Share:
ಕಮಾನು ಎಂದರೆ ನಿರ್ಮಾಣದಲ್ಲಿ ಬಳಸುವ ಒಂದು ಬಾಗಿದ ರಚನೆಯಾಗಿದ್ದು, ಅದರ ಬಲ ಮತ್ತು ಸ್ಥಿರತೆಗೆ ಹೆಸರಾಗಿದೆ. ಇದು ವಕ್ರಾಕಾರವನ್ನು ಹೊಂದಿದ್ದು, ಇದರ ಮೇಲೆ ಹೆಚ್ಚಿನ ಭಾರವನ್ನು ಸಮರ್ಥವಾಗಿ ಹೊರಬಲ್ಲುದಾಗಿದೆ. ಕಮಾನುಗಳು ಶತಮಾನಗಳಿಂದಲೂ ಬಳಕೆಯಲ್ಲಿದ್ದು, ರೋಮನ್ನರ ನೀರಿನ ಕಾಲುವೆಗಳಿಂದ ಹಿಡಿದು ಆಧುನಿಕ ಸೇತುವೆ ಮತ್ತು ಕಟ್ಟಡಗಳವರೆಗೂ ಬಳಕೆಯಲ್ಲಿದೆ. ಇವುಗಳ ಬಹುಮುಖತ್ವವು ವಾಸ್ತುಶಿಲ್ಪಿಗಳಿಗೆ ನಯನ ಮನೋಹರ ವಿನ್ಯಾಸಗಳನ್ನು ನಿರ್ಮಿಸಲು ಅನುವು ಮಾಡಿಕೊಟ್ಟಿದೆ. ಕಮಾನುಗಳ ಮೂಲಭೂತ ಅಂಶಗಳನ್ನು ಅರ್ಥೈಸಿಕೊಳ್ಳುವುದು ನಿರ್ಮಾಣದಲ್ಲಿ ಅವುಗಳ ವಿವಿಧ ಪಾತ್ರಗಳನ್ನು ಅರಿತುಕೊಳ್ಳಲು ಅತ್ಯಗತ್ಯ.
ನಿರ್ಮಾಣ ಮತ್ತು ವಿನ್ಯಾಸದ ವಿಷಯಕ್ಕೆ ಬಂದರೆ, ಯಾವ ಬಗೆಯ ಕಮಾನನ್ನು ಬಳಸುತ್ತೇವೆ ಎಂಬುದು ಕಟ್ಟಡದ ಸೌಂದರ್ಯ ಮತ್ತು ಸಮಗ್ರತೆಯನ್ನು ಗಣನೀಯವಾಗಿ ಪ್ರಭಾವಿಸುತ್ತದೆ. ಶತಮಾನಗಳಿಂದ ಅನೇಕ ಬಗೆಯ ಕಮಾನುಗಳು ಬಳಕೆಯಲ್ಲಿದ್ದು, ಪ್ರತಿಯೊಂದೂ ವಿಭಿನ್ನ ಉದ್ದೇಶಗಳಿಗೆ ಬಳಕೆಯಾಗಿವೆ. ಭಾರವನ್ನು ತಡೆಯುವುದರಿಂದ ಹಿಡಿದು ಸೌಂದರ್ಯವರ್ಧನೆಯವರೆಗೆ ಕಮಾನುಗಳು ನಿರ್ಣಾಯಕ ಪಾತ್ರವನ್ನು ವಹಿಸಿವೆ. ಕಟ್ಟಡ ನಿರ್ಮಾಣದಲ್ಲಿ ಬಳಕೆಯಾಗುವ ವಿವಿಧ ಬಗೆಯ ಕಮಾನುಗಳ ಕುರಿತು ಬೆಳಕು ಚೆಲ್ಲುವ ಮೂಲಕ ಅವುಗಳ ಅಂದ ಮತ್ತು ಕಾರ್ಯನಿರ್ವಹಣೆಯ ಬಗ್ಗೆ ಆಸಕ್ತಿ ಇರುವ ಪ್ರತಿಯೊಬ್ಬರೂ ಅದನ್ನು ಅರಿತುಕೊಳ್ಳಲು ಈ ಲೇಖನ ನೆರವಾಗುತ್ತದೆ.
ವೃತ್ತ ಕಮಾನು ಅಥವಾ ರೋಮನ್ ಕಮಾನು ವಾಸ್ತುಶಿಲ್ಪದಲ್ಲಿ ಹೆಚ್ಚಿನ ಮಾನ್ಯತೆ ಹೊಂದಿರುವ ಕಮಾನುಗಳ ಪೈಕಿ ಒಂದಾಗಿದೆ. ಇದರ ಅರ್ಧ ವೃತ್ತಾಕಾರವು ಶತಮಾನಗಳಿಂದ ನಿರ್ಮಾಣದಲ್ಲಿ ಪ್ರಧಾನವಾಗಿದ್ದು, ಬಲ ಮತ್ತು ಸ್ಥಿರತೆಗೆ ಹೆಸರಾಗಿದೆ. ಈ ಬಗೆಯ ಕಮಾನನ್ನು ಹಳೆಯ ನೀರಿನ ಕಾಲುವೆಗಳು ಮತ್ತು ಸೇತುವೆಗಳಲ್ಲಿ ಕಾಣಬಹುದಾಗಿದ್ದು, ಇದರ ಬಾಳಿಕೆ ಮತ್ತು ಕಾಲಾತೀತ ಸೆಳೆತಕ್ಕೆ ಸಾಕ್ಷಿಯಾಗಿದೆ.
ಗೋಥಿಕ್ ವಾಸ್ತುಶಿಲ್ಪದಲ್ಲಿ ಮೊನಚಾದ ಕಮಾನುಗಳು ಪ್ರಮುಖವಾಗಿದ್ದು, ಅವುಗಳ ಮೊನಚಾದ ತುದಿಯಿಂದ ಸುಲಭವಾಗಿ ಗುರುತಿಸಬಹುದಾಗಿದೆ. ಈ ಬಗೆಯ ಕಮಾನುಗಳು ಕೊಟೆಗಳು ಮತ್ತು ಚರ್ಚುಗಳು ನೋಡಲು ಬೆರಗು ಹುಟ್ಟಿಸುವಂತೆ ಕಾಣುವಲ್ಲಿ ಪ್ರಮುಖ ಪಾತ್ರವಹಿಸಿದ್ದು, ನಿರ್ಮಾಣಕಾರರಿಗೆ ಎತ್ತರದ ಗೋಡೆಗಳು ಮತ್ತು ಬೃಹತ್ ಕಿಟಕಿಗಳನ್ನು ನಿರ್ಮಿಸಲು ಅನುವು ಮಾಡಿಕೊಟ್ಟಿವೆ. ಮೊನಚು ಕಮಾನುಗಳು ಭಾರ ಹಂಚಿಕೆಯನ್ನು ಹೆಚ್ಚು ಸಮರ್ಥವಾಗಿ ನಿರ್ವಹಿಸುವುದರಿಂದ ಭಾರೀ ಗಾತ್ರದ ಕಟ್ಟಡಗಳಿಗೆ ಸೂಕ್ತ ಆಯ್ಕೆಯಾಗಿದೆ.
ಸೆಗ್ಮೆಂಟಲ್ ಕಮಾನು ವೃತ್ತಾಕಾರದ ಕಮಾನಿನ ರೀತಿಯೇ ಇದೆ, ಆದರೆ ಹೆಚ್ಚು ಆಳವಾದ ಕಂಸವನ್ನು(ಕರ್ವ್) ಹೊಂದಿದೆ. ಇದೊಂದು ಬಹುಮುಖಿ ಕಮಾನಾಗಿದ್ದು ಸೇತುವೆಗಳು ಮತ್ತು ಸಣ್ಣ ಕಟ್ಟಡಗಳಲ್ಲಿ ಕಾಣಬಹುದಾಗಿದೆ. ಈ ಬಗೆಯ ಕಮಾನು ನಿರ್ಮಾಣಕ್ಕೆ ಕಡಿಮೆ ಎತ್ತರ ಸಾಕಾಗುವುದರಿಂದ ಮನೆಗಳು ಮತ್ತು ಎತ್ತರದ ಮಿತಿ ಇರುವ ಇತರೆ ಸಣ್ಣ ಜಾಗಗಳಿಗೆ ಹೆಚ್ಚು ಸೂಕ್ತವಾಗಿದೆ.
ಕುದುರೆಲಾಳಾಕೃತಿ (ಹಾರ್ಸ್‍ಶೂ) ಕಮಾನಿನಲ್ಲಿ ಅರ್ಧವೃತ್ತದಾಚೆಗೂ ಕಂಸವು ವಿಸ್ತರಿಸಲ್ಪಟ್ಟಿರುತ್ತದೆ. ಇದು ಇಸ್ಲಾಮಿಕ್ ವಾಸ್ತುಶಿಲ್ಪದಲ್ಲಿ ಪ್ರಧಾನವಾದುದು. ಇದು ಮಸೀದಿಗಳು ಮತ್ತು ಇತರೆ ಕಟ್ಟಡಗಳ ಅಲಂಕಾರಿಕ ಮತ್ತು ಸಾಂಸ್ಕೃತಿಕ ಗುಣವನ್ನು ವರ್ಧಿಸುವುದರಿಂದ ವಾಸ್ತುಶಿಲ್ಪದ ಇತಿಹಾಸದಲ್ಲಿ ತನ್ನ ಛಾಪನ್ನು ಮೂಡಿಸಿದೆ. ಇದರ ಸೌಂದರ್ಯವು ಇದರ ಕಾರ್ಯಕ್ಕೆ ಪೂರಕವಾಗಿದೆ ಮತ್ತು ಸಾಮಾನ್ಯವಾಗಿ ಇದು ಪ್ರವೇಶದ್ವಾರ ಮತ್ತು ಕಿಟಕಿಗಳಲ್ಲಿ ಬಳಕೆಯಾಗುತ್ತದೆ.
ಓಜೀ ಕಮಾನಿನಲ್ಲಿ ಎರಡು ಕಂಸದ ಆಕಾರಗಳಿದ್ದು, ಎರಡೂ ಕಂಸಗಳು S ಆಕಾರದಲ್ಲಿರುತ್ತವೆ ಮತ್ತು ಒಂದು ಇನ್ನೊಂದರ ಪ್ರತಿಬಿಂಬವಾಗಿರುತ್ತದೆ. ಇದರ ಸೊಬಗು ಮತ್ತು ಸಂಕೀರ್ಣತೆ ಇದನ್ನು ಆಂಗ್ಲೋ ಗೋಥಿಕ್ ಮತ್ತು ಪುನರುಜ್ಜೀವಿತ ಗೋಥಿಕ್ ವಾಸ್ತುಶಿಲ್ಪದಲ್ಲಿ ಹೆಸರುವಾಸಿಯಾಗಿಸಿದೆ. ನೋಡಲು ಸುಂದರವಾಗಿರುವುದು ಮಾತ್ರವಲ್ಲದೆ ಭಾರ ತಡೆಯುವ ಸಾಮರ್ಥ್ಯವನ್ನೂ ಸಹ ಓಜೀ ಕಮಾನಿನ ವಿನ್ಯಾಸ ಹೊಂದಿದೆ.
ರಿಲೀವಿಂಗ್ ಕಮಾನು ಒಂದು ಅವಶ್ಯಕ ಆದರೆ ಬಹುತೇಕ ಕಡೆಗಣಿಸಲ್ಪಟ್ಟ ಕಮಾನಾಗಿದೆ. ಸಾಮಾನ್ಯವಾಗಿ ಲಿಂಟೆಲ್ ಅಥವಾ ಕೆಳಗಿನ ಕಮಾನಿನ ಮೇಲಿನ ಭಾರವನ್ನು ಕಡಿಮೆ ಮಾಡಲು ಬಳಸುವ ರಿಲೀವಿಂಗ್ ಕಮಾನುಗಳು ಒಂದು ಬಗೆಯ ಜಾಣ್ಮೆಯ ಇಂಜಿನಿಯರಿಂಗ್ ಉಪಾಯಗಳಾಗಿವೆ. ವಿಶೇಷವಾಗಿ ಪುರಾತನ ಮತ್ತು ಐತಿಹಾಸಿಕ ಕಟ್ಟಡಗಳಲ್ಲಿ ಅಕ್ಕಪಕ್ಕದ ಗೋಡೆಗಳ ಮೇಲೆ ಭಾರಹಂಚಿಕೆ ಮಾಡುವುದು ಒತ್ತಡ ನಿರ್ವಹಣೆಗೆ ಸಹಾಯ ಮಾಡುತ್ತದೆ. ಈ ಬಗೆಯ ಕಮಾನುಗಳನ್ನು ಸಾಮಾನ್ಯವಾಗಿ ಮನೆಗಳು ಮತ್ತು ಇತರ ಕಟ್ಟಡಗಳಲ್ಲಿ ಅವುಗಳ ದೀರ್ಘಬಾಳಿಕೆ ಮತ್ತು ಸ್ಥಿರತೆಯ ಕಾರಣಕ್ಕೆ ಬಳಸಲಾಗುತ್ತದೆ.
ಸಾಮಾನ್ಯವಾಗಿ ಇತರ ಬಗೆಯ ಕಮಾನುಗಳಲ್ಲಿ ಕಂಸಗಳಿದ್ದರೆ ತ್ರಿಕೋನ ಕಮಾನು ಅದರ ನೇರ ಗೆರೆಗಳು ಮತ್ತು ಚೂಪಾದ ಕೋನಾಕಾರದಿಂದ ಭಿನ್ನವಾಗಿ ನಿಲ್ಲುತ್ತದೆ. ಈ ಬಗೆಯ ಕಮಾನು ಬಹಳ ಹಳೆಯ ಮಾದರಿಯಾಗಿದ್ದು, ಮೆಸಪೊಟೇಮಿಯನ್ ನಾಗರೀಕತೆಯಲ್ಲಿ ಇದರ ಬಳಕೆಯ ಬಗ್ಗೆ ಸಾಕ್ಷ್ಯಗಳಿವೆ. ಇದರ ಸರಳ ಆಕಾರವು ಇದನ್ನು ವಿಭಿನ್ನವಾಗಿ,ನಯನ ಮನೋಹರವಾಗಿ ಮಾಡಿರುವುದಲ್ಲದೆ, ಕಟ್ಟಡಕ್ಕೆ ಸಾಕಷ್ಟು ಆಧಾರವನ್ನೂ ನೀಡುವುದರಿಂದ ಪುರಾತನ ಮತ್ತು ಆಧುನಿಕ ವಾಸ್ತುವಿನ್ಯಾಸದಲ್ಲಿ ಪ್ರಸ್ತುತವಾಗಿದೆ. ತ್ರಿಕೋನ ಕಮಾನುಗಳ ನಿರ್ಮಾಣ ವಿಧಾನವು ಸರಳವಾಗಿರುವುದರಿಂದ ಸಾಮಾನ್ಯವಾಗಿ ಸಮಕಾಲೀನ ವಾಸ್ತುಶಿಲ್ಪದಲ್ಲಿ ಇದರ ಬಳಕೆಯಿದೆ.
ಕಮಾನುಗಳ ವರ್ಗೀಕರಣದಲ್ಲಿ ಅನೇಕ ಅಂಶಗಳು ಪಾತ್ರವಹಿಸುತ್ತವೆ. ಕಮಾನುಗಳ ವರ್ಗೀಕರಣದ ಬಗ್ಗೆ ತಿಳಿದುಕೊಳ್ಳೋಣ:
ಕಮಾನುಗಳನ್ನು ಅವುಗಳ ಸೌಂದರ್ಯ ಮತ್ತು ಗುಣಗಳನ್ನು ನಿರ್ಧರಿಸುವ ಅಂಶವಾದ ಆಕಾರದ ಆಧಾರದಲ್ಲಿ ವರ್ಗೀಕರಿಸಬಹುದು. ಸಾಮಾನ್ಯ ಆಕಾರಗಳೆಂದರೆ ಅರ್ಧವೃತ್ತಾಕೃತಿಯ ಸಾಂಪ್ರದಾಯಿಕ ರೋಮನ್ ಕಮಾನು ಮತ್ತು ಚೂಪಾದ ಶಿಖರವನ್ನು ಹೊಂದಿರುವ ಮೊನಚು ಗೋಥಿಕ್ ಕಮಾನು. ಇತರ ಆಕಾರಗಳೆಂದರೆ ಒಂದಕ್ಕೊಂದು ಹೊಂದಿಕೊಂಡಿರುವ ಅರ್ಧವೃತ್ತಗಳನ್ನು ಹೋಲುವ ಬ್ಯಾರೆಲ್ ಕಮಾನು ಮತ್ತು ಪ್ಯಾರಾಬೊಲ ಆಕಾರವನ್ನು ಹೋಲುವ ಪ್ಯಾರಾಬೋಲಿಕ್ ಕಮಾನು. ಪ್ರತಿಯೊಂದು ಆಕಾರವೂ ತನ್ನದೇ ಆದ ನಿರ್ದಿಷ್ಟ ಉಪಯೋಗವನ್ನು ಹೊಂದಿದೆ ಮತ್ತು ಸೌಂದರ್ಯ ಹಾಗು ಅನುಕೂಲತೆಗಳ ಸಮಾಗಮವಾಗಿರುತ್ತವೆ.
ಕಮಾನುಗಳನ್ನು ವರ್ಗೀಕರಿಸುವ ಇನ್ನೊಂದು ವಿಧಾನವೆಂದರೆ ಅವುಗಳ ನಿರ್ಮಾಣದಲ್ಲಿ ಬಳಸುವ ನಿರ್ಮಾಣ ಸಾಮಗ್ರಿಗಳ ಅಧಾರದ ಮೇಲೆ. ಸಾಂಪ್ರದಾಯಿಕ ನಿರ್ಮಾಣ ವಸ್ತುಗಳಾದ ಕಲ್ಲು, ಇಟ್ಟಿಗೆ ಮತ್ತು ಕಾಂಕ್ರೀಟ್‍ಗಳನ್ನು ದೀರ್ಘಬಾಳಿಕೆ ಮತ್ತು ಬಲಕ್ಕಾಗಿ ಉಪಯೋಗಿಸಲಾಗುತ್ತದೆ. ಆಧುನಿಕ ಕಮಾನುಗಳಲ್ಲಿ ಉಕ್ಕು ಅಥವಾ ರೀಇನ್ಫೋರ್ಸಡ್ ಕಾಂಕ್ರೀಟನ್ನು ಸಹ ಸ್ಥಿರತೆ ಮತ್ತು ಬೇಕಾದ ಆಕಾರಗಳನ್ನು ರೂಪಿಸಲು ಬಳಸಲಾಗುತ್ತದೆ. ನಿರ್ಮಾಣ ಸಾಮಗ್ರಿಗಳ ಆಯ್ಕೆ ಬಜೆಟ್, ವಾಸ್ತುವಿನ್ಯಾಸ ಮತ್ತು ಪರಿಸರಕ್ಕೆ ತಕ್ಕಂತೆ ನಿರ್ಧಾರವಾಗುತ್ತದೆ.
ನಿರ್ಮಾಣ ವಿಧಾನವು ಸಹ ಕಮಾನುಗಳ ವರ್ಗೀಕರಣದಲ್ಲಿ ಮುಖ್ಯ ಪಾತ್ರವಹಿಸುತ್ತದೆ. ನುರಿತ ಕುಶಲಕರ್ಮಿಗಳ ಸೂಕ್ಷ್ಮ ಕರಕುಶಲತೆಯಿಂದ ನಿರ್ಮಾಣವಾದ ಕಮಾನುಗಳು ಕಲೆಗಾರಿಕೆಯನ್ನು ಮತ್ತು ಸೂಕ್ಷ್ಮ ವಿವರಗಳನ್ನೂ ಹೊಂದಿರುವುದರಿಂದ ನೋಡಲು ಸುಂದರವಾಗಿರುತ್ತವೆ. ಆಧುನಿಕ ತಯಾರಿಕಾ ತಂತ್ರಗಳನ್ನು ಬಳಸಿ ಯಂತ್ರಗಳಿಂದ ನಿರ್ಮಿಸಲ್ಪಟ್ಟ ಕಮಾನುಗಳು ನಿಖರತೆ ಮತ್ತು ಸಾಮರ್ಥ್ಯಕ್ಕೆ ಆದ್ಯತೆ ಕೊಡುತ್ತವೆ. ಎರಡು ಬಗೆಯ ಕೆಲಸಗಾರಿಕೆಗಳು ತಮ್ಮದೇ ಆದ ಅನುಕೂಲ ಮತ್ತು ಅನಾನುಕೂಲವನ್ನು ಹೊಂದಿದ್ದು ಯೋಜನೆಯ ಅಗತ್ಯ ಮತ್ತು ಹಣಕಾಸಿನ ಮಿತಿಯ ಆಧಾರದಲ್ಲಿ ಆಯ್ಕೆ ಮಾಡಿಕೊಳ್ಳಬಹುದು.
ಕಮಾನುಗಳನ್ನು ಅವುಗಳ ಕೇಂದ್ರಬಿಂದುಗಳ ಸಂಖ್ಯೆಯ ಆಧಾರದಲ್ಲಿ ಸಹ ವರ್ಗೀಕರಿಸಬಹುದು. ಸಾಂಪ್ರದಾಯಿಕ ರೋಮನ್ ಕಮಾನಿನ ರೀತಿ ಏಕಕೇಂದ್ರ ಕಮಾನುಗಳು ಒಂದೇ ಕೇಂದ್ರಬಿಂದುವನ್ನು ಹೊಂದಿದ್ದು ಅಲ್ಲಿಂದಲೇ ಕಂಸವು ಆರಂಭವಾಗುತ್ತದೆ. ಅಂಡಾಕಾರದ ಕಮಾನಿನ ರೀತಿ ಎರಡು ಕೇಂದ್ರದ ಕಮಾನುಗಳು ಎರಡು ಬಿಂದುಗಳನ್ನು ಹೊಂದಿದ್ದು ವಿಶಾಲ ಮತ್ತು ಹೆಚ್ಚು ಸಮತಟ್ಟಾದ ಕಂಸವನ್ನು ನಿರ್ಮಿಸುತ್ತವೆ. ಅನೇಕ-ಕೇಂದ್ರ ಕಮಾನುಗಳು, ಉದಾಹರಣೆಗೆ ಓಜೀ ಕಮಾನು, ಅನೇಕ ಕೇಂದ್ರಬಿಂದುಗಳಿಂದ ಉಂಟಾದ ಹೆಚ್ಚು ಸಂಕೀರ್ಣ ಕಂಸಗಳನ್ನು ಒಳಗೊಂಡಿರುತ್ತವೆ. ಕೇಂದ್ರಬಿಂದುಗಳ ಸಂಖ್ಯೆಗಳು ಕಮಾನಿನ ಒಟ್ಟಾರೆ ಆಕಾರ ಮತ್ತು ರಚನೆಯ ಸ್ಥಿರತೆಯ ಮೇಲೆ ಪ್ರಭಾವ ಬೀರುತ್ತವೆ.
ನಿರ್ಮಾಣದ ಸಮಯದಲ್ಲಿ ಸರಿಯಾದ ಬಗೆಯ ಕಮಾನಿನ ಆಯ್ಕೆ ನಿರ್ಣಾಯಕ ಅಂಶವಾಗಿರುತ್ತದೆ. ತನ್ನದೇ ಆದ ಉಪಯೋಗಗಳನ್ನು ಹೊಂದಿರುವ ವಿವಿಧ ಬಗೆಯ ಕಮಾನುಗಳಿದ್ದಾವೆ. ದೃಢವಾದ ಪುರಾತನ ರೋಮನ್ ಕಮಾನಿನಿಂದ ಹಿಡಿದು ಕಣ್ಸೆಳೆವ ಗೋಥಿಕ್ ಕಮಾನಿನವರೆಗೆ ವಿವಿಧ ಬಗೆಗಳಿವೆ. ಮನೆಯ ಮಾಲೀಕರು ವಿವಿಧ ಬಗೆಯ ಕಮಾನುಗಳ ಬಗ್ಗೆ ತಿಳಿದುಕೊಳ್ಳುವುದರಿಂದ ಮನೆಯ ವಿನ್ಯಾಸದಲ್ಲಿ ದೊಡ್ಡ ಮಟ್ಟದ ಬದಲಾವಣೆ ತರಬಹುದು. ಸಂಕ್ಷಿಪ್ತವಾಗಿ ಹೇಳಬೇಕೆಂದರೆ ವಾಸ್ತುಶಿಲ್ಪದಲ್ಲಿ ಕಮಾನಿನ ವಿಧದ ಆಯ್ಕೆಯನ್ನು ಲಘುವಾಗಿ ಪರಿಗಣಿಸುವಂತಿಲ್ಲ. ಕಟ್ಟಡದ ಅಂದ ಮತ್ತು ಸಮಗ್ರತೆಯ ದೃಷ್ಟಿಯಿಂದ ಇದು ಮೂಲಭೂತವಾದುದು. ಕಣ್ಣಿಗೆ ಮುದ ನೀಡುವಂತ ಫಲಿತಾಂಶವನ್ನು ಪಡೆಯಲು ಕಮಾನಿನ ವಿಧಗಳನ್ನು ಸದಾ ಪರಿಗಣಿಸಿ.
