ଆପଣଙ୍କ ଘରର ମୁଖ୍ୟ ଦ୍ୱାରକୁ ବାସ୍ତୁ ଅନୁକୂଳ କରିବା ପାଇଁ ବାସ୍ତୁ ଉପଦେଶ

ଘରର ମୁଖ୍ୟ ଦ୍ୱାରକୁ ବାସ୍ତୁ ଅନୁଯାୟୀ ତିଆରି କରିବା କାହିଁକି ମହତ୍ତ୍ୱପୂର୍ଣ୍ଣ

ବାସ୍ତୁ ଶାସ୍ତ୍ରରେ, ଘରର ମୁଖ୍ୟ ଦ୍ୱାରର ଏକ ଗୁରୁତ୍ୱପୂର୍ଣ୍ଣ ସ୍ଥାନ ରହିଛି; ବିଶ୍ୱାସ କରାଯାଏ ଯେ, ତାହା ହିଁ ସକାରାତ୍ମକ ଶକ୍ତି ଏବଂ ସମୃଦ୍ଧିର ଉତ୍ପତ୍ତି ସ୍ଥଳ ହୋଇଥାଏ । ଘର ମଧ୍ୟରେ ଏକ ସୁଖଶାନ୍ତିପୂର୍ଣ୍ଣ ପରିବେଶ ସୃଷ୍ଟି କରିବାରେ ମୁଖ୍ୟ ଦ୍ୱାରର ଅବସ୍ଥିତି, ଦିଗ ଏବଂ ଡିଜାଇନ୍ ମହତ୍ତ୍ୱପୂର୍ଣ୍ଣ ଭୂମିକା ନିର୍ବାହ କରିଥାଏ । ଘରର ମୁଖ୍ୟ ଦ୍ୱାରକୁ ବାସ୍ତୁ ଅନୁକୂଳ କରି ତିଆରି କରିବା କାହିଁକି ଗୁରୁତ୍ୱପୂର୍ଣ୍ଣ ତାହା ଜାଣନ୍ତୁ:

1. ଶକ୍ତିର ପ୍ରବାହ

ବାସ୍ତୁ ସିଦ୍ଧାନ୍ତ ଅନୁଯାୟୀ, ମୁଖ୍ୟ ଦ୍ୱାର ଶକ୍ତିର ପ୍ରବେଶପଥ ରୂପେ କାର୍ଯ୍ୟ କରିଥାଏ, ଯାହା ସକାରାତ୍ମକ ଶକ୍ତିକୁ ଘର ମଧ୍ୟକୁ ପ୍ରବେଶ କରିବାକୁ ଅନୁମତି ଦେଇଥାଏ । ମୁଖ୍ୟ ଦ୍ୱାର ବାସ୍ତୁ ନିର୍ଦ୍ଦେଶ ଅନୁରୂପ ହୋଇଥିଲେ, ସମଗ୍ର ବାସସ୍ଥଳରେ ଶକ୍ତିର ବାଧାହୀନ ପ୍ରବାହ ସୁବିଧାଜନକ ହୋଇଯାଇଥାଏ, ଯାହା ଏକ ସକାରାତ୍ମକ ଏବଂ ପ୍ରାଣପ୍ରାଚୁର୍ଯ୍ୟପୂର୍ଣ୍ଣ ପରିବେଶ ସୃଷ୍ଟି କରିଥାଏ ।

2. ମୌଳିକ ଉପାଦାନଗୁଡ଼ିକର ସନ୍ତୁଳନ

ବାସ୍ତୁ ଶାସ୍ତ୍ରରେ ପାଞ୍ଚଟି ପ୍ରାକୃତିକ ଉପାଦାନ ବା ପଞ୍ଚଭୂତ - ପୃଥିବୀ, ଜଳ, ଅଗ୍ନି, ବାୟୁ ଓ ଆକାଶର ସନ୍ତୁଳନ ଉପରେ ଗୁରୁତ୍ୱ ପ୍ରଦାନ କରାଯାଇଛି । ମୁଖ୍ୟ ଦ୍ୱାରକୁ ସଠିକ୍ ସ୍ଥାନରେ ରଖାଯାଇଥିଲେ ଏହିସବୁ ଉପାଦାନଗୁଡ଼ିକ ମଧ୍ୟରେ ସୁସଙ୍ଗତ ସମନ୍ୱୟ ଘଟିଥାଏ ଏବଂ ଘର ମଧ୍ୟରେ ଏକ ସନ୍ତୁଳିତ ଶକ୍ତି ପ୍ରବାହ ସୁନିଶ୍ଚିତ ହୋଇଥାଏ ।

3. ସମୃଦ୍ଧିକୁ ସ୍ୱାଗତ କରିବା

ବିଶ୍ୱାସ କରାଯାଏ ଯେ, ମୁଖ୍ୟ ଦ୍ୱାର ସମୃଦ୍ଧି ଏବଂ ପ୍ରାଚୁର୍ଯ୍ୟତାର ପ୍ରବେଶପଥ ହୋଇଥାଏ । ମୁଖ୍ୟ ଦ୍ୱାର ପାଇଁ ବାସ୍ତୁ ସିଦ୍ଧାନ୍ତକୁ ଅନୁସରଣ କରିବା ଦ୍ୱାରା ଆପଣଙ୍କ ଘର ମଧ୍ୟକୁ ସକାରାତ୍ମକ କମ୍ପନ ଓ ସୁଯୋଗଗୁଡ଼ିକୁ ଆକର୍ଷିତ କରିବାରେ ସାହାଯ୍ୟ ମିଳିଥାଏ, ଯାହାଫଳରେ ଘରେ ବାସ କରୁଥିବା ଲୋକମାନଙ୍କ ସାମଗ୍ରିକ ସମୃଦ୍ଧି ଓ କଲ୍ୟାଣ ସୁନିଶ୍ଚିତ ହୋଇପାରିଥାଏ ।

4. ମାନସିକ କଲ୍ୟାଣ

ବାସ୍ତୁ ନିର୍ଦ୍ଦେଶ ଅନୁସାରେ ମୁଖ୍ୟ ଦ୍ୱାରର ଡିଜାଇନ୍ କରାଯାଇଥିଲେ ଘରର ସଦସ୍ୟଙ୍କ ମାନସିକ କଲ୍ୟାଣ ଉପରେ ସକାରାତ୍ମକ ପ୍ରଭାବ ପଡ଼ିଥାଏ । ଏକ ରମଣୀୟ ଏବଂ ସଠିକ୍-ସ୍ଥାନରେ ଅବସ୍ଥାପିତ ମୁଖ୍ୟ ଦ୍ୱାର ଘର ମଧ୍ୟରେ ନିରାପତ୍ତା, ଶାନ୍ତି ଏବଂ ସୁଖର ଭାବନା ଜାଗ୍ରତ କରିବାରେ ସହାୟକ ହୋଇଥାଏ ।

ମୁଖ୍ୟ ଦ୍ୱାର ପାଇଁ ବାସ୍ତୁ ଉପଦେଶ

ଏବେ ଆସନ୍ତୁ, ଆପଣଙ୍କ ମୁଖ୍ୟ ଦ୍ୱାରର ଅବସ୍ଥିତି, ଆକାର, ସାମଗ୍ରୀ, ରଙ୍ଗ, ନାମଫଳକ, ପାହାଚର ସଂଖ୍ୟା, ଦେବାଦେବୀଙ୍କ ପ୍ରତିମାର ସ୍ଥାପନା ଏବଂ ଆଲୋକ ବ୍ୟବସ୍ଥା ସଂକ୍ରାନ୍ତୀୟ ବାସ୍ତୁ ଉପାୟ ଏବଂ ଉପଦେଶଗୁଡ଼ିକ ଉପରେ ନଜର ପକାଇବା ।

1. ପ୍ରବେଶପଥର ଦିଗ

ବାସ୍ତୁ ଅନୁସାରେ, ମୁଖ୍ୟ ପ୍ରବେଶପଥର ଦିଗ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଥାଏ । ପୂର୍ବ, ଉତ୍ତର ଏବଂ ଉତ୍ତର-ପୂର୍ବ ଦିଗଗୁଡ଼ିକୁ ଅତ୍ୟନ୍ତ ଶୁଭ ବିବେଚନା କରାଯାଏ । ବାସ୍ତୁ ଅନୁସାରେ, ଏହି ମୁଖ୍ୟ ଦ୍ୱାରର ଦିଗ ଘର ମଧ୍ୟକୁ ସକାରାତ୍ମକ ଶକ୍ତି ଏବଂ ପ୍ରାଚୁର୍ଯ୍ୟତାର ଆଗମନକୁ ଅନୁମତି ଦେଉଥିବାର ବିଶ୍ୱାସ କରାଯାଏ, ଯାହା ଘରର ସଦସ୍ୟମାନଙ୍କ କଲ୍ୟାଣକୁ ସୁନିଶ୍ଚିତ କରିଥାଏ ।

2. ଦ୍ୱାରର ଆକାର

ମୁଖ୍ୟ ଦ୍ୱାରର ଆକାର ଘରର ସାମଗ୍ରିକ ଆକାରର ସମାନୁପାତିକ ହେବା ଉଚିତ । ଅତି ଛୋଟ କିମ୍ବା ଅତି ବଡ଼ ହୋଇ ନ ଥିବା ଦ୍ୱାର ଆପଣଙ୍କ ଘର ମଧ୍ୟରେ ଶକ୍ତିର ପ୍ରବାହରେ ସନ୍ତୁଳନକୁ ବଜାୟ ରଖିବାରେ ସହାୟକ ହୋଇଥାଏ । ଘରର ସୌନ୍ଦର୍ଯ୍ୟକୁ ଉନ୍ନତ କରିବାରେ ମଧ୍ୟ ଏହାର ଅବଦାନ ରହିଥାଏ ।

3. ମୁଖ୍ୟ ଦ୍ୱାରର ସାମଗ୍ରୀ

ବାସ୍ତୁରେ, ଯେଉଁଠି ସମ୍ଭବ, ସେଠି କାଠରେ ନିର୍ମିତ ଦ୍ୱାର ଉପରେ ଗୁରୁତ୍ୱ ପ୍ରଦାନ କରାଯାଇଛି । କାଠନିର୍ମିତ ଦ୍ୱାର ଶକ୍ତି ପ୍ରଭାବ ଉପରେ ସକାରାତ୍ମକ ପ୍ରଭାବ ପକାଇଥାଏ ବୋଲି ବିଶ୍ୱାସ ରହିଛି; ତା’ ସହିତ ଏଭଳି ଦ୍ୱାର ଘରକୁ ଏକ ଆନ୍ତରିକ ଏବଂ ସ୍ୱାଗତମୟ ପ୍ରବେଶପଥ ଯୋଗାଇଥାଏ । ତଥାପି, ଯଦି କାଠତିଆରି ଦ୍ୱାର ଲଗାଇବା ସାଧ୍ୟ ନ ହୁଏ, ତା’ ହେଲେ ଧାତୁ କିମ୍ବା ଫାଇବରଗ୍ଲାସ୍ ନିର୍ମିତ ସାମଗ୍ରୀ ମଧ୍ୟ ବ୍ୟବହାର କରାଯାଇପାରେ, କିନ୍ତୁ ଏହା ଧ୍ୟାନରେ ରଖାଯିବା ଉଚିତ ଯେ ସେଗୁଡ଼ିକ ଯେପରି ବାସ୍ତୁ ସିଦ୍ଧାନ୍ତର ଅନୁରୂପ ଅଟେ ।

4. ମୁଖ୍ୟ ଦ୍ୱାରର ରଙ୍ଗ

ବାସ୍ତୁରେ ମୁଖ୍ୟ ଦ୍ୱାରର ରଙ୍ଗର ମଧ୍ୟ ମହତ୍ତ୍ୱ ରହିଛି । ସକାରାତ୍ମକତା ଏବଂ ପ୍ରାଚୁର୍ଯ୍ୟତାକୁ ପରିପ୍ରକାଶ କରୁଥିବା ରଙ୍ଗ ବାଛନ୍ତୁ । ବାସ୍ତୁ ଅନୁସାରେ, ମୁଖ୍ୟ ଦ୍ୱାର ପାଇଁ ହଳଦିଆ, ବାଦାମୀ ଏବଂ ଧଳା ରଙ୍ଗଗୁଡ଼ିକୁ ଶୁଭ ବିକଳ୍ପ ଭାବେ ବିବେଚନା କରାଯାଏ । ଏହି ରଙ୍ଗଗୁଡ଼ିକ ସକାରାତ୍ମକ ଶକ୍ତିକୁ ଆମନ୍ତ୍ରିତ କରୁଥିବାର ବିଶ୍ୱାସ କରାଯାଏ । କଳା ରଙ୍ଗ ଭଳି ବିଷଣ୍ଣ ରଙ୍ଗଗୁଡ଼ିକୁ ଏଡ଼ାଇବା ଉଚିତ ।

5. ନାମଫଳକ

ବିଶ୍ୱାସ କରାଯାଏ ଯେ, ମୁଖ୍ୟ ଦ୍ୱାରରେ ନାମଫଳକ (ନେମପ୍ଲେଟ୍) ଲଗାଇବା ଦ୍ୱାରା ସକାରାତ୍ମକ ଶକ୍ତି ଏବଂ ସମୃଦ୍ଧି ଘର ଆଡ଼କୁ ଆକର୍ଷିତ ହୋଇଥାନ୍ତି । ଏହା ସ୍ପଷ୍ଟ ଏବଂ ଦୃଶ୍ୟମାନ ହୋଇଥିବା ଏବଂ ଘରର ସଦସ୍ୟମାନଙ୍କ ନାମକୁ ପ୍ରଦର୍ଶିତ କରୁଥିବା ଆବଶ୍ୟକ । ଏହା ଘରର ପ୍ରବେଶପଥକୁ ଏକ ବ୍ୟକ୍ତିଗତ ସ୍ପର୍ଶ ଯୋଗାଇବା ସହିତ ଘରେ ସାମଗ୍ରିକ ସକାରାତ୍ମକ ମାହୋଲ ସୃଷ୍ଟି କରିବାରେ ମଧ୍ୟ ଅବଦାନ ଯୋଗାଇଥାଏ ।

6. ପାହାଚଗୁଡ଼ିକର ସଂଖ୍ୟା

ମୁଖ୍ୟ ଦ୍ୱାର ପର୍ଯ୍ୟନ୍ତ ବାଟ କଢ଼ାଇନେଉଥିବା ପାହାଚଗୁଡ଼ିକର ସଂଖ୍ୟା ଅଯୁଗ୍ମ ହେଲେ ଆଦର୍ଶ ହୋଇଥାଏ, ଯେପରିକି 3, 5 କିମ୍ବା 7 । ବାସ୍ତୁ ସିଦ୍ଧାନ୍ତରେ ଅଯୁଗ୍ମ ସଂଖ୍ୟାଗୁଡ଼ିକୁ ସୌଭାଗ୍ୟ ଏବଂ ସକାରାତ୍ମକ ଶକ୍ତି ପ୍ରବାହ ସହିତ ସଂଶ୍ଳିଷ୍ଟ କରାଯାଇଛି । ବିଶ୍ୱାସ କରାଯାଏ ଯେ, ତାହା ବହିର୍ଭାଗରୁ ଅଭ୍ୟନ୍ତରକୁ ଏକ ସୌହାର୍ଦ୍ଦ୍ୟପୂର୍ଣ୍ଣ ରୂପାନ୍ତରଣ ସୃଷ୍ଟି କରିଥାଏ ।

7. ଦେବାଦେବୀଙ୍କ ପ୍ରତିମା

ମୁଖ୍ୟ ଦ୍ୱାର ନିକଟରେ ଦେବାଦେବୀଙ୍କ ପ୍ରତିମା କିମ୍ବା ଚିତ୍ର ରଖିବା ଏକ ସାଧାରଣ ବାସ୍ତୁ ଅଭ୍ୟାସ ଅଟେ । ପ୍ରଭୂ ଶ୍ରୀଗଣେଶଙ୍କୁ ବିଘ୍ନହର୍ତ୍ତା କୁହାଯାଏ । ତେଣୁ, ଏହି ଉଦ୍ଦେଶ୍ୟ ପାଇଁ ତାଙ୍କର ପ୍ରତିମା ବା ଛବି ଏକ ଲୋକପ୍ରିୟ ପସନ୍ଦ ଅଟେ । ପ୍ରବେଶପଥରେ ତାଙ୍କର ଉପସ୍ଥିତି ସକାରାତ୍ମକତାକୁ ଆମନ୍ତ୍ରିତ କରିବା, ବାଧାବିଘ୍ନଗୁଡ଼ିକୁ ଦୂର କରିବା ଏବଂ ଘର ମଧ୍ୟକୁ ଏକ ବାଧାହୀନ ପ୍ରବେଶକୁ ସୁନିଶ୍ଚିତ କରୁଥିବାର ବିଶ୍ୱାସ କରାଯାଏ ।

8. ଆଲୋକ

ମୁଖ୍ୟ ଦ୍ୱାରରେ ପର୍ଯ୍ୟାପ୍ତ ଆଲୋକୀକରଣର ବ୍ୟବସ୍ଥା କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ। ସୁ-ଆଲୋକିତ ପ୍ରବେଶପଥ ଘରର ସୁରକ୍ଷାକୁ ବୃଦ୍ଧି କରିବା ସହିତ ଏକ ସ୍ୱାଗତପୂର୍ଣ୍ଣ ଏବଂ ପ୍ରାଣପ୍ରାଚୂର୍ଯ୍ୟପୂର୍ଣ୍ଣ ପରିବେଶ ସୃଷ୍ଟି କରିବାରେ ସହାୟକ ହୋଇଥାଏ । ଏପରି ଦ୍ୱାରା ବାସ୍ତୁ ଅନୁକୂଳ ହୋଇଥାଏ । ଘର ପାଇଁ ପ୍ରଥମ ନଜରରେ ଏକ ସକାରାତ୍ମକ ଭାବମୂର୍ତ୍ତି ସୃଷ୍ଟି କରିବା ଏବଂ ପ୍ରବେଶପଥର ସାମଗ୍ରିକ ଶକ୍ତିକୁ ଉନ୍ନତ କରିବା ପାଇଁ ମୁଖ୍ୟ ଦ୍ୱାର ନିକଟରେ ପର୍ଯ୍ୟାପ୍ତ ଆଲୋକୀକରଣ ଜରୁରୀ ହୋଇଥାଏ ।