୍ ନିର୍ମାଣ କରାଯାଇଥାଏ । ଇନସୁଲେସନ୍ ସାମଗ୍ରୀ ଭର୍ତ୍ତି କରିବା ପାଇଁ ଏକ ଆବଦ୍ଧ ଜାଗା ତିଆରି ପାଇଁ ଏହାକୁ ଡିଜାଇନ୍ କରାଯାଇଥାଏ । ଏହା ବିଲଡିଂର ତାପ ହାନିକୁ ପ୍ରତିରୋଧ କରିବା ସହିତ ତାହାର ଶକ୍ତି ଦକ୍ଷତାକୁ ଉନ୍ନତ କରିଥାଏ ।

• ୩. ପାରାପେଟ୍ କାନ୍ଥରେ କ୍ୟାଭିଟି ୱାଲ୍

• ପାରାପେଟ୍ କାନ୍ଥ ହେଉଛି ଏକ କମ୍ ଉଚ୍ଚତା ବିଶିଷ୍ଟ କାନ୍ଥ ବା ପାଚେରୀ ଯାହା ବିଲଡିଂର ଛାତର ଧାରରେ ନିର୍ମିତ ହୋଇଥାଏ । ଇନସୁଲେସନ୍, ସାଉଣ୍ଡପ୍ରୁଫିଂ ଏବଂ ଢାଞ୍ଚାଗତ ସ୍ଥିରତା ପ୍ରଦାନ କରିବା ପାଇଁ ପାରାପେଟ୍‌‌ରେ ମଧ୍ୟ କ୍ୟାଭିଟି ୱାଲ୍ ବ୍ୟବହାର କରାଯାଇପାରିବ । ପାରାପେଟ୍‌‌ରେ କ୍ୟାଭିଟି ୱାଲ୍ ସାଧାରଣତଃ କାନ୍ଥର ଆଭ୍ୟନ୍ତରୀଣ ଓ ବାହ୍ୟ ସ୍କିନ୍ ମଧ୍ୟରେ ନିର୍ମାଣ କରାଯାଇଥାଏ । ଏହାଦ୍ୱାରା ମିଳିଥିବା ଆବଦ୍ଧ ଜାଗାରେ ଇନସୁଲେସନ୍ ସାମଗ୍ରୀ ଭର୍ତ୍ତି କରାଯାଇଥାଏ । ଏହାଦ୍ୱାରା ବିଲଡିଂର ତାପ ହାନି ପ୍ରତିରୋଧ ହେବା ସହିତ ଶକ୍ତି ଦକ୍ଷତା ଉନ୍ନତ ହୋଇଥାଏ ।