ଡାଇନିଂ ରୁମ୍ ପାଇଁ ବାସ୍ତୁ: ଆପଣଙ୍କ ଡାଇନିଂ ଏରିଆକୁ ଉନ୍ନତ କରିବା ପାଇଁ ଟିପ୍ସ

ଡାଇନିଂ ରୁମ୍ ପାଇଁ ବାସ୍ତୁ ଉପଦେଶ

ଏକ ସୌହାର୍ଦ୍ଦପୂର୍ଣ୍ଣ ଏବଂ ଆକର୍ଷଣୀୟ ଡାଇନିଂ ରୁମ୍ ପାଇଁ, ତାହାର ଡିଜାଇନ୍ ଏବଂ ବିନ୍ୟାସରେ ବାସ୍ତୁର ସିଦ୍ଧାନ୍ତକୁ ପ୍ରୟୋଗ କରାଯିବା ମହତ୍ତ୍ୱପୂର୍ଣ୍ଣ ହୋଇଥାଏ । ଆପଣଙ୍କ ଡାଇନିଂ ଏରିଆ ପାଇଁ ଆପଣ ବାସ୍ତୁ ଶାସ୍ତ୍ରର ନିମ୍ନଲିଖିତ ଗୁରୁତ୍ୱପୂର୍ଣ୍ଣ ଦିଗଗୁଡ଼ିକୁ ବିଚାରକୁ ନେଇପାରନ୍ତି:

1. ଆଦର୍ଶ ସ୍ଥାପନ

ବାସ୍ତୁଶାସ୍ତ୍ରରେ ଆପଣଙ୍କ ଡାଇନିଂ ରୁମ୍ ର ଅବସ୍ଥିତି ତାହା ଆକର୍ଷିତ କରୁଥିବା ଶକ୍ତିକୁ ପ୍ରଭାବିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥାଏ । ଆଦର୍ଶ ଭାବେ, ଆପଣଙ୍କ ଡାଇନିଂ ଏରିଆର ଅବସ୍ଥିତି ଆପଣଙ୍କ ଘରର ପଶ୍ଚିମ କିମ୍ବା ଉତ୍ତରପଶ୍ଚିମ ଭାଗରେ ହେବା ଉଚିତ । ଏହି ଅବସ୍ଥିତି ଭୋଜନ ସମୟରେ ପ୍ରାଚୁର୍ଯ୍ୟତା ଏବଂ ସମୃଦ୍ଧିକୁ ଆକର୍ଷିତ କରିବାର ବିଶ୍ୱାସ କରାଯାଏ । ଡାଇନିଂ ରୁମ୍ କୁ ବେଡ୍-ରୁମ୍ କିମ୍ବା ଘରର ମଧ୍ୟଭାଗରେ ରଖିବାର ସାଧାରଣ ଭୁଲଠାରୁ ଦୂରେଇ ରୁହନ୍ତୁ, କାରଣ ଏପରି ଅବସ୍ଥିତି ସକାରାତ୍ମକ ଶକ୍ତି ପ୍ରବାହରେ ବାଧା ସୃଷ୍ଟି କରିପାରେ ।

2. ବାସ୍ତୁ ଅନୁଯାୟୀ ଡାଇନିଂ ଟେବୁଲର ଦିଗ

ସ୍ଥାପତ୍ୟକଳା ଏବଂ ଡିଜାଇନର ପ୍ରାଚୀନ ଭାରତୀୟ ବିଜ୍ଞାନ - ବାସ୍ତୁ ଶାସ୍ତ୍ରର ଜଗତରେ ଆପଣଙ୍କ ଡାଇନିଂ ଟେବୁଲ ଅବସ୍ଥିତ ରହିଥିବା ଦିଗର ମହତ୍ତ୍ୱ କେବଳ ସୌନ୍ଦର୍ଯ୍ୟ ଦୃଷ୍ଟିକୋଣ ମଧ୍ୟରେ ସୀମିତ ନ ଥାଏ; ବରଂ ତାହା ଶକ୍ତିର ପ୍ରବାହନ ଏବଂ କଲ୍ୟାଣ ସହିତ ମଧ୍ୟ ଓତଃପ୍ରୋତ ଭାବେ ଜଡ଼ିତ ହୋଇଥାଏ । ବାସ୍ତୁ ସିଦ୍ଧାନ୍ତ ଅନୁସାରେ, ଆଦର୍ଶ ଭାବେ, ଡାଇନିଂ ଟେବୁଲକୁ ଏପରି ସ୍ଥାନରେ ରଖାଯିବା ଆବଶ୍ୟକ ଯେମିତିକି ଭୋଜନ ଗ୍ରହଣ ସମୟରେ ପରିବାରର ମୁଖ୍ୟ ସଦସ୍ୟଙ୍କ ମୁହଁ ପୂର୍ବ କିମ୍ବା ଉତ୍ତର ଦିଗ ଆଡ଼କୁ ରହୁଥିବ । ବିଶ୍ୱାସ କରାଯାଏ ଯେ, ଏପରି ବନ୍ଦୋବସ୍ତ ହଜମକ୍ରିୟାକୁ ଉନ୍ନତ କରିବା ସହିତ ସକାରାତ୍ମକ ବାର୍ତ୍ତାଳାପକୁ ପ୍ରୋତ୍ସାହିତ କରିଥାଏ, ଏବଂ ସମସ୍ତଙ୍କ ପାଇଁ ଏକ ସୁଖପ୍ରଦ ଭୋଜନ ଅନୁଭୂତିକୁ ସୁନିଶ୍ଚିତ କରିଥାଏ ।

3. ଡାଇନିଂ ରୁମ୍ ପାଇଁ ବାସ୍ତୁ ରଙ୍ଗ

ରଙ୍ଗରେ ଆପଣଙ୍କ ଡାଇନିଂ ରୁମ୍ ର ଶକ୍ତି ଏବଂ ବାତାବରଣକୁ ପ୍ରଭାବିତ କରିବାର ଶକ୍ତି ରହିଥାଏ । ବାସ୍ତୁ ଅନୁଯାୟୀ ଡାଇନିଂ ରୁମ୍ ର ରଙ୍ଗ ଚୟନ କରିବା ପାଇଁ, ଉଷ୍ମ ଏବଂ ଶାନ୍ତିପ୍ରଦ ରଙ୍ଗ ଚୟନ କରନ୍ତୁ, ଯେପରିକି - ହଳଦିଆ କିମ୍ବା ପୀତାଭ ବାଦାମୀ ରଙ୍ଗର ବିଭିନ୍ନ ବର୍ଣ୍ଣ । ଡାଇନିଂ ରୁମ୍ ବାସ୍ତୁ ଅନୁଯାୟୀ ଏହି ରଙ୍ଗଗୁଡ଼ିକ ଏକ ସ୍ୱାଗତପୂର୍ଣ୍ଣ ଏବଂ ପୁଷ୍ଟିଦାୟକ ପରିବେଶ ସୃଷ୍ଟି କରିଥାଏ । ଅନ୍ୟ ପକ୍ଷରେ, ଅନ୍ଧାରୁଆ କିମ୍ବା ବିଷର୍ଣ୍ଣ ରଙ୍ଗଗୁଡ଼ିକୁ ଏଡ଼ାଇବା ପରାମର୍ଶଯୋଗ୍ୟ ଅଟେ, କାରଣ ତାହା ଆପଣଙ୍କ ଭୋଜନର ଅନୁଭୂତିର ପ୍ରାଣପ୍ରାଚୂର୍ଯ୍ୟତାକୁ ନିସ୍ତେଜ କରିପାରେ ।

4. ସ୍ୱାଗତ ଜଣାଉଥିବା ପ୍ରବେଶପଥ

Tପ୍ରବେଶ ପଥ ଡାଇନିଂ ରୁମ୍ ବାସ୍ତୁ ଡିଜାଇନର ଏକ ମହତ୍ତ୍ୱପୂର୍ଣ୍ଣ ଦିଗ ଅଟେ । ତାହା ଯେପରି ସୁ-ଆଲୋକିତ ଏବଂ କୌଣସି ପ୍ରକାର ଅବରୋଧରୁ ମୁକ୍ତ ରହେ ତାହା ସୁନିଶ୍ଚିତ କରନ୍ତୁ । ଏହା ସକାରାତ୍ମକ ଶକ୍ତି ପାଇଁ ଏକ ପରିଷ୍କାର ଓ ଆକର୍ଷଣୀୟ ମାର୍ଗ ସୃଷ୍ଟି କରିଥାଏ । ଏହି ସକାରାତ୍ମକ କମ୍ପନଗୁଡ଼ିକୁ ବୃଦ୍ଧି କରିବା ପାଇଁ, ପ୍ରବେଶପଥକୁ ଶୁଭ ପ୍ରତୀକ ଚିହ୍ନ କିମ୍ବା ଚିତ୍ରକଳାରେ ସଜାଇବା ବିଚାରକୁ ନିଅନ୍ତୁ ।

5. ଡାଇନିଂ ରୁମ୍ ପାଇଁ ଉପଯୁକ୍ତ ଆଲୋକ ବ୍ୟବସ୍ଥା

ସଠିକ୍ ଆଲୋକ ବ୍ୟବସ୍ଥା ଆପଣଙ୍କ ଡାଇନିଂ ରୁମ୍ ବାତାବରଣର ଟୋନ୍ ସ୍ଥିର କରିଥାଏ । ଡାଇନିଂ ରୁମ୍ ବାସ୍ତୁ ଅନୁଯାୟୀ, କୋଠରୀରେ ପ୍ରାଣପ୍ରାଚୁର୍ଯ୍ୟତା ଏବଂ ଶକ୍ତିକୁ ଭରପୂର କରିବା ପାଇଁ ଯେତେ ଅଧିକ ସମ୍ଭବ ପ୍ରାକୃତିକ ଆଲୋକକୁ ବ୍ୟବହାର କରନ୍ତୁ । ସନ୍ଧ୍ୟାବେଳେ, କୋମଳ ଓ ଉଷ୍ମ ଆଲୋକର ବିକଳ୍ପକୁ ଚୟନ କରନ୍ତୁ, ଯାହା ଆପଣଙ୍କ ଭୋଜନ ପାଇଁ ଏକ ସୁଖକର ଏବଂ ଶାନ୍ତିପ୍ରଦ ବାତାବରଣ ସୃଷ୍ଟି କରିଥାଏ ଏବଂ ପ୍ରତ୍ୟେକ ଭୋଜନ ଅନୁଭୂତିକୁ ସ୍ମରଣୀୟ କରିଥାଏ ।

ଏହିସବୁ ଉପଦେଶ ବ୍ୟତୀତ, ଡାଇନିଂ ରୁମ୍ ବାସ୍ତୁ କଥା ବିଚାରକୁ ନେବା ସମୟରେ ଆପଣ ଆଉ କେତୋଟି କଥାକୁ ଧ୍ୟାନରେ ରଖିପାରନ୍ତି:

6. ଡାଇନିଂ ଏରିଆକୁ ଆବର୍ଜନାମୁକ୍ତ ରଖନ୍ତୁ

ବାସ୍ତୁ ଅନୁସାରେ, ଆଜେବାଜେ ବସ୍ତୁରୁ ମୁକ୍ତ ଏକ ଡାଇନିଂ ଏରିଆ ସକାରାତ୍ମକ ଶକ୍ତି ପ୍ରବାହକୁ ପ୍ରୋତ୍ସାହିତ କରିବା ସହିତ ଏକ ଶାନ୍ତିପ୍ରଦ ବାତାବରଣକୁ ବଜାୟ ରଖିବାରେ ସହାୟକ ହୋଇଥାଏ । ଡାଇନିଂ ସ୍ଥାନକୁ ସଫାସୁତରା ଏବଂ ବ୍ୟବସ୍ଥିତ କରି ରଖନ୍ତୁ । ଏହି ସ୍ଥାନରେ ଯେପରି ଅଦରକାରୀ ଏବଂ ଅନାବନା ସାମଗ୍ରୀ ଜମା ହୋଇ ନ ରହେ ତାହା ସୁନିଶ୍ଚିତ କରନ୍ତୁ ।

7. କାଠନିର୍ମିତ ଫର୍ନିଚର୍ ବାଛନ୍ତୁ

ନିଜର ଡାଇନିଂ ରୁମ୍ ପାଇଁ କାଠରେ ନିର୍ମିତ ଫର୍ନିଚର୍ ବାଛନ୍ତୁ । ବାସ୍ତୁରେ ତାହାକୁ ଶୁଭ ବିବେଚନା କରାଯାଏ । କାଠ ଅଭିବୃଦ୍ଧି ଏବଂ ସୌହାର୍ଦ୍ଦ୍ୟର ପ୍ରତିନିଧିତ୍ୱ କରିଥାଏ ଏବଂ ସମ୍ପୃକ୍ତ ସ୍ଥାନରେ ସକାରାତ୍ମକ ଶକ୍ତିର ପ୍ରବାହକୁ ବୃଦ୍ଧି କରିଥାଏ ବୋଲି ବିଶ୍ୱାସ କରାଯାଏ ।

8. କୃତଜ୍ଞତା ଜ୍ଞାପନ କରନ୍ତୁ

ଭୋଜନ ଆରମ୍ଭ କରିବା ପୂର୍ବରୁ ସଂକ୍ଷିପ୍ତ ପ୍ରାର୍ଥନା କରିବା କିମ୍ବା ଭଗବାନଙ୍କୁ କୃତଜ୍ଞତା ଜ୍ଞାପନ କରିବା ପରାମର୍ଶଯୋଗ୍ୟ । ବିଶ୍ୱାସ କରାଯାଏ ଯେ, ଏହି ଅଭ୍ୟାସ ଖାଦ୍ୟକୁ ସକାରାତ୍ମକତା ଏବଂ ଆଶୀର୍ବାଦରେ ଭରପୂର କରିଥାଏ ଏବଂ ପରିବେଶକୁ କୃତଜ୍ଞଭାବ ଏବଂ ସୌହାର୍ଦ୍ଦ୍ୟରେ ପରିପୂର୍ଣ୍ଣ କରିଥାଏ ।

9. ଡାଇନିଂ ରୁମ୍ କୁ ଶୌଚାଳୟରୁ ଦୂରରେ ରଖନ୍ତୁ

ଡାଇନିଂ ରୁମ୍ ଯେପରି ଶୌଚାଳୟକୁ ଲାଗି କିମ୍ବା ତାହା ଉପରେ ନ ରହେ ତାହା ସୁନିଶ୍ଚିତ କରିବା ଜରୁରୀ ଅଟେ; ବାସ୍ତୁ ଅନୁଯାୟୀ ଏହା ଡାଇନିଂ ରୁମ୍ ପାଇଁ ଅଶୁଭ ହୋଇଥାଏ । ଶୌଚାଳୟଗୁଡ଼ିକୁ ନକାରାତ୍ମକ ଶକ୍ତି ସହିତ ସମ୍ବନ୍ଧିତ କରାଯାଇଥାଏ ଏବଂ ତାହାର ସମୀପବର୍ତ୍ତିତା ଡାଇନିଂ ଏରିଆରେ ସକାରାତ୍ମକ ପ୍ରବାହକୁ ବାଧିତ କରିପାରେ ।