ବାଥରୁମ୍ ୱାଟରପ୍ରୁଫିଙ୍ଗ କ’ଣ? ବାଥରୁମ୍ ମେଜିଆ ଏବଂ କାନ୍ଥଗୁଡ଼ିକୁ ସୁରକ୍ଷିତ ରଖିବା ପାଇଁ ଏକ ଗାଇଡ୍

ବାଥରୁମ୍ ମେଜିଆ ୱାଟରପ୍ରୁଫିଙ୍ଗର ସୋପାନ

ଆପଣଙ୍କ ବାଥରୁମ୍ ଯେପରି ପାଣିଜନିତ କ୍ଷୟକ୍ଷତିରୁ ସୁରକ୍ଷିତ ରହେ ତାହା ସୁନିଶ୍ଚିତ କରିବା ପାଇଁ ବାଥରୁମ୍ ମେଜିଆର ୱାଟରପ୍ରୁଫିଙ୍ଗ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହୋଇଥାଏ। ଆପଣ ଏହି ସୋପାନଗୁଡ଼ିକୁ ଅନୁସରଣ କରି ନିଜ ବାଥରୁମ୍‌‌ର ଦୀର୍ଘଜୀବନକୁ ସୁନିଶ୍ଚିତ କରିପାରିବେ।

୧. ବାଥରୁମ୍‌‌କୁ ଇନସୁଲେସନ୍ ପାଇଁ ପ୍ରସ୍ତୁତ କରନ୍ତୁ

ବାସ୍ତବିକ ବାଥରୁମ୍ କିମ୍ବା ଶୌଚାଳୟ ୱାଟରପ୍ରୁଫିଙ୍ଗ ପ୍ରକ୍ରିୟା ଆରମ୍ଭ କରିବା ପୂର୍ବରୁ, ବାଥରୁମ୍‌‌କୁ ଉପଯୁକ୍ତ ଭାବେ ପ୍ରସ୍ତୁତ କରିବା ଅତ୍ୟାବଶ୍ୟକ ହୋଇଥାଏ। ପୂର୍ବରୁ ବିଦ୍ୟମାନ ରହିଥିବା ମେଜିଆକୁ ହଟାନ୍ତୁ ଏବଂ ପୃଷ୍ଠଭାଗ ଯେପରି ସଫା, ଶୁଷ୍କ ଏବଂ ଅଳିଆ ଆବର୍ଜନାରୁ ମୁକ୍ତ ଅଛି ତାହା ସୁନିଶ୍ଚିତ କରିବା ପରେ ହିଁ ପରବର୍ତ୍ତୀ ସୋପାନକୁ ଯାଆନ୍ତୁ।

୨. ସଠିକ୍ ୱାଟରପ୍ରୁଫିଙ୍ଗ ସାମଗ୍ରୀ ଚୟନ କରନ୍ତୁ

ଆପଣଙ୍କ ପ୍ରକଳ୍ପର ସଫଳତା ପାଇଁ ଉପଯୁକ୍ତ ୱାଟରପ୍ରୁଫିଙ୍ଗ ସାମଗ୍ରୀ ଚୟନ କରିବା ଗୁରୁତ୍ୱପୂର୍ଣ୍ଣ ହୋଇଥାଏ। ବଜାରରେ ଅନେକ ପ୍ରକାର ବିକଳ୍ପ ଉପଲବ୍ଧ ଅଛି, ଯେପରିକି - ୱାଟରପ୍ରୁଫିଙ୍ଗ ମେମ୍ବ୍ରେନ୍, ଲିକ୍ୱିଡ୍ ୱାଟରପ୍ରୁଫିଙ୍ଗ କମ୍ପାଉଣ୍ଡ ଏବଂ ସିମେଣ୍ଟିଟିୟସ୍ କୋଟିଂ। ପ୍ରତ୍ୟେକ ବିକଳ୍ପର ନିଜସ୍ୱ ଫାଇଦା ଓ ପ୍ରୟୋଗ ପଦ୍ଧତି ରହିଥାଏ, ତେଣୁ ଆପଣଙ୍କ ବାଥରୁମ୍‌‌ର ଆବଶ୍ୟକତା ଏବଂ ଆପଣଙ୍କର ଦକ୍ଷତା ସ୍ତରକୁ ସୁହାଉଥିବା ସବୁଠାରୁ ଉପଯୁକ୍ତ ୱାଟରପ୍ରୁଫିଙ୍ଗ କୋଟିଂ ଚୟନ କରିବା ଜରୁରୀ ଅଟେ।

୩. ପୃଷ୍ଠଭାଗକୁ ପ୍ରାଇମର ଦ୍ୱାରା ପ୍ରସ୍ତୁତ କରନ୍ତୁ

ୱାଟରପ୍ରୁଫିଙ୍ଗ ସାମଗ୍ରୀ ଯେପରି ମେଜିଆରେ ଉପଯୁକ୍ତ ଭାବେ ସଂଲଗ୍ନ ହୁଏ ତାହା ସୁନିଶ୍ଚିତ କରିବା ପାଇଁ ପ୍ରାଇମର ଲଗାଇବା ଜରୁରୀ ହୋଇଥାଏ। ପ୍ରାଇମରଟି ପୃଷ୍ଠଭାଗ ଓ ୱାଟରପ୍ରୁଫିଙ୍ଗ ପରସ୍ତ ମଧ୍ୟରେ ଏକ ବନ୍ଧନ ସୃଷ୍ଟି କରିଥାଏ ଓ ତାହାର ଫଳପ୍ରଦତାକୁ ବୃଦ୍ଧି କରିଥାଏ। ପ୍ରାଇମର ଲଗାଇବା ସମୟରେ ନିର୍ମାତାଙ୍କ ନିର୍ଦ୍ଦେଶାବଳୀକୁ ଅନୁସରଣ କରନ୍ତୁ ଏବଂ ଆଗକୁ ବଢ଼ିବା ପୂର୍ବରୁ ତାହାକୁ ସମ୍ପୂର୍ଣ୍ଣ ରୂପେ ଶୁଖିବାକୁ ଦିଅନ୍ତୁ।

୪. ଯୋଡ଼ଗୁଡ଼ିକୁ ସିଲ୍ କରନ୍ତୁ

ଚଟାଣ ଏବଂ କାନ୍ଥ ମଧ୍ୟରେ ଥିବା ଯୋଡ଼େଇ ସ୍ଥାନ (ଜଏଣ୍ଟ)ଗୁଡ଼ିକ ମଧ୍ୟ ଦେଇ ପାଣି ସହଜରେ ଭେଦିଯାଇପାରେ। ତେଣୁ, ସେହି ଯୋଡ଼େଇ ସ୍ଥାନଗୁଡ଼ିକୁ ଏକ ୱାଟରପ୍ରୁଫ୍ ସିଲାଣ୍ଟ କିମ୍ବା ଟେପ୍ ଦେଇ ଭଲଭାବେ ସିଲ୍ କରିବା ଆବଶ୍ୟକ। କୋଣ ଏବଂ ଡ୍ରେନ୍ ବା ପାଇପ୍ ଚାରିପଟେ ଥିବା ସ୍ଥାନଗୁଡ଼ିକ ଉପରେ ବିଶେଷ ଧ୍ୟାନ ଦିଆଯିବା ଜରୁରୀ କାରଣ, ସେହିସବୁ ଜାଗାରୁ ହିଁ ପାଣି ଲିକେଜ୍ ହୋଇଥାଏ।

୫. ପରୀକ୍ଷା କରନ୍ତୁ

ବାଥରୁମ୍ ୱାଟରପ୍ରୁଫିଙ୍ଗ ପ୍ରକ୍ରିୟାକୁ ସମ୍ପୂର୍ଣ୍ଣ କରିବା ପରେ, ପାଣି ଦେଇ ତାହାର ପରୀକ୍ଷା କରିବା ତାହାର ଫଳପ୍ରଦତାକୁ ସୁନିଶ୍ଚିତ କରିଥାଏ। ବାଥରୁମ୍ ମେଜିଆ ଉପରେ ଯଥେଷ୍ଟ ପରିମାଣର ପାଣି ଢାଳନ୍ତୁ ଓ ତାହାକୁ କିଛି ସମୟ ପାଇଁ ଜମି ରହିବାକୁ ଦିଅନ୍ତୁ। ଲିକେଜ୍ କିମ୍ବା ସିପେଜ୍‌‌ର ଲକ୍ଷଣଗୁଡ଼ିକୁ ଯାଞ୍ଚ କରିନିଅନ୍ତୁ। ଯଦି କୌଣସି ସମସ୍ୟା ରହିଥାଏ, ତେବେ ପ୍ରଥମେ କେଉଁଠି ସମସ୍ୟା ରହିଛି ତାହାକୁ ଚିହ୍ନଟ କରନ୍ତୁ ଏବଂ ଆବଶ୍ୟକ ମରାମତି କରିବା ପରେ ଟାଇଲ୍ସ ଅଥବା ଅନ୍ୟାନ୍ୟ ମେଜିଆ ଆଚ୍ଛାଦନ ପାଇଁ ଆଗକୁ ବଢ଼ନ୍ତୁ।

ବାଥରୁମ୍ କାନ୍ଥଗୁଡ଼ିକୁ କିପରି ୱାଟରପ୍ରୁଫ୍ କରାଯାଏ?

ମେଜିଆ ଭଳି ବାଥରୁମ୍‌‌ କାନ୍ଥଗୁଡ଼ିକର ୱାଟରପ୍ରୁଫିଙ୍ଗ ମଧ୍ୟ ସମାନ ରୂପେ ଗୁରୁତ୍ୱପୂର୍ଣ୍ଣ। ଶାୱାର୍ ଏବଂ ଗାଧୁଆକୁଣ୍ଡରୁ ଉତ୍ପନ୍ନ ଆର୍ଦ୍ରତା ସହଜରେ କାନ୍ଥଗୁଡ଼ିକ ମଧ୍ୟରେ ଭେଦିଯାଇପାରେ, ଯାହାଫଳରେ କବକ/ଶିଉଳି ବଢ଼ିଥାଏ, ରଙ୍ଗ ଛାଡ଼ିଥାଏ ଏବଂ ଢାଞ୍ଚାଗତ କ୍ଷତି ଘଟିଥାଏ। ଆପଣଙ୍କର ବାଥରୁମ୍ କାନ୍ଥଗୁଡ଼ିକୁ ଫଳପ୍ରଦ ଭାବେ ୱାଟରପ୍ରୁଫ୍ କରିବା ପାଇଁ ନିମ୍ନଲିଖିତ ପଦକ୍ଷେପଗୁଡ଼ିକୁ ଅନୁସରଣ କରନ୍ତୁ:

୨. ସଠିକ୍ କାନ୍ଥ ୱାଟରପ୍ରୁଫିଙ୍ଗ ସାମଗ୍ରୀ ଚୟନ କରନ୍ତୁ

ଏକ ସଫଳ ପରିଣାମ ପାଇବା ପାଇଁ ଉପଯୁକ୍ତ କାନ୍ଥ ୱାଟରପ୍ରୁଫିଙ୍ଗ ସାମଗ୍ରୀ ଚୟନ କରିବା ଗୁରୁତ୍ୱପୂର୍ଣ୍ଣ ହୋଇଥାଏ। ଏହି ଉଦ୍ଦେଶ୍ୟ ପାଇଁ ସାଧାରଣତଃ ୱାଟରପ୍ରୁଫିଙ୍ଗ ମେମ୍ବ୍ରେନ୍‌‌ ବ୍ୟବହୃତ ହୋଇଥାଏ, ଯାହା ଏକ ବନ୍ଧ ସୃଷ୍ଟି କରି ପାଣିକୁ କାନ୍ଥ ମଧ୍ୟକୁ ଭେଦିବାରୁ ରୋକିଥାଏ। ସୁନିଶ୍ଚିତ କରିନିଅନ୍ତୁ ଯେ ଆପଣ ଚୟନ କରିଥିବା ସାମଗ୍ରୀଟି ଆପଣଙ୍କ ଶୌଚାଳୟର କାନ୍ଥର ପୃଷ୍ଠଭାଗ ପାଇଁ ଉପଯୁକ୍ତ ଅଟେ।

୨. ପୃଷ୍ଠଭାଗକୁ ପ୍ରାଇମର ଦ୍ୱାରା ପ୍ରସ୍ତୁତ କରନ୍ତୁ

ମେଜିଆ ୱାଟରପ୍ରୁଫିଙ୍ଗ ଭଳି କାନ୍ଥର ୱାଟରପ୍ରୁଫିଙ୍ଗ ପାଇଁ ମଧ୍ୟ ପ୍ରାଇମର ଲଗାଇବା ଜରୁରୀ ହୋଇଥାଏ। ପ୍ରାଇମର ୱାଟରପ୍ରୁଫିଙ୍ଗ ସାମଗ୍ରୀର କାନ୍ଥ ପୃଷ୍ଠଭାଗ ସହିତ ସଂଲଗ୍ନତାକୁ ଉନ୍ନତ କରି ତାହାର ଫଳପ୍ରଦତାକୁ ବୃଦ୍ଧି କରିଥାଏ। ପ୍ରାଇମର ଲଗାଇବା ପୂର୍ବରୁ କାନ୍ଥଗୁଡ଼ିକୁ ଭଲଭାବେ ସଫା କରନ୍ତୁ ଏବଂ ଫାଟ କିମ୍ବା ଗର୍ତ୍ତଗୁଡ଼ିକର ମରାମତି କରିଦିଅନ୍ତୁ।

୩. ୱାଟରପ୍ରୁଫ୍ ରଙ୍ଗ ଲଗାନ୍ତୁ

ୱାଟରପ୍ରୁଫିଙ୍ଗ ମେମ୍ବ୍ରେନ୍ ଉପରେ ଏକ ଅତିରିକ୍ତ ସୁରକ୍ଷା ଆସ୍ତରଣ ଭାବେ ୱାଟରପ୍ରୁଫ୍ ପେଣ୍ଟ ଲଗାଯାଇପାରିବ। ଏହି ରଙ୍ଗ ପାଣି ବିରୁଦ୍ଧରେ ଏକ ଦ୍ୱିତୀୟ ବନ୍ଧ ଭାବେ କାମ କରିଥାଏ ଏବଂ କାନ୍ଥକୁ ଅତିରିକ୍ତ ସୁରକ୍ଷା ଯୋଗାଇଥାଏ। ବିଶେଷ ଭାବେ ବାଥରୁମ୍‌‌ରେ ବ୍ୟବହାର ପାଇଁ ଉଦ୍ଦିଷ୍ଟ ଉଚ୍ଚ-କ୍ୱାଲିଟଇର ୱାଟରପ୍ରୁଫ୍ ରଙ୍ଗ ଚୟନ କରିବାକୁ ଭୁଲନ୍ତୁ ନାହିଁ।

୪. ପରୀକ୍ଷା କରନ୍ତୁ

ବାଥରୁମ୍ କାନ୍ଥଗୁଡ଼ିକର ୱାଟରପ୍ରୁଫିଙ୍ଗ୍ ପ୍ରକ୍ରିୟା ସରିବା ପରେ, ଏକ ପୁଙ୍ଖାନୁପୁଙ୍ଖ ପରୀକ୍ଷଣ ପଦ୍ଧତି ସଞ୍ଚାଳନ କରନ୍ତୁ। କାନ୍ଥଗୁଡ଼ିକ ଉପରେ ପାଣି ଛାଟନ୍ତୁ ଏବଂ ପାଣି କାନ୍ଥରେ ଭେଦୁଛି କି ନାହିଁ ତାହା ଯାଞ୍ଚ କରିନିଅନ୍ତୁ। କୋଣ, ଦାର ଏବଂ ଫିକ୍ସର୍‌‌ ଆଖପାଖର ସ୍ଥାନଗୁଡ଼ିକ ଉପରେ ବିଶେଷ ଧ୍ୟାନ ଦିଅନ୍ତୁ, କାରଣ ସେହିସବୁ ଜାଗାଗୁଡ଼ିକ ହିଁ ଦୁର୍ବଳ ବିନ୍ଦୁ ହୋଇଥାଏ। ଯଦି କୌଣସି ଲିକେଜ୍ ଦେଖାଦିଏ, ତେବେ ଆବଶ୍ୟକ ମରାମତି କରନ୍ତୁ ଏବଂ କାନ୍ଥଟି ସମ୍ପୂର୍ଣ୍ଣ ଜଳନିରୋଧି ହେବା ପର୍ଯ୍ୟନ୍ତ ପୁନର୍ବାର ପରୀକ୍ଷା ସଞ୍ଚାଳିତ କରି ଯାଞ୍ଚ କରିନିଅନ୍ତୁ।

ପ୍ରାୟତଃ ପଚରାଯାଉଥିବା ପ୍ରଶ୍ନ

୧. ଟାଇଲ୍ ବିଛାଇବା ପୂର୍ବରୁ ବାଥରୁମ୍ ମେଜିଆକୁ ୱାଟରପ୍ରୁଫ୍ କରାଯିବା ଆବଶ୍ୟକ କି?

ହଁ, ଟାଇଲ୍ ବିଛାଇବା ପୂର୍ବରୁ ଆପଣଙ୍କ ବାଥରୁମ୍ ମେଜିଆକୁ ୱାଟରପ୍ରୁଫ୍ କରିନେବା ଅତ୍ୟାବଶ୍ୟକ ଅଟେ । ଏହା ଲିକ୍ ଏବଂ ସିପେଜ୍ କାରଣରୁ ସୃଷ୍ଟି ହେଉଥିବା ପାଣିଜନିତ କ୍ଷୟକ୍ଷତି ବିରୁଦ୍ଧରେ ଆପଣଙ୍କ ବାଥରୁମ୍‌‌କୁ ସୁରକ୍ଷିତ ରଖିବା ସୁନିଶ୍ଚିତ କରିଥାଏ।

୨. ସମଗ୍ର ବାଥରୁମ୍‌‌କୁ ୱାଟରପ୍ରୁଫ୍ କରାଯିବା ଆବଶ୍ୟକ ନା କେବଳ ଶାୱାର୍?

ସର୍ବାଧିକ ସୁରକ୍ଷାକୁ ସୁନିଶ୍ଚିତ କରିବା ପାଇଁ ଶାୱାର୍, ମେଜିଆ ଏବଂ କାନ୍ଥ ସମେତ ସମଗ୍ର ବାଥରୁମ୍ ସ୍ଥାନକୁ ୱାଟରପ୍ରୁଫ୍ କରିବା ପରାମର୍ଶଯୋଗ୍ୟ ଅଟେ। ସମଗ୍ର ବାଥରୁମ୍‌‌କୁ ୱାଟରପ୍ରୁଫ୍ କରିବା ଦ୍ୱାରା ଲିକେଜ୍‌‌ ପ୍ରତିରୋଧ ହୋଇଥାଏ, ଯାହା କ୍ଷୟକ୍ଷତି ଓ କବକ/ଶିଉଳି ବଢ଼ିବାର କାରଣ ସାଜିଥାଏ।

୩. ନଳ ଚାରିପଟେ ୱାଟରପ୍ରୁଫ୍ କରାଯିବା ଆବଶ୍ୟକ କି?

ହଁ, ନଳଗୁଡ଼ିକ ଚାରିପାଖକୁ ୱାଟରପ୍ରୁଫ୍ କରାଯିବା ଗୁରୁତ୍ୱପୂର୍ଣ୍ଣ ଅଟେ। ଏହା ପାଣିଜନିତ କ୍ଷତି ବିରୁଦ୍ଧରେ ସୁରକ୍ଷା ଯୋଗାଇବା ସହିତ ଆପଣଙ୍କ ବାଥରୁମ୍‌‌ର ଅଖଣ୍ଡତାକୁ ବଜାୟ ରଖିଥାଏ। ନଳଗୁଡ଼ିକ ଚାରିପଟେ ସିଲିଂ କରାଯିବା ଦ୍ୱାରା ଏହା ସୁନିଶ୍ଚିତ ହୋଇଥାଏ ଯେ, ପାଣି ପୃଷ୍ଠଭାଗ ମଧ୍ୟକୁ ପ୍ରବେଶ କରିପାରିବ ନାହିଁ କିମ୍ବା କ୍ଷୟକ୍ଷତି କରିପାରିବ ନାହିଁ।

୪. ପୂର୍ବରୁ ଲାଗିଥିବା ବାଥରୁମ୍ ଟାଇଲ୍ସକୁ ଆମେ ୱାଟରପ୍ରୁଫ୍ କରିପାରିବା କି?

ହଁ, ପୂର୍ବରୁ ବିଦ୍ୟମାନ ରହିଥିବା ବାଥରୁମ୍ ଟାଇଲ୍ସକୁ ୱାଟରପ୍ରୁଫ୍ କରିବା ସମ୍ଭବ ଅଟେ। ହେଲେ, ୱାଟରପ୍ରୁଫିଙ୍ଗ ସାମଗ୍ରୀଟି ଯେପରି ଟାଇଲ୍ ପୃଷ୍ଠଭାଗରେ ଉପଯୁକ୍ତ ଭାବେ ଲାଗିରହିବ ତାହା ସୁନିଶ୍ଚିତ କରିବା ପାଇଁ ପ୍ରଥମେ ଟାଇଲ୍ସକୁ ଭଲଭାବେ ସଫା କରାଯିବା ଓ ମରାମତି କରାଯିବା ଜରୁରୀ ହୋଇଥାଏ।

୫. ବାଥରୁମ୍ ୱାଟରପ୍ରୁଫିଙ୍ଗ କେତେଦିନ ଧରି ଚାଲିଥାଏ?

ବାଥରୁମ୍ ୱାଟରପ୍ରୁଫିଙ୍ଗର ପ୍ରଭାବ ବିଭିନ୍ନ କାରକଗୁଡ଼ିକ ଉପରେ ନିର୍ଭର କରିଥାଏ, ଯେପରିକି- ବ୍ୟବହାର କରାଯାଇଥିବା ସାମଗ୍ରୀ, ଜଳ ସଂସ୍ପର୍ଶର ପରିମାଣ ଏବଂ ସ୍ଥାପନର ଗୁଣମାନ। ଜଳନିରୋଧୀ ବନ୍ଧର ଅଖଣ୍ଡତାକୁ ସୁନିଶ୍ଚିତ କରିବା ପାଇଁ ନିୟମିତ ରକ୍ଷଣାବେକ୍ଷଣ ଓ ତଦାରଖ କରାଗଲେ ସାଧାରଣତଃ ଏହାର ପ୍ରଭାବ ୫-୧୦ ବର୍ଷ ବଜାୟ ରହିପାରେ।