Share:
ಈಶಾನ್ಯ ಮೂಲೆ ಅಥವಾ ಈಶಾನ್ಯ ವಾಸ್ತು ಮೂಲೆ, ಇದು ಭಾರತದ ಪುರಾತನ ಗೃಹ ವಿನ್ಯಾಸ ಮತ್ತು ನಿರ್ಮಾಣ ಪದ್ಧತಿಯಾದ ವಾಸ್ತು ಶಾಸ್ತ್ರದ ಪ್ರಕಾರ ಬಹಳ ವಿಶೇಷ ಸ್ಥಾನವನ್ನು ಹೊಂದಿದೆ. ಈ ಮೂಲೆಯಲ್ಲಿ ಹೆಚ್ಚಿನ ಧನಾತ್ಮಕ ಶಕ್ತಿ ಇರುವುದರಿಂದ ಇದು ಮನೆಯ ಅತ್ಯುತ್ತಮ ಜಾಗವಾಗಿದೆ. ಇದು ಧ್ಯಾನ, ಪ್ರಾರ್ಥನೆ ಅಥವಾ ಯಾವುದೇ ತೆರನಾದ ಅಧ್ಯಾತ್ಮಿಕ ಚಟುವಟಿಕೆಗಳಿಗೆ ಹೇಳಿ ಮಾಡಿಸಿದ ಸ್ಥಳವಾಗಿದ್ದು, ಸಾಮನ್ಯವಾಗಿ ಇದೇ ಜಾಗದಲ್ಲಿ ಹೆಚ್ಚಿನ ಜನರು ಪೂಜಾಗೃಹವನ್ನೂ ನಿರ್ಮಿಸುತ್ತಾರೆ. ಈಶಾನ್ಯ ಮೂಲೆಗೆ ವಾಸ್ತು ಪ್ರಕಾರ ಕುಬೇರ ಮತ್ತು ಶಿವ ಇಬ್ಬರು ಅಧಿಪತಿಗಳಾಗಿದ್ದು, ಈ ದೇವತೆಗಳು ಆರೋಗ್ಯ, ಐಶ್ವರ್ಯ ಮತ್ತು ಅನೇಕ ಬಗೆಯಲ್ಲಿ ಒಳಿತನ್ನು ನೀಡುವ ಮೂಲಕ ಮನೆಯಲ್ಲಿರುವ ಎಲ್ಲರ ಜೀವನವನ್ನು ಸುಗಮಗೊಳಿಸುತ್ತಾರೆ.
ಈಶಾನ್ಯ ಮೂಲೆಯ ವಾಸ್ತುವು ಬಹಳ ಮುಖ್ಯವಾದುದು, ಏಕೆಂದರೆ ಇದು ಇದು ಅತ್ಯಂತ ಶಕ್ತಿಯುತ ಜಾಗ ಎಂದು ನಂಬಲಾಗಿದೆ. ವಾಸ್ತು ಪ್ರಕಾರ ಈ ಜಾಗವು ಧನಾತ್ಮಕ ಶಕ್ತಿಯನ್ನು ಆವಾಹಿಸಿ ನಮ್ಮ ಬದುಕಿನ ಮೇಲೆ ಪರಿಣಾಮ ಬೀರುತ್ತದೆ. ನಾವು ಈ ಮೂಲೆಯನ್ನು ಸರಿಯಾಗಿ ಇಟ್ಟುಕೊಂಡರೆ ಅದರಿಂದ ಆರೋಗ್ಯ, ಐಶ್ವರ್ಯ ಮತ್ತು ಆನಂದ ದೊರೆಯುತ್ತದೆ. ಈ ಮೂಲೆಯು ಧನಾತ್ಮಕ ಬಲಗಳೊಂದಿಗೆ ವಿಶೇಷ ನಂಟು ಹೊಂದಿದ್ದು, ನಮ್ಮ ಮನೆಯಲ್ಲಿ ಶಾಂತಿ ಮತ್ತು ನೆಮ್ಮದಿಯನ್ನು ಹೊಂದಲು ಸಹಕರಿಸುತ್ತದೆ. ಆದ್ದರಿಂದ ವಾಸ್ತು ಪ್ರಕಾರ ಈಶಾನ್ಯ ಮೂಲೆಗೆ ಗಮನ ನೀಡುವುದು ಬಹುಮುಖ್ಯ.
ಈಶಾನ್ಯ ಮೂಲೆಯಲ್ಲಿನ ಕೆಲವು ನ್ಯೂನ್ಯತೆಗಳು ಮತ್ತು ಅಪರಿಪೂರ್ಣತೆಗಳನ್ನು ವಾಸ್ತು ದೋಷ ಎನ್ನುತ್ತಾರೆ. ಭಾರತದ ಗೃಹನಿರ್ಮಾಣ ಮತ್ತು ವಿನ್ಯಾಸದ ಪುರಾತನ ವಿಜ್ಞಾನವಾದ ವಾಸ್ತುಶಾಸ್ತ್ರದ ಪ್ರಕಾರ ಈ ಮೂಲೆಯು ಅತ್ಯಂತ ಮಂಗಳಕರವಾಗಿದ್ದು, ಅಧ್ಯಾತ್ಮಿಕ ಉನ್ನತಿ, ಆರೋಗ್ಯ ಮತ್ತು ಸಮೃದ್ಧಿಗೆ ಕಾರಣವಾಗಿದೆ. ಈಶಾನ್ಯ ಮೂಲೆಯನ್ನು ಸರಿಯಾಗಿ ಯೋಜಿಸಿ ವಿನ್ಯಾಸಗೊಳಿಸದಿದ್ದಲ್ಲಿ ಅದು ವಾಸ್ತುದೋಷಕ್ಕೆ ಕಾರಣವಾಗಬಹುದು. ಈ ದೋಷಗಳು ಮನೆಮಂದಿಯ ಜೇವನದ ಮೇಲೆ ಅನೇಕ ದುಷ್ಪರಿಣಾಮಗಳನ್ನು ಬೀರಬಹುದು, ಅವುಗಳೆಂದರೆ:
ವಾಸ್ತುವಿನ ಈಶಾನ್ಯ ಮೂಲೆಯ ದೋಷಗಳು ಕೆಲವೊಂದು ದೀರ್ಘಕಾಲದ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು,ಇದರಿಂದಾಗಿ ದೈಹಿಕ ಮತ್ತು ಮಾನಸಿಕ ನೆಮ್ಮದಿ ಹಾಳಾಗುತ್ತದೆ.
ಈಶಾನ್ಯ ಮೂಲೆಯು ಐಶ್ವರ್ಯಕ್ಕೆ ಸಂಬಂಧಿಸಿರುವುದರಿಂದ (ಕುಬೇರನ ಕಾರಣದಿಂದ), ದೋಷಗಳಿಂದಾಗಿ ಆರ್ಥಿಕ ಅಸ್ಥಿರತೆ, ಸಂಪತ್ತಿನ ನಷ್ಟ, ಮತ್ತು ಆರ್ಥಿಕವಾಗಿ ಹೊಸ ಅವಕಾಶಗಳನ್ನು ಪಡೆಯುವುದು ಕಠಿಣವಾಗಬಹುದು.
ವ್ಯಕ್ತಿಯ ವೃತ್ತಿ ಜೀವನದಲ್ಲಿ ಏಳಿಗೆ ಆಗದಿರುವುದು, ಕೆಲಸದಲ್ಲಿ ಅಸಂತೃಪ್ತಿ ಮತ್ತು ಅವಕಾಶಗಳ ಕೈಜಾರುವಿಕೆ ಮೊದಲಾದ ಎಡರು ತೊಡರುಗಳು ಉಂಟಾಗಬಹುದು.
ಈಶಾನ್ಯ ವಲಯವು ಪಾಂಡಿತ್ಯ ಮತ್ತು ಜ್ಞಾನದೊಂದಿಗೂ ತಳುಕು ಹಾಕಿಕೊಂಡಿದೆ. ಈ ಭಾಗದಲ್ಲಿನ ವಾಸ್ತುದೋಷಗಳು ಅಧ್ಯಯನದಲ್ಲಿ ಕಷ್ಟ, ಏಕಾಗ್ರತೆಯ ಕೊರತೆ, ಮತ್ತು ವಿದ್ಯಾಭ್ಯಾಸದಲ್ಲಿ ಕಳಪೆ ಸಾಧನೆಗೆ ಕಾರಣವಾಗಬಹುದು.
ಋಣಾತ್ಮಕ ಪರಿಣಾಮಗಳು ವೈಯಕ್ತಿಕ ಸಂಬಂಧಗಳ ಮೇಲೂ ಆಗಬಹುದು, ಇದರಿಂದಾಗಿ ಕುಟುಂಬಸ್ಥರೊಂದಿಗೆ ಅಥವಾ ಸಂಗಾತಿಯೊಂದಿಗೆ ಪರಸ್ಪರ ತಪ್ಪು ತಿಳುವಳಿಕೆಗಳು, ಜಗಳಗಳು ಮತ್ತು ವೈಮನಸ್ಸು ಉಂಟಾಗಬಹುದು.
ಈಶಾನ್ಯ ಮೂಲೆಯ ವಾಸ್ತುದೋಷಗಳನ್ನು ಪತ್ತೆ ಹಚ್ಚಿ ಈ ಕೆಳಗಿನ ಪರಿಹಾರೋಪಾಯಗಳಿಂದ ಅವುಗಳನ್ನು ಸರಿಪಡಿಸಿದರೆ ಮನೆಯಲ್ಲಿ ಧನಾತ್ಮಕ ಶಕ್ತಿ ಮತ್ತು ಸಮತೋಲನವು ಮರಳುತ್ತದೆ.
ಈಶಾನ್ಯ ಮೂಲೆಯು ಸ್ವಚ್ಛ ಮತ್ತು ವ್ಯವಸ್ಥಿತವಾಗಿರಬೇಕು. ಈ ಜಾಗದಲ್ಲಿ ಸಹಜ ಬೆಳಕು ಅಥವಾ ದೀಪದಿಂದ ಉತ್ತಮ ಬೆಳಕಿನ ವ್ಯವಸ್ಥೆ ಇರಲೇಬೇಕು.
ಈ ಮೂಲೆಯಲ್ಲಿ ಧೂಪ ಅಥವಾ ಅಗರಬತ್ತಿಯನ್ನು ಹಚ್ಚುವುದರಿಂದ ಪ್ರಶಾಂತ ಮತ್ತು ಧನಾತ್ಮಕ ಶಕ್ತಿಯ ವಾತಾವರಣ ಸೃಷ್ಟಿಯಾಗುತ್ತದೆ.
ಈ ಮೂಲೆಯ ಬಳಿ ವಾಸ್ತು ಪಿರಮಿಡ್‍ಗಳನ್ನು ಇಡುವುದರಿಂದ ವಾಸ್ತು ಅಸಮತೋಲನವನ್ನು ಸರಿಪಡಿಸಲು ಸಹಾಯವಾಗುತ್ತದೆ.
ಈಶಾನ್ಯ ಮೂಲೆಯು ಛೇದಿತವಾಗಿದ್ದರೆ ಅಥವಾ ಮರೆಯಾಗಿದ್ದರೆ ಆ ಭಾಗದ ಗೋಡೆಯಲ್ಲಿ ಕನ್ನಡಿಯನ್ನು ಇಡುವುದರಿಂದ ಮರೆಯಾದ ಜಾಗವು ಸಾಂಕೇತಿಕವಾಗಿ ಪರಿಪೂರ್ಣವಾಗುತ್ತದೆ.
ನಿಮ್ಮ ಮಲಗುವ ಕೋಣೆಯು ಈಶಾನ್ಯ ದಿಕ್ಕಿನಲ್ಲಿದ್ದರೆ, ಮಂಚವನ್ನು ಕೋಣೆಯ ನೈಋತ್ಯ ಭಾಗದಲ್ಲಿರಿಸಿ ಮತ್ತು ಉತ್ತರಕ್ಕೆ ತಲೆ ಹಾಕಿ ಮಲಗಬೇಡಿ.
ಈಶಾನ್ಯದಲ್ಲಿ ವಾಸ್ತು ಯಂತ್ರವನ್ನು ಇರಿಸುವುದರಿಂದ ಸಹ ಋಣಾತ್ಮಕ ಶಕ್ತಿಗಳನ್ನು ದೂರವಿಡಬಹುದು.
ವಾಸ್ತು ಶಾಸ್ತ್ರದ ಪ್ರಕಾರ ಈಶಾನ್ಯ ಮೂಲೆಯ ಪ್ರಯೋಜನವನ್ನು ಪಡೆಯಲು ಮತ್ತು ಧನಾತ್ಮಕ ಶಕ್ತಿಯ ಹರಿವಿಗಾಗಿ ನೀವು ಮಾಡಬೇಕಾದ ಮತ್ತು ಮಾಡಬಾರದ ಕೆಲಸಗಳು ಇಂತಿವೆ:
ಈಶಾನ್ಯ ಮೂಲೆಯಲ್ಲಿ ಸ್ವಚ್ಛತೆಯು ಬಹುಮುಖ್ಯ. ಈ ಜಾಗವು ಪವಿತ್ರವೆಂದು ಪರಿಗಣಿಸಲ್ಪಟ್ಟಿದ್ದು ಧನಾತ್ಮಕ ಶಕ್ತಿಯ ಸುಗಮ ಹರಿವಿಗಾಗಿ ಕಸ ಮತ್ತು ಅವ್ಯವಸ್ಥೆಯಿಂದ ಮುಕ್ತವಾಗಿರಬೇಕು.
ಈ ಮೂಲೆಯು ಭಾರೀ ಪೀಠೋಪಕರಣಗಳು ಅಥವಾ ಅಸ್ತವ್ಯಸ್ತ ಸರಂಜಾಮುಗಳಿಂದ ಮುಚ್ಚಿ ಹೋಗದಂತೆ ನೋಡಿಕೊಳ್ಳಿ. ಈಶಾನ್ಯ ಮೂಲೆಯಲ್ಲಿ ತೆರೆದ ಜಾಗವು ಧನಾತ್ಮಕ ವಾತಾವರಣವನ್ನು ಆಹ್ವಾನಿಸುತ್ತದೆ ಮತ್ತು ಮನಸ್ಸಿನ ಸ್ಪಷ್ಟತೆಗೆ ನೆರವಾಗುತ್ತದೆ.
ಈಶಾನ್ಯವು ನೀರಿನ ವಸ್ತುಗಳೊಂದಿಗೆ ತಳುಕು ಹಾಕಿಕೊಂಡಿದೆ ನೀರಿನ ಕಾರಂಜಿಯನ್ನೋ ಅಥವಾ ಒಂದು ಅಕ್ವೇರಿಯಂನ್ನೋ ಇರಿಸುವುದರಿಂದ ಅದೃಷ್ಟದೊಂದಿಗೆ ಧನಾತ್ಮಕ ಶಕ್ತಿಯೂ ವೃದ್ಧಿಯಾಗುತ್ತದೆ.
ಈ ಜಾಗವು ಸೂರ್ಯನ ಬೆಳಕು ಅಥವಾ ಕೃತಕ ಬೆಳಕಿನಿಂದ ಸದಾ ಚೆನ್ನಾಗಿ ಬೆಳಗುತ್ತಿರಬೇಕು. ಈಶಾನ್ಯದಲ್ಲಿನ ಪ್ರಕಾಶವು ಅಜ್ಞಾನದ ನಿವಾರಣೆ ಮತ್ತು ಜ್ಞಾನದ ವೃದ್ಧಿಯನ್ನು ಸೂಚಿಸುತ್ತದೆ.
ಈಶಾನ್ಯ ಮೂಲೆಯು ಪ್ರಾರ್ಥನಾ ಕೋಣೆ ಅಥವಾ ಧ್ಯಾನದ ಸ್ಥಳಕ್ಕೆ ಹೇಳಿ ಮಾಡಿಸಿದಂತಿದೆ. ಇದರ ನೆಮ್ಮದಿಯ ವಾತಾವರಣವು ಅಧ್ಯಾತ್ಮಿಕ ಉನ್ನತಿ ಮತ್ತು ಶಾಂತಿಯನ್ನು ಹೆಚ್ಚಿಸುತ್ತದೆ.
ಈಶಾನ್ಯದಲ್ಲಿರುವ ಶೌಚಾಲಯವು ಅಲ್ಲಿನ ಪವಿತ್ರತೆಯನ್ನು ಹಾಳುಗೆಡವುತ್ತದೆ, ಆ ಮೂಲಕ ಋಣಾತ್ಮಕ ಶಕ್ತಿಗಳು ಮತ್ತು ಅನಾರೋಗ್ಯಕ್ಕೆ ಆಹ್ವಾನ ನೀಡಿದಂತಾಗುತ್ತದೆ.
ಭಾರವಾದ ಪೀಠೋಪಕರಣಗಳು ಅಥವಾ ಯಂತ್ರಗಳು ಈ ಮೂಲೆಯ ಶಕ್ತಿಯನ್ನು ಕುಂಠಿತಗೊಳಿಸಿ ಆರ್ಥಿಕ ಮತ್ತು ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗುತ್ತವೆ.
ಇಲ್ಲಿ ಕಸ ತುಂಬಿಡುವುದರಿಂದ ಅಥವಾ ಅನುಪಯುಕ್ತ ವಸ್ತುಗಳನ್ನು ಅಸ್ತವ್ಯಸ್ತವಾಗಿ ಎಸೆಯುವುದರಿಂದ ಧನಾತ್ಮಕ ಶಕ್ತಿಯು ಮನೆಯನ್ನು ಪ್ರವೇಶಿಸಲು ತಡೆಯುಂಟಾಗಿ ಬದುಕು ನಿಂತ ನೀರಂತಾಗಬಹುದು.
ಈಶಾನ್ಯ ಮೂಲೆಯಲ್ಲಿ ಮೆಟ್ಟಿಲುಗಳನ್ನು ಇಡುವುದರಿಂದ ಧನಾತ್ಮಕ ಶಕ್ತಿಯ ಹರಿವಿಗೆ ತೊಂದರೆಯಾಗಿ ಒತ್ತಡ ಮತ್ತು ಅನಾರೋಗ್ಯ ಉಂಟಾಗಬಹುದು.
ಗಾಢಬಣ್ಣಗಳು ಮನೆಗೆ ಅಗತ್ಯವಿದ್ದ ಧನಾತ್ಮಕ ಶಕ್ತಿಯನ್ನು ತಾವು ಹೀರಿಕೊಳ್ಳಬಹುದು. ಈ ಜಾಗವು ಧನಾತ್ಮಕ ವಾತಾವರಣವನ್ನು ಹೊಂದಲು ತಿಳಿ ಬಣ್ಣಗಳ ಆಯ್ಕೆ ಸೂಕ್ತ.
ಒಟ್ಟಾರೆಯಾಗಿ, ಈಶಾನ್ಯ ಮೂಲೆಯ ವಾಸ್ತು ದೋಷಗಳನ್ನು ಸರಿಪಡಿಸುವುದರಿಂದ ನಿಮ್ಮ ಮನೆಯ ನೆಮ್ಮದಿ ಮತ್ತು ಶಕ್ತಿಯ ಹರಿವು ಗಣನೀಯವಾಗಿ ಬದಲಾಗುತ್ತದೆ. ಸುಲಭ ಉಪಾಯಗಳಾದ, ಸ್ವಚ್ಛತೆಯ ನಿರ್ವಹಣೆ, ವಸ್ತುಗಳನ್ನು ಸೂಕ್ತ ಜಾಗದಲ್ಲಿಡುವುದು, ಋಣಾತ್ಮಕತೆಯನ್ನು ತಡೆಯುವುದು ಇತ್ಯಾದಿಗಳು ಈ ಪವಿತ್ರ ಜಾಗವನ್ನು ಪೂರ್ಣವಾಗಿ ರೂಪಾಂತರಿಸಬಹುದು. ಈ ಬದಲಾವಣೆಗಳ ಅಳವಡಿಕೆಯಿಂದ ನೀವಿರುವ ಜಾಗದಲ್ಲಿ ಸಮೃದ್ಧಿ, ಶಾಂತಿ ಮತ್ತು ಧನಾತ್ಮಕತೆಯನ್ನು ಕಾಣಬಹುದು.
