ପଥର ଯୋଡ଼େଇ କାମରେ ନିମ୍ନଲିଖିତ 8ଟି ସାଧାରଣ ତ୍ରୁଟିଗୁଡ଼ିକୁ ଏଡ଼ାନ୍ତୁ

ପଥର ଯୋଡ଼େଇ କାମରେ ନିମ୍ନଲିଖିତ 8ଟି ସାଧାରଣ ତ୍ରୁଟିଗୁଡ଼ିକୁ ଏଡ଼ାନ୍ତୁ

ଏବେ ଯେହେତୁ ପଥର ଯୋଡ଼େଇ ବା ଷ୍ଟୋନ୍ ମାସୋନ୍ରି କ’ଣ ସେ ସମ୍ପର୍କରେ ଆପଣ ସମ୍ୟକ୍ ଧାରଣା ପାଇସାରିଛନ୍ତି, ତେଣୁ ପଥର ଯୋଡ଼େଇ କାମରେ କେଉଁସବୁ ତ୍ରୁଟିଗୁଡ଼ିକୁ ଏଡ଼ାଇବା ଉଚିତ ସେ ବିଷୟରେ ଜାଣିରଖନ୍ତୁ ।

1) ପୋର୍ ଷ୍ଟ୍ରକ୍ଚର୍

ପଥରର ପ୍ରାକୃତିକ ସ୍ଥାୟିତ୍ୱ ଅନେକ କାରକ କାରଣରୁ ପ୍ରଭାବିତ ହୋଇପାରେ, କିନ୍ତୁ ପୋର୍ ଷ୍ଟ୍ରକ୍ଚର୍ ସବୁଠାରୁ ମହତ୍ତ୍ୱପୂର୍ଣ୍ଣ ଅଟେ । ପୋର୍ ଷ୍ଟ୍ରକ୍ଚର ବା ପଥରରେ ରହିଥିବା ରନ୍ଧ୍ରଗୁଡ଼ିକର ଅନେକ ମହତ୍ତ୍ୱ ରହିଥାଏ କାରଣ ତାହା ପଥର ମଧ୍ୟକୁ ଏବଂ ପଥର ମଧ୍ୟ ଦେଇ କେତେ ପରିମାଣର ଜଳ ପ୍ରବେଶ ଓ ଚଳାଚଳ କରୁଛି ତାହା ନିର୍ଦ୍ଧାରିତ କରିଥାଏ । ଅଧିକନ୍ତୁ, ଜଳରେ ଥିବା ଲବଣ ମଧ୍ୟ ରନ୍ଧ୍ରଗୁଡ଼ିକରେ ଜମାଟ ବାନ୍ଧି ପଥରକୁ କ୍ଷତିଗ୍ରସ୍ତ କରିପାରେ । ରନ୍ଧ୍ରଗୁଡ଼ିକ କେତେ ପରିମାଣର ଜାଗା ସୃଷ୍ଟି କରୁଛି ତାହା ମହତ୍ତ୍ୱପୂର୍ଣ୍ଣ କାରକ ନୁହେଁ ବରଂ ରନ୍ଧ୍ରଗୁଡ଼ିକର ସଂରଚନା ଅଧିକ ମହତ୍ତ୍ୱପୂର୍ଣ୍ଣ ହୋଇଥାଏ । ସ୍ୱଳ୍ପ ସ୍ୱରନ୍ଧ୍ରତାଯୁକ୍ତ ପଥରଗୁଡ଼ିକ ଅଧିକ ମାତ୍ରାରେ ଜଳ ଭେଦନକୁ ଅନୁମତି ଦେଇ ନ ଥାଏ ତେଣୁ ସେଗୁଡ଼ିକରେ ଲବଣ ଏବଂ/କିମ୍ବା ତୁଷାର ଆକ୍ରମଣର ଆଶଙ୍କା ସେତେ ଅଧିକ ନ ଥାଏ । ତେଣୁ ସ୍ୱଳ୍ପ ସରନ୍ଧ୍ରତାଯୁକ୍ତ ପଥରଗୁଡ଼ିକ ସାଧାରଣତଃ ଅଧିକ ଦୀର୍ଘସ୍ଥାୟୀ ହୋଇଥାଏ । ଉଚ୍ଚ ସରନ୍ଧ୍ରତାଯୁକ୍ତ ପଥରଗୁଡ଼ିକ ଅଧିକ ମାତ୍ରାରେ ଜଳର ପ୍ରବେଶକୁ ଅନୁମତି ଦେଇଥାଏ, କିନ୍ତୁ ରନ୍ଧ୍ରଗୁଡ଼ିକ ବହୁତ ବଡ଼ ହୋଇଥାଏ ତେବେ ଜଳ ଶୀଘ୍ର ବାଷ୍ପୀଭୂତ ହୋଇଯାଇଥାଏ ।

2) ଅନୁପଯୁକ୍ତ ବେଡିଂ

ଅବକ୍ଷେପଣ ବା ସେଡିମେଣ୍ଟେସନ୍ ପ୍ରକ୍ରିୟା ସମୟରେ, ଅବକ୍ଷିପ୍ତ ପଥର ଗଠିତ ହୋଇଥାଏ । ଯଦି ପଥର ବ୍ଲକ୍ ତାହାର ବେଡିଂ ପ୍ଲେନ୍ ଅନୁସାରେ ଠିକ୍ ଭାବେ ସ୍ଥାପିତ ନ ହୁଏ ତେବେ ତ୍ରୁଟି ଘଟିପାରେ ।

ପଥରକୁ କାନ୍ଥରେ ସ୍ଥାପନ କରାଯାଉଥିଲେ, ପଥରକୁ ତାହାର ପ୍ରାକୃତିକ ଶଯ୍ୟା ବା ବେଡିଂ ସ୍ଥିତିରେ ରଖାଯିବା ଉଚିତ । ଏହାର ଅର୍ଥ, ପଥରର ମୂଳ ଉତ୍ପତ୍ତି ଅନୁଯାୟୀ, ସ୍ତରଗୁଡ଼ିକ ଭୂସମାନ୍ତର ହେବା ଆବଶ୍ୟକ । ଏହି ସ୍ଥିତିରେ ହିଁ ପଥରଗୁଡ଼ିକ ଅଧିକ ମଜବୁତ ରହିଥାଏ ଏବଂ ଦୋଷତ୍ରୁଟିର ସମ୍ଭାବନା ହ୍ରାସିତ ହୋଇଥାଏ । ଯଦି ପଥରଗୁଡ଼ିକୁ ଭୂଲମ୍ବ ଭାବେ ସ୍ଥାପିତ କରାଯାଏ ତେବେ ଲବଣ ସ୍ଫଟିକୀକରଣ କିମ୍ବା ତୁଷାର କାରଣରୁ ତାହାର କ୍ଷତିଗ୍ରସ୍ତ ହେବାର ସମ୍ଭାବନା ଅଧିକ ହୋଇଥାଏ । ବେଡିଂ ସ୍ତରଗୁଡ଼ିକୁ ଠେଲିବା ଅପେକ୍ଷାକୃତ ସହଜ ହୋଇଥାଏ କାରଣ ପାର୍ଶ୍ୱବର୍ତ୍ତୀ ପଥରରୁ କୌଣସି ପ୍ରତିରୋଧୀ ପ୍ରତିକ୍ରିୟା ଉତ୍ପନ୍ନ ହୋଇ ନ ଥାଏ ।

3) ଲବଣ ସ୍ଫଟିକୀକରଣ

ଲବଣ ବହୁ ଉପାୟରେ ସମସ୍ୟା ସୃଷ୍ଟି କରିପାରେ ଏବଂ ସେଗୁଡ଼ିକ ବିଭିନ୍ନ ଉତ୍ସରୁ ଆସିଥାଏ । ଏହିସବୁ ଉତ୍ସଗୁଡ଼ିକ ହେଲା - କଂକ୍ରିଟ୍, ଇଟା ଏବଂ ମୋର୍ଟାର୍ ତଥା ମାଟି ଓ ବାୟୁ । ଲବଣ ପଥରର ପୃଷ୍ଠଭାଗରେ କିମ୍ବା ତାହା ମଧ୍ୟରେ ଜମାଟ ବାନ୍ଧି ରହେ ଓ କ୍ରମଶଃ ଶୁଖିବାକୁ ଲାଗେ । ରନ୍ଧ୍ରଗୁଡ଼ିକରେ ତାହାର ସ୍ପଟିକୀକରଣ ବା କ୍ରିଷ୍ଟାଲାଇଜେଶନ୍ କାରଣରୁ ଚାପ ସୃଷ୍ଟି ହୁଏ ଯେଉଁ କାରଣରୁ ପଥର କ୍ରମାଗତ ଭାବେ କ୍ଷତିଗ୍ରସ୍ତ ହେବାକୁ ଲାଗେ। ପଥରର ପ୍ରକାରଭେଦ, ଲବଣର ପ୍ରକାରଭେଦ ଏବଂ ରନ୍ଧ୍ରଗୁଡ଼ିକର ବୈଶିଷ୍ଟ୍ୟ - ବିଶେଷକରି ସେଗୁଡ଼ିକର ଆକାର ଏବଂ ବିନ୍ୟାସ - ଏ ସବୁକିଛି କ୍ଷତିର ସମ୍ଭାବନା ଏବଂ ପରିସରକୁ ପ୍ରଭାବିତ କରିଥାଏ । ଆପଣ ସମୁଦ୍ର ତଟବର୍ତ୍ତୀ ଅଞ୍ଚଳରେ ସାମୁଦ୍ରିକ ଲବଣ ଓ ବାୟୁର ଆପେକ୍ଷିକ ଆର୍ଦ୍ରତ କାରଣରୁ ଏପରି ଅଞ୍ଚଳରେ ଲବଣ ସ୍ପଟିକୀକରଣର ଆଶଙ୍କା ଅଧିକ ହୋଇଥାଏ ।

4) ଚୂନ ବହିବା

ପଥର ଯୋଡ଼େଇ ଆଧାରିତ ନିର୍ମାଣ କାର୍ଯ୍ୟରେ, ଯେବେ ସିମେଣ୍ଟ ମଧ୍ୟ ଦେଇ ମାତ୍ରାଧିକ ଜଳ ପ୍ରବାହିତ ହୁଏ ତେବେ ସେହି ପରିସ୍ଥିତିକୁ ଚୂନ ବହିବା ବା ଚୂନ ଦାଗ କୁହାଯାଏ । ଏହା ଫଳରେ ଅମ୍ଳବୃଷ୍ଟି ଏବଂ ଚୂନପଥରେ ଥିବା କ୍ୟାଲସିୟମ୍ କାର୍ବୋନେଟ୍ ମଧ୍ୟରେ ପ୍ରତିକ୍ରିୟା ସଂଘଟିତ ହୁଏ, ଅନ୍ୟାନ୍ୟ ସାମଗ୍ରୀରୁ ମଧ୍ୟ ଦ୍ରବଣୀୟ ଲବଣ ବିକଶିତ ହୋଇପାରେ । ଯେବେ ଦ୍ରବଣୀୟ ଲବଣ ଗଠିତ ହୁଏ, ତାହା ଚୂନପଥରର ଗଡ଼ାଣିଆ ଭାଗରୁ ବହିଆସିଥାଏ ଏବଂ ଇଟା କିମ୍ବା ବାଲିପଥର ଉପରେ ଜମାଟ ବାନ୍ଧିଥାଏ । ଏହି ଲବଣଗୁଡ଼ିକର ସ୍ପଟିକୀକରଣ ଘଟିଲେ, ତାହା ଏପରି ନିର୍ମାଣ ସାମଗ୍ରୀଗୁଡ଼ିକୁ କ୍ଷତିଗ୍ରସ୍ତ କରିଥାଏ, ଯେଉଁ ସାମଗ୍ରୀଗୁଡ଼ିକ ଅନ୍ୟଥା ଅବକ୍ଷୟପ୍ରାପ୍ତ ହୋଇ ନ ଥାନ୍ତା ।

5) ତୁଷାରଜନିତ କ୍ଷୟ

ଅତ୍ୟଧିକ ଆର୍ଦ୍ର ଓ ଘନୀଭବନ ପ୍ରବଣ ଅଞ୍ଚଳରେ ତୁଷାର ଅଧିକ ସମସ୍ୟା ସୃଷ୍ଟି କରିବାର ସାମର୍ଥ୍ୟ ରଖିଥାଏ । ଡାମ୍ପ୍-ପ୍ରୁଫ୍ ତଳେ ଥିବା ସ୍ତରକୁ ଛାଡ଼ିଦେଲେ, ଆଚ୍ଛାଦିତ ପ୍ଲେନ୍ କାନ୍ଥଗୁଡ଼ିକରେ ତୁଷାରଜନିତ କ୍ଷତି ବିରଳ ହୋଇଥାଏ । ଇଟାକାମ ଭଳି ବିଲଡିଂର ରନ୍ଧ୍ରଯୁକ୍ତ ଷ୍ଟ୍ରକ୍ଚରରେ ତୁଷାଜନିତ କ୍ଷତିର ଆଶଙ୍କା ଅଧିକ ହୋଇଥାଏ ଏବଂ କ୍ଷତିର ପ୍ରକ୍ରିୟା ମଧ୍ୟ ସମାନ ହୋଇଥାଏ ।

ପଥର ଯୋଡ଼େଇ ଆଧାରିତ ନିର୍ମାଣ କାର୍ଯ୍ୟରେ କରାଯାଉଥିବା ଏହି ତ୍ରୁଟି ବଡ଼ ବଡ଼ ପଥରଖଣ୍ଡକୁ ସ୍ଥାନଚ୍ୟୁତ କରିବାର ସାମର୍ଥ୍ୟ ରଖିଥାଏ, ବିଶେଷ କରି ଯଦି ପଥର ଏପରି ସ୍ଥାନରେ ରହିଥାଏ ଯାହା କ୍ଷୟକ୍ଷତି ପ୍ରବଣ ହୋଇଥିବ, ଯେପରିକି - ଗଡ଼ାଣିଆ ସ୍ଥାନ କିମ୍ବା ପାରାପେଟ୍ ।

6) କଣ୍ଟୁର୍ ସ୍କେଲିଂ

ବାଲିପଥରରେ କଣ୍ଟୁର ସ୍କେଲିଂ ଦେଖାଦେଇଥାଏ । କ୍ୟାଲସିୟମ୍ ସଲଫେଟ୍ ରନ୍ଧ୍ରଗୁଡ଼ିକୁ ଅବରୁଦ୍ଧ କରିବା କାରଣରୁ ଏହା ଘଟିଥାଏ ବୋଲି ବିଶ୍ୱାସ କରାଯାଏ । ପଥରଟି କ୍ୟାଲସାରିୟସ୍ ବାଲିପଥର ନ ହୋଇଥିଲେ ମଧ୍ୟ ଏହା ଘଟୁଥିବାର ଦେଖାଯାଇଛି । ଏହାର ପରିଣତିସ୍ୱରୂପ, ପଥରର ପୃଷ୍ଠଭାଗରୁ ମୋଟାଳିଆ ପଟଳ ଭାଙ୍ଗି ଖସିପଡ଼ିଥାଏ ।

7) ଧାତୁର ପ୍ରସାରଣ ଏବଂ କାନ୍ଥ ଟାଇଲ୍ ବିଫଳତା

ଶତାବ୍ଦୀ ଶତାବ୍ଦୀ ଧରି, ପଥରକାର୍ଯ୍ୟ ଫିକ୍ସିଂ ଉପକରଣ ଭାବେ ଲୁହା ଓ ଷ୍ଟିଲ୍ କ୍ରାମ୍ପଗୁଡ଼ିକ ବ୍ୟବହୃତ ହୋଇଆସିଛି । ହେଲେ, ଏଭଳି ଧାତବ ଫିକ୍ସିଗୁଡ଼ିକରେ ଲାଗିଥିବା କଳଙ୍କି କାରଣରୁ ତାହା ପ୍ରସାରିତ ହୋଇଥାଏ ଏବଂ ପଥରେ ଫାଟ ସୃଷ୍ଟି ହୋଇଥାଏ । ଅଧିକନ୍ତୁ, କ୍ୟାଭିଟି ୱାଲ୍ ଟାଏ ଦ୍ୱାରା ପଥର କ୍ୟାଭିଟି କାନ୍ଥଗୁନିକ ପ୍ରଭାବିତ ହୋଇପାରେ ।

8) ଡ୍ରେସିଂ ଓ ଏକ୍ସଟ୍ରାକ୍ସନ୍

ବିସ୍ଫୋରକ ବ୍ୟବହାର କରି ପଥରଖଣିରୁ ପଥର କାଢ଼ିବା ସମୟରେ ପଥରଗୁଡ଼ିକ କ୍ଷତିଗ୍ରସ୍ତ ହୋଇପାରେ । ଏହି କାରଣରୁ ସେଥିରେ ଆଭ୍ୟନ୍ତରୀଣ ଫାଟ ମଧ୍ୟ ସୃଷ୍ଟି ହୋଇପାରେ । ପଥରର ପୃଷ୍ଠଭାଗରେ ମାତ୍ରାଧିକ ହାତ ହତିଆରର ପ୍ରୟୋଗ କାରଣରୁ ମଧ୍ୟ ପଥର କ୍ଷତିଗ୍ରସ୍ତ ହୋଇପାରେ ।

ପଥର ଯୋଡ଼େଇ ଆଧାରିତ ନିର୍ମାଣ କାର୍ଯ୍ୟ ପାଇଁ ଟିପ୍ସ

1. ଲମ୍ବା ଆୟତାକାର ପଥରର ବ୍ୟବହାର ଦ୍ୱାରା କାନ୍ଥଗୁଡ଼ିକୁ ସୁଦୃଢ଼ତା ମିଳିଥାଏ ।

2. ଆପଣଙ୍କ କାନ୍ଥର ଆଭ୍ୟନ୍ତରୀଣ ଏବଂ ବାହ୍ୟ ଅଂଶଗୁଡ଼ିକୁ ଏକା ସାଙ୍ଗରେ ନିର୍ମାଣ କରାଯିବା ଉଚିତ ।

3. ଜଏଣ୍ଟଗୁଡ଼ିକର ମୋଟେଇ 2-2.5 ସେମି ମଧ୍ୟରେ ହେବା ଉଚିତ୍ ଏବଂ ପଥରର ଆକାର ଉପରେ ନିର୍ଭର କରି ତାହା 1 ସେମିରୁ କମ୍ ନ ହେବା ଉଚିତ୍ ।

4. କଂକ୍ରିଟ୍ ମିଶ୍ରଣ ପାଇଁ ଉପଯୁକ୍ତ ସିମେଣ୍ଟ-ପାଣି ଅନୁପାତ ବ୍ୟବହାର କରିବାକୁ ଭୁଲନ୍ତୁ ନାହିଁ ଏବଂ ପ୍ରସ୍ତୁତ କଂକ୍ରିଟ୍ ମିଶ୍ରଣକୁ 30 ମିନିଟ୍ ମଧ୍ୟରେ ବ୍ୟବହାର କରନ୍ତୁ ।

5. ଫାଙ୍କଗୁଡ଼ିକୁ ଭରିବା ଏବଂ କାନ୍ଥକୁ ଆକୃତି ଦେବା ପାଇଁ ଛୋଟ ଛୋଟ ପଥର ବ୍ୟବହୃତ ହୋଇଥାଏ ।

6. ପଥରଗୁଡ଼ିକ କାନ୍ଥରୁ ବାହାରି ରହିବା ଉଚିତ ନୁହେଁ ଏବଂ ମିଶ୍ରଣ ସହିତ ଉପଯୁକ୍ତ ଭାବେ ସେଟ୍ ହେବା ଉଚିତ ।

7. କାନ୍ଥଗୁଡ଼ିକୁ ଅତି କମରେ 7 ଦିନ ପାଇଁ କିଓରିଂ କରାଯିବା ଆବଶ୍ୟକ ।

ପଥର ଯୋଡ଼େଇ କାମର ଲାଭ

1) ଶକ୍ତି

ନିର୍ମାଣ ସମୟରେ ପଥର ବ୍ୟବହାର କରିବା ଦ୍ୱାରା ଆପଣଙ୍କର ବିଲଡିଂ ମଜବୁତ ଓ ଦୀର୍ଘସ୍ଥାୟୀ ହୋଇଥାଏ । ପଥରର ହାରାହାରି କମ୍ପ୍ରେସିଭ୍ ଶକ୍ତି ପ୍ରାୟ 104.9 ଏମପିଏ ହୋଇଥାଏ, ତେଣୁ ଏହି କାର୍ଯ୍ୟ ପାଇଁ ଉଦ୍ଦିଷ୍ଟ ଅନ୍ୟାନ୍ୟ ସାମଗ୍ରୀ ତୁଳନାରେ ଏହା ଏକ ଉତ୍ତମ ବିକଳ୍ପ ହୋଇଥାଏ । ପଥରର କମ୍ପ୍ରେସିଭ୍ ଶକ୍ତିକୁ ସରଳ ଭାଷାରେ କହିବାକୁ ଗଲେ, ଏହା ହେଉଛି ନ ଭାଙ୍ଗି କିମ୍ବା ନ ଫାଟି ସହନ କରିପାରୁଥିବା ସର୍ବାଧିକ ଭାର । ଯୋଡ଼େଇ କାମର ଶକ୍ତି ମୋର୍ଟାରର ଶକ୍ତି ଉପରେ ମଧ୍ୟ ବହୁ ମାତ୍ରାରେ ନିର୍ଭରଶୀଳ ହୋଇଥାଏ ।

2) ପାଣିପାଗ ନିରୋଧୀ

ପଥର ଯୋଡ଼େଇର ଏହା ସବୁଠାରୁ ଗୁରୁତ୍ୱପୂର୍ଣ୍ଣ ଉପାଦେୟତା ଅଟେ । ବର୍ଷସାରା ବିଲଡିଂ କୌଣସି ନା କୌଣସି ପ୍ରକାର ପାଣିପାଗ ସଂସ୍ପର୍ଶରେ ଆସିଥାଏ । ପଥର ଯୋଡ଼େଇରେ ବର୍ଷା, କୁଆପଥର ଏବଂ ତୁଷାରପାତ ଭଳି ପାଣିପାଗ ଉପାଦାନ କାରଣରୁ ଉତ୍ପନ୍ନ ଯେକୌଣସି ପ୍ରଭାବକୁ ସହନ କରିବାର ସାମର୍ଥ୍ୟ ରହିଥାଏ । ବର୍ଷା ସମୟରେ ପଥର ଜଳକୁ ଅବଶୋଷଣ କରି ନ ଥାଏ, ତେଣୁ ପରେ ଆର୍ଦ୍ରତା ଭଳି କୌଣସି ସମସ୍ୟା ଦେଖାଦେଇ ନ ଥାଏ ।

3) ସ୍ଥାୟିତ୍ୱ

ବ୍ୟବହାରଜନିତ କ୍ଷୟକ୍ଷତିକୁ ସହନ କରିବାର ପଥରର ସାମର୍ଥ୍ୟ କାରଣରୁ ଅନ୍ୟାନ୍ୟ ନିର୍ମାଣ ପଦ୍ଧତି ତୁଳନାରେ ପଥର ଯୋଡ଼େଇ କାର୍ଯ୍ୟ ଅଧିକ ଲାଭପ୍ରଦ ହୋଇଥାଏ । ଫର୍ନିଚରର ଉଠାପକା କାରଣରୁ ସ୍ୱାଭାବିକ କ୍ଷୟକ୍ଷତି ସୃଷ୍ଟି ହୋଇପାରେ, ଯେଉଁ କାରଣରୁ କାନ୍ଥଗୁଡ଼ିକରେ ଦାଗ/ଖାଲ ଦେଖାଦେଇଥାଏ । କିନ୍ତୁ ପଥରରେ ଏଭଳି କୌଣସି ଆଶଙ୍କା ନ ଥାଏ । ଏହା ବକ୍ରତା, ରାପିଂ, ସ୍ପ୍ଳିଣ୍ଟରିଂ, ଡେଣ୍ଟିଂ ଏପରିକି ଫୁଲା ପ୍ରତିରୋଧି ମଧ୍ୟ ହୋଇଥାଏ । ଏସବୁ ବୈଶିଷ୍ଟ୍ୟ ତାହାର ସ୍ଥାୟିତ୍ୱକୁ ପ୍ରଭାବିତ କରିଥାଏ ।

4) ରକ୍ଷଣାବେକ୍ଷଣ

ପଥର ଯୋଡ଼େଇ ଆଧାରିତ ନିର୍ମାଣ କାର୍ଯ୍ୟ ଦ୍ୱାରା ନିର୍ମିତ ବିଲଡିଂଗୁଡ଼ିକ ତାହାର ସ୍ଥାୟିତ୍ୱ କାରଣରୁ ଖୁବ୍ କମ୍ ରକ୍ଷଣାବେକ୍ଷଣ ଆବଶ୍ୟକ କରିଥାଏ । ଅନ୍ୟ ପକ୍ଷରେ ଇଟା ଯୋଡ଼େଇରେ ଅଧିକ ରକ୍ଷଣାବେକ୍ଷଣ, ପ୍ଲାଷ୍ଟରିଂ ଓ କଲର୍ ୱାଶିଂ ଆବଶ୍ୟକ ହୋଇଥାଏ ।