Share:
Share:
ଫ୍ଲୋର୍ ଟାଇଲ୍ସ ଫାଟର ତାତ୍ପର୍ଯ୍ୟ ହେଉଛି ଆପଣଙ୍କ ମେଜିଆରେ ଲାଗିଥିବା ଟାଇଲ୍ସ ଫାଟିବା, ଭାଙ୍ଗିବା କିମ୍ବା ଫ୍ରାକ୍ଚର୍ ହେବା । ଏହି ଫାଟଗୁଡ଼ିକ ଅତି ଛୋଟ, ନଜରକୁ ଆସୁ ନ ଥିବା ତଥା କେବଳ ଟାଇଲ୍ସର ଉପରି ପୃଷ୍ଠଭାଗକୁ ପ୍ରଭାବିତ କରୁଥିବା ଛିଦ୍ର ହୋଇପାରେ କିମ୍ବା ବଡ଼ ଆକାରର, ଆଖିକୁ ଦେଖାଯାଉଥିବା ତଥା ଟାଇଲ୍ସର ଗଭୀରତା ପର୍ଯ୍ୟନ୍ତ ସୃଷ୍ଟି ହୋଇଥିବା ଫାଟ ହୋଇପାରେ । ଏପରି ଫାଟଗୁଡ଼ିକ ଅସୁନ୍ଦର ତ ଦେଖାଯାଇଥାଏ, ହେଲେ କେତେକ ମାମଲାରେ ତାହା ଆପଣଙ୍କ ଢାଞ୍ଚା ବା କୋଠାର ନିହିତ ସମସ୍ୟାକୁ ସୂଚାଇପାରେ; ଏପରି ସମସ୍ୟା ଯାହା ଆପଣଙ୍କ ଘର କିମ୍ବା ବ୍ୟବସାୟ ସ୍ଥାନର ନିର୍ମାଣର ଅଖଣ୍ଡତା ପ୍ରତି ଗୁରୁତର ବିପଦ ସୃଷ୍ଟି କରିବାରେ ସକ୍ଷମ ହୋଇଥିବ ।
ଆପଣଙ୍କ ଟାଇଲ୍ସରେ ଫାଟ, ତାହା କେଶ ଭଳି ସରୁ ବି ହୋଇ ଥାଉ ନା କାହିଁକି, ତାହାକୁ କେବଳ ଏକ ସୌନ୍ଦର୍ଯ୍ୟଜନିତ ସମସ୍ୟା ଭାବି ଅବହେଳା କରିବା ଉଚିତ୍ ନୁହେଁ । ସେଗୁଡ଼ିକ ଆର୍ଦ୍ରତାର ପ୍ରବେଶମାର୍ଗ ସାଜିପାରେ; ସେହି ବାଟ ଦେଇ ଆର୍ଦ୍ରତା ଆପଣଙ୍କ ମେଜିଆର ତଳଭାଗ ପର୍ଯ୍ୟନ୍ତ ପହଞ୍ଚିପାରେ ଏବଂ ଫିମ୍ପି ଆଦି ଲାଗିବାର କାରଣ ହୋଇପାରେ । ଅଧିକନ୍ତୁ, ସମୟକ୍ରମେ ଏହି ଫାଟଗୁଡ଼ିକ ଆହୁରି ଗଭୀର ହୋଇଯାଇପାରେ, ଯାହା ଆପଣଙ୍କ ଜାଗା ପାଇଁ ଝୁଣ୍ଟିବାର ବିପଦ ସୃଷ୍ଟି କରିପାରେ । ଫାଟକୁ ପ୍ରତିରୋଧ କରିବା ଏବଂ ଇପକ୍ସି ଗ୍ରାଉଟ୍ ଭଳି ଉପଯୁକ୍ତ ସମାଧାନ ସହିତ ସେହି ଫାଟଗୁଡ଼ିକୁ ତତ୍ପରତା ସହିତ ମରାମତି କରିବା ପାଇଁ ଫାଟ ସୃଷ୍ଟି ହେବାର କାରଣଗୁଡ଼ିକୁ ବୁଝିବା ଗୁରୁତ୍ୱପୂର୍ଣ୍ଣ ଅଟେ ।
ଫ୍ଲୋର୍ ଟାଇଲ୍ସରେ ବିଭିନ୍ନ କାରଣରୁ ଫାଟ ସୃଷ୍ଟି ହୋଇପାରେ । ଫ୍ଲୋର୍ ଟାଇଲ୍ସ ଫାଟକୁ ପ୍ରତିରୋଧ କରିବା ପାଇଁ ଫାଟର କାରଣଗୁଡ଼ିକୁ ବୁଝିରଖିବା ଗୁରୁତ୍ୱପୂର୍ଣ୍ଣ ଅଟେ । ଫାଟ ସୃଷ୍ଟି ହେବାର ମୁଖ୍ୟ କାରଣଗୁଡ଼ିକ ତଳେ ଦିଆଗଲା:
ଶକ୍ତ ଧକ୍କା ଟାଇଲ୍ ଫାଟିବାର ଏକ ମୁଖ୍ୟ କାରଣ ଅଟେ । ଟାଇଲ୍ସ ଉପରେ ଭାରି ବସ୍ତୁ ପଡ଼ିଲେ କିମ୍ବା ଟାଇଲ୍ସ ଉପରେ ଶକ୍ତ ଆଘାତ ଲାଗିଲେ, ସେଥିରେ ତୁରନ୍ତ ଫାଟ ଦେଖାଦେଇପାରେ କିମ୍ବା ସମୟକ୍ରମେ ତାହା ଦୁର୍ବଳ ହୋଇଯାଇପାରେ । ଟାଇଲ୍ ଲାଗିଥିବା ପୃଷ୍ଠଭାଗରେ ଆସବାବପତ୍ର ଅଥବା ଅନ୍ୟାନ୍ୟ ଭାରି ବସ୍ତୁଗୁଡ଼ିକୁ ଘୁଞ୍ଚାଘୁଞ୍ଚି କରିବା ସମୟରେ ସାବଧାନତା ଅବଲମ୍ବନ କରିବା ଜରୁରୀ । ଏହାଦ୍ୱାରା ଟାଇଲ୍ ପ୍ରତି କ୍ଷତିକୁ ଏଡ଼ାଯାଇପାରିବ ।
ଅନୁପଯୁକ୍ତ ସ୍ଥାପନା ବା ଟାଇଲ୍ ବିଛାଇବା ପଦ୍ଧତି ଟାଇଲ୍ ଫାଟର କାରଣ ସାଜିପାରେ । ସବୁ ଜାଗାରେ ପର୍ଯ୍ୟାପ୍ତ ପରିମାଣର ଅଠା (ଆଢ଼େସିଭ୍) ନ ଲଗାଇବା, ଅନୁପଯୁକ୍ତ ଭାବେ ଗାଉଟିଂ କରିବା କିମ୍ବା ତଳ ପୃଷ୍ଠଭାଗକୁ ଠିକ୍ ଭାବେ ପୂର୍ବ-ପ୍ରସ୍ତୁତ ନ କରାଯିବା ସାଧାରଣ ସ୍ଥାପନା ତ୍ରୁଟି ଅଟେ, ଯାହା କାରଣରୁ ଟାଇଲ୍ସରେ ଫାଟ ଦେଖାଦେଇଥାଏ । ଉପଯୁକ୍ତ ସ୍ଥାପନା କୌଶଳକୁ ଅନୁସରଣ କରୁଥିବା ପେସାଦାର ଟାଇଲ୍ ଇନଷ୍ଟଲରଙ୍କୁ ନିୟୋଜନ କରି ଏପରି ସମସ୍ୟାକୁ ଏଡ଼ାଯାଇପାରିବ ।
ଟାଇଲ୍ ଉପରେ ମାତ୍ରାଧିକ ଓଜନ କିମ୍ବା ଚାପ ପଡ଼ିଲେ, ତାହା ଫାଟିଯାଇପାରେ । ବିଶେଷକରି ଯଥେଷ୍ଟ ମାତ୍ରାର ଢାଞ୍ଚାଗତ ସମର୍ଥନ ରହି ନ ଥିବା ସ୍ଥାନରେ ଏପରି ଫାଟ ଦେଖାଯାଇଥାଏ । ଭାରି ବସ୍ତୁଗୁଡ଼ିକୁ ସିଧାସଳଖ ଟାଇଲ୍ ଉପରେ ରଖିବା କିମ୍ବା କୌଣସି ନିର୍ଦ୍ଦିଷ୍ଟ ଜାଗା ଉପରେ ହିଁ ମାତ୍ରାଧିକ ଭାର ବା ଚାପ ପଡ଼ିବା ଦ୍ୱାରା ଏପରି ଘଟଣା ଘଟିପାରେ । ଆପଣଙ୍କ ଟାଇଲ୍ ଲାଗିଥିବା ପୃଷ୍ଠଭାଗରେ ଉପଯୁକ୍ତ ଓଜନ ବିତରଣକୁ ସୁନିଶ୍ଚିତ କରନ୍ତୁ ଏବଂ ଉପଯୁକ୍ତ ସମର୍ଥନ (ସପୋର୍ଟ) ବ୍ୟବହାର କରି ଫାଟକୁ ପ୍ରତିରୋଧ କରନ୍ତୁ ।
ଉପ-ମେଜିଆ ବା ନିମ୍ନବର୍ତ୍ତୀ ପୃଷ୍ଠଭାଗ ଟାଇଲ୍ ସ୍ଥାୟିତ୍ୱକୁ ପ୍ରଭାବିତ କରିଥାଏ । ନିମ୍ନବର୍ତ୍ତୀ ପୃଷ୍ଠଭାଗ କ୍ଷତିଗ୍ରସ୍ତ, ଫାଟଯୁକ୍ତ କିମ୍ବା ଅସମତଳ ହୋଇଥିଲେ, ତାହା ଉପରେ ଲଗାଯାଇଥିବା ଟାଇଲ୍ ଉପରେ ଚାପ ପଡ଼ିଥାଏ, ଯାହା ଫଳରେ ଫାଟ ସୃଷ୍ଟି ହୋଇଥାଏ । ଟାଇଲ୍ ବିଛାଇବା ପୂର୍ବରୁ ନିମ୍ନସ୍ଥ ପୃଷ୍ଠଭାଗ ଯେପରି ଭଲ ସ୍ଥିତିରେ ଅଛି ତାହା ସୁନିଶ୍ଚିତ କରନ୍ତୁ ଏବଂ ଅନ୍ୟ କୌଣସି ଢାଞ୍ଚାଗତ ସମସ୍ୟାକୁ ତତ୍ପରତାର ସହିତ ସମାଧାନ କରି ଟାଇଲ୍ର ଫାଟକୁ ଏଡ଼ାନ୍ତୁ ।
କଣ୍ଟ୍ରୋଲ ଜଏଣ୍ଟ ବା ଏକ୍ସପାନ୍ସନ୍ ଜଏଣ୍ଟଗୁଡ଼ିକୁ ନିର୍ମାଣ ସାମଗ୍ରୀର ପ୍ରାକୃତିକ ଚଳନ ଏବଂ ପ୍ରସାରଣକୁ ସୁବିଧାଜନକ କରିବା ପାଇଁ ଡିଜାଇନ୍ କରାଯାଇଥାଏ । ଟାଇଲିଂ ସମୟରେ ଏହି ଜଏଣ୍ଟଗୁଡ଼ିକୁ ଅଣଦେଖା କଲେ ଫ୍ଲୋରିଂର ଚଳନ ବାଧିତ ହୋଇପାରେ, ଯାହା ଫଳରେ ଟାଇଲ୍ସ ଉପରେ ଚାପ ସୃଷ୍ଟି ହୁଏ ଏବଂ ଟାଇଲ୍ ଫାଟିଥାଏ କିମ୍ବା ଫୁଟିଥାଏ । ପ୍ରସାରଣ ଏବଂ ସଙ୍କୋଚନ ଲାଗି ଜାଗା ଦେବା ପାଇଁ କଣ୍ଟ୍ରୋଲ ଜଏଣ୍ଟଗୁଡ଼ିକ ଉପରେ ଧ୍ୟାନ ଦିଅନ୍ତୁ ଏବଂ ଉପଯୁକ୍ତ ଟାଇଲିଂ ପଦ୍ଧତିକୁ ଅନୁସରଣ କରନ୍ତୁ ।
ଟାଇଲ୍ସରେ ଫାଟକୁ ଏଡ଼ାଇବା ପାଇଁ ନିବାରଣ ହିଁ ମୁଖ୍ୟ ଅସ୍ତ୍ର ଅଟେ । କେତେକ ଆଗୁଆ ପଦକ୍ଷେପ ନେଇ ଆପଣ ଫ୍ଲୋର୍ ଟାଇଲ୍ସ ଫାଟିବାର ଆଶଙ୍କାକୁ ନ୍ୟୂନତମ କରିପାରିବେ ଏବଂ ଫଟା ଟାଇଲ୍କୁ ମରାମତି କରିବାର ଝାମେଲାକୁ ଏଡ଼ାଇପାରିବେ । ଟାଇଲ୍ସରେ ଫାଟକୁ ଏଡ଼ାଇବା ପାଇଁ ନିମ୍ନଲିଖିତ ଉପଦେଶଗୁଡ଼ିକୁ ଅନୁସରଣ କରନ୍ତୁ:
ଚିନାମାଟି (ପୋର୍ସେଲିନ୍) ଟାଇଲ୍ସ ଅଧିକ ଦୀର୍ଘସ୍ଥାୟୀ ଏବଂ ଫାଟ ପ୍ରତିରୋଧୀ ହୋଇଥାଏ । ଏ ପ୍ରକାର ଟାଇଲ୍ସକୁ ଚୟନ କରି ଆପଣ ଟାଇଲ୍ସ ଫାଟିବାର ଆଶଙ୍କାକୁ ଅପେକ୍ଷାକୃତ ହ୍ରାସ କରିପାରିବେ । ଚିନାମାଟି ଟାଇଲ୍ସ ତାହାର ଦୃଢ଼ତା ଏବଂ ପ୍ରବଳ ବ୍ୟବହାରକୁ ସହନ କରିବାର ସାମର୍ଥ୍ୟ ପାଇଁ ସୁବିଖ୍ୟାତ ଅଟେ । ଲୋକମାନେ ଅତ୍ୟଧିକ ଚଳପ୍ରଚଳ କରୁଥିବା ସ୍ଥାନଗୁଡ଼ିକରେ ବ୍ୟବହାର ପାଇଁ ତାହା ଉତ୍କୃଷ୍ଟ ବିକଳ୍ପ ହୋଇଥାଏ ।
ଟାଇଲ୍ ଫାଟକୁ ପ୍ରତିରୋଧ କରିବା ପାଇଁ ଉପ-ମେଜିଆକୁ ଉପଯୁକ୍ତ ଭାବେ ପ୍ରସ୍ତୁତ କରିବା ଅତ୍ୟାବଶ୍ୟକ ହୋଇଥାଏ । ଟାଇଲ୍ସ ପାଇଁ ଏକ ସ୍ଥିର ଏବଂ ସମତଳ ପୃଷ୍ଠ ତିଆରି କରିବା ପାଇଁ ପ୍ଲାଏଉଡ୍ ଏବଂ କଂକ୍ରିଟ୍ର ଆଧାର ବ୍ୟବହାର କରନ୍ତୁ । ଏହାଦ୍ୱାରା ଓଜନ ସମାନ ଭାବେ ବିତରିତ ହୋଇଥାଏ ଏବଂ ଅସ୍ଥିର ଫାଉଣ୍ଡେସନ କାରଣରୁ ଟାଇଲ୍ ଫାଟିବାର ଆଶଙ୍କା ହ୍ରାସିତ ହୋଇଥାଏ ।
ଟାଇଲ୍ ବିଛାଇବା ପୂର୍ବରୁ, ଉପ-ମେଜିଆକୁ ଭଲଭାବେ ଯାଞ୍ଚ କରିନିଅନ୍ତୁ, ଯେପରି ସେଥିରେ କୌଣସି ଫମ୍ପା କିମ୍ବା ଅସମତଳ ସ୍ଥାନ ରହିଯାଇ ନାହିଁ ତ । ଏପରି ଜାଗାଗୁଡ଼ିକୁ ‘‘ଡେଡ୍ ସ୍ପଟ୍ସ’’ କୁହାଯାଏ, ଯାହା ଟାଇଲ୍ସକୁ ଦୁର୍ବଳ କରିବା ସହିତ ସେଥିରେ ଫାଟର ସମ୍ଭାବନାକୁ ବୃଦ୍ଧି କରିଥାଏ । ଉପ-ମେଜିଆରେ କୌଣସି ସମସ୍ୟା ରହିଥିଲେ ତାହାକୁ ସଜାଡ଼ି କିମ୍ବା ମରାମତି କରିବା ପରେ ହିଁ ଟାଇଲ୍ ବିଛାନ୍ତୁ ।
ତାପମାତ୍ରା ଉପର-ତଳ ହେଉଥିବା ବଡ଼ ବଡ଼ ଜାଗାଗୁଡ଼ିକରେ ଯୋଡ଼େଇ ଜାଗାଗୁଡ଼ିକୁ ପ୍ରସାରିତ ହେବା ପାଇଁ ଜାଗା ଦେବା ଗୁରୁତ୍ୱପୂର୍ଣ୍ଣ ହୋଇଥାଏ । ଏହି ଯୋଡ଼େଇ ବା ଏକ୍ସପାନ୍ସନ୍ ଜଏଣ୍ଟଗୁଡ଼ିକ ଟାଇଲ୍ସର ପ୍ରାକୃତିକ ଚଳନକୁ ସୁବିଧାଜନକ କରିଥାଏ, ଯାହା ଫଳରେ ଚାପ-ଜନିତ ଫାଟ ପ୍ରତିରୋଧ ହୁଏ । ଏକ୍ସପାନ୍ସନ୍ ଜଏଣ୍ଟ ମଧ୍ୟରେ ବ୍ୟବଧାନ ଓ ତାହାକୁ ଲଗାଇବାର ଉପଯୁକ୍ତ ଉପାୟ ପାଇଁ ପେସାଦାର ଇନଷ୍ଟଲରଙ୍କ ସହ ପରାମର୍ଶ କରନ୍ତୁ କିମ୍ବା ଏହି ଉଦ୍ୟୋଗ ପାଇଁ ଉଦ୍ଦିଷ୍ଟ ମାର୍ଗଦର୍ଶିକା ଅନୁସରଣ କରନ୍ତୁ ।
ଫାଟିଥିବା କିମ୍ବା ଖଣ୍ଡିଆ ହୋଇଯାଇଥିବା ଟାଇଲ୍ସକୁ ମରାମତି ଓ ବଦଳାଇବା ଝଞ୍ଜଟପୂର୍ଣ୍ଣ ହୋଇଥାଏ । କିନ୍ତୁ, ତାହା ପଛରେ ଥିବା କାରଣକୁ ବୁଝିବା ଏବଂ ନିବାରଣମୂଳକ ପଦକ୍ଷେପ ଗ୍ରହଣ କରିବା ଦ୍ୱାରା ଆପଣ ସମୟ, ଟଙ୍କା ବଞ୍ଚାଇପାରିବେ ଏବଂ ତତ୍-ଜନିତ ଝାମେଲାକୁ ଏଡ଼ାଇପାରିବେ । ଏହି ବ୍ଲଗ୍ରେ ଦର୍ଶାଯାଇଥିବା ମାର୍ଗଦର୍ଶିକାକୁ ଅନୁସରଣ କରି ଆପଣ ଏକ ଫାଟ-ମୁକ୍ତ ଏବଂ ଦୀର୍ଘସ୍ଥାୟୀ ଟାଇଲ୍ ପୃଷ୍ଠଭାଗକୁ ଉପଭୋଗ କରିପାରିବେ । ଟାଇଲ୍ ବିଛାଇବା ଉପରେ ଅଧିକ ବିସ୍ତୃତ ଉପଦେଶ ଏବଂ କୌଶଳ ପାଇଁ, ଟାଇଲ୍ ସ୍ଥାପନା ଉପରେ ଆମର ଭିଡିଓ ଦେଖନ୍ତୁ ଯାହା ଆପଣଙ୍କୁ ଉପଯୁକ୍ତ ଟାଇଲ୍ ସ୍ଥାପନା ପଦ୍ଧତି ଉପରେ ମୂଲ୍ୟବାନ ସୂଚନା ପ୍ରଦାନ କରିଥାଏ ।
