Share:
ହୋମ୍ ବିଲଡିଂ ଗାଇଡ୍
ଆମର ପ୍ରଡକ୍ଟସ୍
ଉପାଦେୟ ଟୁଲ୍ସ
ଆମର ପ୍ରଡକ୍ଟସ୍
Share:
ମୋର୍ଟାର୍ ବାଲି, ସିମେଣ୍ଟ ଏବଂ ପାଣିର ଏକ ମିଶ୍ରଣ ହୋଇଥାଏ । ରାଜମିସ୍ତ୍ରୀ ବା ଇଟା ଯୋଡ଼େଇ ନିର୍ମାଣ କାର୍ଯ୍ୟରେ ଇଟା ବା ପଥରଗୁଡ଼ିକୁ ଯୋଡ଼ିବା ପାଇଁ ଏହା ବ୍ୟବହୃତ ହୋଇଥାଏ । ନିର୍ମାଣ ଉପାଦାନଗୁଡ଼ିକ ମଧ୍ୟରେ ଏକ ସୁଦୃଢ଼ ବନ୍ଧନ ସୃଷ୍ଟି କରିବା ଏହାର ଉଦ୍ଦେଶ୍ୟ ହୋଇଥାଏ, ଯାହା ଫଳରେ ନିର୍ମିତ ଢାଞ୍ଚାଗୁଡ଼ିକ ଅଧିକ ସ୍ଥିର ଏବଂ ଦୀର୍ଘସ୍ଥାୟୀ ହୋଇପାରିଥାଏ । ମୋର୍ଟାର୍ ପ୍ରକୃତିଗତ ଭାବେ ଅପେକ୍ଷାକୃତ କୋମଳ ହୋଇଥାଏ, ଅର୍ଥାତ୍ ଏହା ଫାଙ୍କଗୁଡ଼ିକୁ ଭରିଥାଏ ଏବଂ ନିର୍ମାଣ ଉପାଦାନଗୁଡ଼ିକର ବିଭିନ୍ନ ପ୍ରକାର ଆକୃତି ଓ ଆକାରରେ ଢଳିଯାଇଥାଏ । ଏହାକୁ ପ୍ଲାଷ୍ଟରିଂ ପାଇଁ ଏକ ବେସ୍ ଭାବେ ମଧ୍ୟ ବ୍ୟବହାର କରାଯାଇପାରିବ ।
ମୋର୍ଟାର୍ ଇଟା ଓ ପଥର ମଧ୍ୟରେ ଉତ୍କୃଷ୍ଟ ଆଢେସନ୍ ବା ସଂଲଗ୍ନତା ଏବଂ ସୁଦୃଢ଼ ବନ୍ଧନ ଯୋଗାଇଥାଏ, ଯାହା ଫଳରେ ଏକ ସଂଲଗ୍ନଶୀଳ ଏବଂ ଦୀର୍ଘସ୍ଥାୟୀ ଢାଞ୍ଚାର ନିର୍ମାଣ ହୋଇପାରେ ।
ଏହା ଫାଙ୍କଗୁଡ଼ିକୁ ପୂରଣ କରିପାରିଥାଏ ଏବଂ ଇଟାର ଆକାର ଓ ଆକୃତିରେ ରହିଥିବା ଭିନ୍ନତା ଅନୁସାରେ ଢଳିଯାଇଥାଏ, ଯାହାଫଳରେ ନିର୍ମାଣ ସମୟରେ ସହଜରେ ଆଡଜଷ୍ଟମେଣ୍ଟ କରାଯାଇପାରେ ।
ମୋର୍ଟାର୍ ପ୍ରତିକୂଳ ପାଣିପାଗ ପରିସ୍ଥିତିରୁ ସୁରକ୍ଷା ଯୋଗାଇବା ସହିତ ଜଳ ଭେଦନକୁ ପ୍ରତିରୋଧ କରିଥାଏ ।
ଏହାକୁ ବ୍ୟବହାର କରିବା, ମିଶ୍ରଣ କରିବା ଏବଂ ଖେଳାଇବା ଖୁବ୍ ସହଜ, ଯାହାଫଳରେ ଇଟା ଯୋଡ଼େଇ କାମ ଅଧିକ ଦକ୍ଷ ହୋଇଥାଏ ।
ଇଟା କିମ୍ବା ପଥରଗୁଡ଼ିକୁ ଏକାଠି ବାନ୍ଧିବା ପାଇଁ ମୋର୍ଟାର୍ ବ୍ୟବହୃତ ହୋଇଥାଏ, ଯାହା ଏକ ସୁଦୃଢ଼ ଏବଂ ସ୍ଥିର ଢାଞ୍ଚା ଯୋଗାଇଥାଏ ।
ମୋର୍ଟାର୍ କୁ ଇଟା ଓ ପଥରଗୁଡ଼ିକ ମଧ୍ୟରେ ଥିବା ଫାଙ୍କଗୁଡ଼ିକୁ ଭରିବା ପାଇଁ ବ୍ୟବହାର କରାଯାଇପାରିବ, ଯାହାଫଳରେ ସଂରଚନାକୁ ଅତିରିକ୍ତ ଶକ୍ତି ଏବଂ ପାଣିପାଗ ନିରୋଧୀ ଗୁଣ ମିଳିଥାଏ ।
ମୋର୍ଟାର୍ କୁ ପ୍ରାୟତଃ କାନ୍ଥର ପ୍ଲାଷ୍ଟରିଂ ପାଇଁ ବେସ୍ ଭାବେ ପ୍ରୟୋଗ କରାଯାଇଥାଏ । ଏହା ସାହାଯ୍ୟରେ ପ୍ଲାଷ୍ଟର କିମ୍ବା ପେଣ୍ଟ୍ କାନ୍ଥରେ ସହଜରେ ଓ ଫଳପ୍ରଦ ଢଙ୍ଗରେ ଲାଗିପାରିଥାଏ ।
ମୋର୍ଟାର୍ ପାଇପ୍, ଡ୍ରେନ୍ ଏବଂ ଅନ୍ୟାନ୍ୟ ନିର୍ମାଣ କାର୍ଯ୍ୟରେ ଜଏଣ୍ଟଗୁଡ଼ିକୁ ସିଲ୍ କରିବା ଏବଂ ୱାଟରପ୍ରୁଫ୍ କରିବାରେ ସାହାଯ୍ୟ କରିଥାଏ ।
ସିମେଣ୍ଟ, ଏଗ୍ରିଗେଟ୍ (ବାଲି ଓ ଗୋଡ଼ି) ଏବଂ ପାଣିର ମିଶ୍ରଣକୁ କଂକ୍ରିଟ୍ କୁହାଯାଏ । ଏହା ଏକ ଶକ୍ତିଶାଳୀ ଏବଂ ଦୀର୍ଘସ୍ଥାୟୀ ନିର୍ମାଣ ସାମଗ୍ରୀ ଅଟେ, ଯାହା ସମୟକ୍ରମେ କଠିନତା ହାସଲ କରେ ଓ ପଥର ଭଳି ଗୁଣବତ୍ତା ପ୍ରାପ୍ତ କରେ । କଂକ୍ରିଟ୍ ର ଉତ୍କୃଷ୍ଟ ଶକ୍ତି ଏବଂ ବହୁ-ଉପଯୋଗିତା କାରଣରୁ କଂକ୍ରିଟ୍ କୁ ବିବିଧ ନିର୍ମାଣ ପ୍ରକଳ୍ପରେ ବ୍ୟବହାର କରାଯାଇଥାଏ । ରିଇଫୋର୍ସମେଣ୍ଟ, ଯଥା- ଷ୍ଟିଲ୍ ରଡ୍ କିମ୍ବା ଫାଇବର୍ ସହିତ ମିଶାଯାଇ କଂକ୍ରିଟ୍ କୁ ଆହୁରି ଅଧିକ ବ୍ୟାପକ ବର୍ଗମାଳାର ପ୍ରୟୋଗରେ ବ୍ୟବହାର କରାଯାଇପାରିବ ।
କଂକ୍ରିଟ୍ ର ଉତ୍କୃଷ୍ଟ କମ୍ପ୍ରେସିଭ୍ ଶକ୍ତି ରହିଥାଏ, ଯାହାଫଳରେ ତାହା ଉଚ୍ଚ-ଭାର ବହନକାରୀ ଢାଞ୍ଚାଗୁଡ଼ିକ ପାଇଁ ଆଦର୍ଶ ହୋଇଥାଏ ।
କଂକ୍ରିଟ୍ କ୍ଷୟ, କଳଙ୍କି, ପାଣିପାଗର ପ୍ରଭାବ ଏବଂ ଅଗ୍ନି ନିରୋଧୀ ହୋଇଥାଏ, ଯାହାଫଳରେ ତାହା ଦୀର୍ଘସ୍ଥାୟୀ ହୋଇଥାଏ ।
ଏହାକୁ ବିଭିନ୍ନ ପ୍ରକାର ଆକୃତି ଓ ଡିଜାଇନରେ ଢଳେଇ କରାଯାଇପାରିବ, ତେଣୁ ନିର୍ମାଣରେ ଏହା ଏକ ନମନୀୟ ବିକଳ୍ପ ଯୋଗାଇଥାଏ ।
କଂକ୍ରିଟ୍ ନ୍ୟୂନତମ ରକ୍ଷଣାବେକ୍ଷଣ ଆବଶ୍ୟକ କରିଥାଏ, ତେଣୁ ଦୀର୍ଘ ମିଆଦରେ ଏହା ସମୟ, ପରିଶ୍ରମ ଏବଂ ଟଙ୍କା ବଞ୍ଚାଇଥାଏ ।
ଫାଉଣ୍ଡେସନ୍ ଏବଂ ସ୍ଲାବ୍ ନିର୍ମାଣ ପାଇଁ କଂକ୍ରିଟ୍ ବହୁଳ ଭାବେ ବ୍ୟବହୃତ ହୋଇଥାଏ, ଯାହା ବିଲଡିଂଗୁଡ଼ିକୁ ଏକ ଶକ୍ତିଶାଳୀ ଆଧାର ଯୋଗାଇଥାଏ ।
ଢାଞ୍ଚାକୁ ଅଧିକରୁ ଅଧିକ ଶକ୍ତିଶାଳୀ କରିବା ଓ ସ୍ଥିରତା ପ୍ରଦାନ କରିବା ପାଇଁ ପୁନଃସୁଦୃଢ଼ୀକୃତ (ରିଇନଫୋର୍ସଡ୍) କଂକ୍ରିଟ୍ କୁ କଲମ୍ ଏବଂ ବିମ୍ ତଥା କାନ୍ଥ ଭଳି ଭାର-ବହନକାରୀ ଉପାଦାନର ନିର୍ମାଣ ନିମନ୍ତେ ବ୍ୟବହାର କରାଯାଇପାରିବ ।
ଏହାର ସ୍ଥାୟିତ୍ୱ ଏବଂ ଶକ୍ତି ଏହାକୁ ଭାରି ଯାନବାହନ ଚଳାଚଳ କରୁଥିବା ସଡ଼କ ଏବଂ ରାଜମାର୍ଗଗୁଡ଼ିକ ପାଇଁ ଉପଯୁକ୍ତ କରିଥାଏ ।
ରିଇନଫୋର୍ସଡ୍ କଂକ୍ରିଟ୍ ର ଦୀର୍ଘସ୍ଥାଳୀ ପ୍ରକୃତି ଏବଂ ଓଜନିଆ ଭାରକୁ ସହିବାର ସାମର୍ଥ୍ୟ ପାଇଁ ତାହାକୁ ସାଧାରଣତଃ ବୃହଦାକାୟ ଭିତ୍ତିଭୂମି, ଯେପରିକି - ସେତୁ ଓ ବନ୍ଧ ପାଇଁ ବ୍ୟବହାର କରାଯାଇଥାଏ ।
| ମୋର୍ଟାର୍ | କଂକ୍ରିଟ୍ | |
| ସଂରଚନା | ସିମେଣ୍ଟ, ବାଲି ଓ ପାଣିରେ ତିଆରି ହୋଇଥାଏ | ସିମେଣ୍ଟ, ବାଲି, ଗୋଡ଼ି ଓ ପାଣିରେ ତିଆରି ହୋଇଥାଏ |
| ଶକ୍ତି | କଂକ୍ରିଟ୍ ତୁଳନାରେ ଏହା କମ୍ ମଜବୁତ ହୋଇଥାଏ | ଏହା ଅଧିକ ଶକ୍ତିଶାଳୀ ଓ ଦୀର୍ଘସ୍ଥାୟୀ |
| ନମନୀୟତା | ଇଟା/ପଥରର ଆକାରରେ ବିବିଧତା ସହିତ କାର୍ଯ୍ୟ କରିହୋଇଥାଏ | ଟାଣ ହୋଇ ପଥର ସଦୃଶ ପଦାର୍ଥ ଭାବେ ସେଟ୍ ହୋଇଥାଏ |
| ଉପଯୋଗ | ପ୍ରାଥମିକ ଭାବେ ଇଟା/ପଥର ବନ୍ଧନ, ପ୍ଲାଷ୍ଟର୍ ଆଧାର ପାଇଁ ଉଦ୍ଦିଷ୍ଟ | ବିଲଡିଂ ନିର୍ମାଣ, ସଡ଼କ, ସେତୁ ନିର୍ମାଣ କାର୍ଯ୍ୟରେ ବ୍ୟାପକ ରୂପେ ବ୍ୟବହୃତ ହୁଏ |
| ସୁକରଣୀୟତା | ଲେପିବାରେ ସହଜ, ଫାଙ୍କଗୁଡ଼ିକୁ ଭରିବା ପାଇଁ ଆଦର୍ଶ | ବିଭିନ୍ନ ଆକାରରେ ଢଳେଇ ପାଇଁ ଆଦର୍ଶ |
| ପାଣିପାଗ ନିରୋଧ | ପାଣିପାଗ ବିରୁଦ୍ଧରେ ସୁରକ୍ଷା ଯୋଗାଏ | ପ୍ରତିକୂଳ ପାଣିପାଗ ପରିସ୍ଥିତି, କ୍ଷୟ ଏବଂ ଅଗ୍ନି ପ୍ରତିରୋଧୀ ହୋଇଥାଏ |
| ରକ୍ଷଣାବେକ୍ଷଣ | ଗୁଣବତ୍ତା ଓ ପ୍ରକାର ଭିତ୍ତିରେ ବିବିଧ ହୋଇଥାଏ | ନ୍ୟୂନତମ ରକ୍ଷଣାବେକ୍ଷଣ ଆବଶ୍ୟକ କରେ |
ସାରାଂଶରେ, ଫଳପ୍ରଦ ଗୃହ ନିର୍ମାଣ ପାଇଁ ମୋର୍ଟାର୍ ଓ କଂକ୍ରିଟ୍ ମଧ୍ୟରେ ରହିଥିବା ପାର୍ଥକ୍ୟକୁ ଜାଣିରଖିବା ଗୁରୁତ୍ୱପୂର୍ଣ୍ଣ ଅଟେ । ମୋର୍ଟାର୍ ଇଟା ଓ ପଥର ପାଇଁ ଏକ ଉତ୍କୃଷ୍ଟ ବଣ୍ଡିଂ ଏଜେଣ୍ଟ ରୂପେ କାମ କରିଥାଏ; ଅନ୍ୟ ପକ୍ଷରେ କଂକ୍ରିଟ୍ ବିଭିନ୍ନ ନିର୍ମାଣ ପ୍ରକଳ୍ପକୁ ଉଚ୍ଚମାନର ଶକ୍ତି ଓ ସ୍ଥାୟିତ୍ୱ ଯୋଗାଇଥାଏ । ସେଗୁଡ଼ିକର ଅନନ୍ୟ ଗୁଣଧର୍ମ ଏବଂ ଉପଯୋଗ ବିଷୟରେ ଜାଣିରଖିଲେ ଆପଣ ନିଜର ନିର୍ମାଣ ଯାତ୍ରା ସମୟରେ ସୁଚିନ୍ତିତ ନିଷ୍ପତ୍ତି ଗ୍ରହଣ କରିପାରିବେ ଏବଂ ନିଜର ପ୍ରକଳ୍ପର ଫଳାଫଳ ଓ ନିଜ ଘରର ଗୁଣବତ୍ତାକୁ ସୁନିଶ୍ଚିତ କରିପାରିବେ ।
