ଏଲିଭେସନ୍ ପ୍ଲାନ୍ କ’ଣ? ତାହାର ମହତ୍ତ୍ୱକୁ ବୁଝିବା ପାଇଁ ଏକ ବ୍ୟାପକ ଗାଇଡ୍

ଏଲିଭେସନ୍ ଡ୍ରଇଂରେ କ’ଣସବୁ ରହିଥାଏ?

ଏଲିଭେସନ୍ ଡ୍ରଇଂ ପ୍ଲାନ୍ ତିଆରି କରିବା ପାଇଁ ମୁଖ୍ୟ ଦ୍ୱାର, ଝରକା, ଛାତର କ୍ଷେତ୍ରଫଳ, ଆୟତନ, ନିର୍ଦ୍ଦେଶିକା ଏବଂ ମାପ ଭଳି ଉପାଦାନଗୁଡ଼ିକୁ ଅନ୍ତର୍ଭୁକ୍ତ କରାଯାଇଥାଏ। ଏହି ପ୍ଲାନ୍‌‌ଗୁଡ଼ିକ ସାଧାରଣତଃ ଚାରି-ଦିଶାତ୍ମକ ଦୃଶ୍ୟ ପାଇଁ ତିଆରି କରାଯାଇଥାଏ: ଉତ୍ତର, ଦକ୍ଷିଣ, ପୂର୍ବ ଏବଂ ପଶ୍ଚିମ। ଏଲିଭେସନ୍ ପ୍ଲାନ୍‌‌ରେ ସାଧାରଣତଃ ନିମ୍ନଲିଖିତ ମୁଖ୍ୟ ଉପାଦାନଗୁଡ଼ିକ ରହିଥାଏ:

୧. ସ୍ଥାପତ୍ୟଗତ ବିବରଣୀ

ପ୍ଲାନ୍‌‌ରେ ଏକ ବିଲଡିଂର ସ୍ଥାପତ୍ୟଗତ ବୈଶିଷ୍ଟ୍ୟ ଯେପରିକି- ବାହ୍ୟରୂପ ଡିଜାଇନ୍, ବାହ୍ୟ ଫିନିଶ୍, ସାଜସଜ୍ଜାମୂଳକ ଉପାଦାନ ଏବଂ ବିଲଡିଂର ସାମଗ୍ରିକ ସୌନ୍ଦର୍ଯ୍ୟରେ ସହାୟକ ଅନ୍ୟାନ୍ୟ ଆଳଙ୍କାରିକ ବୈଶିଷ୍ଟ୍ୟାବଳୀକୁ ଦର୍ଶାଇଥାଏ।

୨. ଆୟତନ

ପ୍ଲାନ୍‌‌ରେ ନିର୍ଭୁଲ୍ ମାପ ଏବଂ ଆୟତନକୁ ସାମିଲ କରାଯାଇଥାଏ, ଯାହା ବିଲ୍ଡରଙ୍କୁ ବାହ୍ୟରୂପର ପ୍ରତ୍ୟେକ ଉପାଦାନର ଆକାର ଓ ମାପକୁ ସ୍ଥିର କରିବାରେ ସାହାଯ୍ୟ କରିଥାଏ। ଏହି ସୂଚନା ନିର୍ମାଣ ସମୟରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥାଏ।

୩. ଆନୁପାତିକ ମାପ

ଏହି ମାପ ଆନୁପାତିକ ଭାବେ ଅଙ୍କନ କରାଯାଇଥାଏ, ଏହା ମାଧ୍ୟମରେ ଆର୍କିଟେକ୍ଟ, ବିଲ୍ଡର ଓ ଗ୍ରାହକମାନେ ବିଲଡିଂର ବିଭିନ୍ନ ଉପାଦାନଗୁଡ଼ିକର ଆପେକ୍ଷିକ ଆକାର ଓ ଦୂରତ୍ୱ ଆଦିକୁ ବୁଝିପାରିଥାନ୍ତି।

୪. ଝରକା ଓ ଦ୍ୱାର

ଏଲିଭେସନ୍ ପ୍ଲାନ୍‌‌ରେ ଝରକା ଓ ଦ୍ୱାରର ସ୍ଥାନ, ଆକାର ଓ ଶୈଳୀ ଦର୍ଶାଯାଇଥାଏ। ଏହି ଖୋଲା ଜାଗାଗୁଡ଼ିକ ସାମଗ୍ରିକ ଡିଜାଇନକୁ କିପରି ପ୍ରଭାବିତ କରିବ ତାହା ସମ୍ପର୍କରେ ସ୍ପଷ୍ଟ ଧାରଣା ମିଳିପାରିଥାଏ।

୫. ଛାତର ଡିଜାଇନ୍

ଏହି ପ୍ଲାନ୍‌‌ରେ ଛାତର ଡିଜାଇନ୍ ମଧ୍ୟ ଦର୍ଶାଯାଇଥାଏ, ଯେଉଁଥିରେ ଛାତର ଗଡ଼ାଣି, ଶୈଳୀ ଏବଂ ଚିମ୍‌‌ନୀ ଓ ସ୍କାଏଲାଇଟ୍ ଭଳି ଅନ୍ୟାନ୍ୟ ଛାତ ବୈଶିଷ୍ଟ୍ୟାବଳୀକୁ ଦର୍ଶାଯାଇଥାଏ। ସାମଗ୍ରିକ ରୂପକୁ ଅନୁମାନ କରିବା ଏବଂ ସଠିକ୍ ଛାତ ନିର୍ମାଣ ଉପାଦାନଗୁଡ଼ିକର ସଠିକ୍ ନିର୍ମାଣ ସୁନିଶ୍ଚିତ କରିବାରେ ଏହା ସାହାଯ୍ୟ କରିଥାଏ।

୬. ଭୂଲମ୍ବ ଉଚ୍ଚତା

ଏଲିଭେସନ୍ ଡ୍ରଇଂରେ ବିଲଡିଂର ଭୂଲମ୍ବ ଆୟତନ ଏବଂ ଉଚ୍ଚତା ମଧ୍ୟ ଚିତ୍ରିତ ହୋଇଥାଏ, ଯାହା ମଧ୍ୟରେ ମହଲାର ସଂଖ୍ୟା, ସିଲିଂର ଉଚ୍ଚତା ଏବଂ ଛାତରେଖା ଅନ୍ତର୍ଭୁକ୍ତ।

୭. ସାମଗ୍ରୀର ସୂଚନା

ବାହ୍ୟ କାର୍ଯ୍ୟ ପାଇଁ କେଉଁ କେଉଁ ସାମଗ୍ରୀର ବ୍ୟବହାର ହେବ ସେ ସମ୍ପର୍କରେ ପ୍ଲାନ୍‌‌ରେ ସୂଚନା ଦିଆଯାଇଥାଏ, ଯେପରିକି - ଇଟା, ପଥର, ଷ୍ଟକ୍କୋ କିମ୍ବା ସାଇଡିଂ। ଏହା ନିର୍ମାଣ ପର୍ଯ୍ୟାୟରେ ବିଲ୍ଡର ଏବଂ କଣ୍ଟ୍ରାକ୍ଟରମାନଙ୍କୁ ସୂଚିତ ନିଷ୍ପତ୍ତି ନେବାରେ ସାହାଯ୍ୟ କରିଥାଏ।

୮. ଲ୍ୟାଣ୍ଡସ୍କେପିଂ ଏବଂ ବାହ୍ୟ ବୈଶିଷ୍ଟ୍ୟାବଳୀ

କେତେକ ମାମଲାରେ ଏହି ପ୍ଲାନ୍‌‌ରେ ବଗିଚା, ଚଲାପଥ, ଡ୍ରାଇଭୱେ ଏବଂ ବିଲଡିଂର ବାହ୍ୟ ସୌନ୍ଦର୍ଯ୍ୟ ସମ୍ବନ୍ଧୀୟ ଅନ୍ୟାନ୍ୟ ବାହ୍ୟ ବୈଶିଷ୍ଟ୍ୟ ଭଳି ଲ୍ୟାଣ୍ଡସ୍କେପିଂ ଉପାଦାନଗୁଡ଼ିକ ସାମିଲ ହୋଇଥାଏ।

ଗୃହ ନିର୍ମାଣ ସମୟରେ ଏଲିଭେସନ୍ ପ୍ଲାନ୍‌‌ର ମହତ୍ତ୍ୱ

ବିଲଡିଂ ଏଲିଭେସନ୍ ପ୍ରଶ୍ନ ଉଠିଲେ, ଏହି ପ୍ଲାନ୍‌‌ଗୁଡ଼ିକର ବହୁତ ମହତ୍ତ୍ୱ ରଖିଥାଏ। ଆସନ୍ତୁ, ନିର୍ମାଣ ପ୍ରକ୍ରିୟାରେ ଏଲିଭେସନ୍ ପ୍ଲାନ୍ କାହିଁକି ଅତ୍ୟାବଶ୍ୟକ ତାହାର ବିଭିନ୍ନ କାରଣଗୁଡ଼ିକୁ ଆଲୋଚନା କରିବା:

୧. ସହଜ ନିର୍ମାଣ

ଏହି ପ୍ଲାନ୍‌‌ଗୁଡ଼ିକ ଏକ ନକ୍‌‌ସା ରୂପେ କାମ କରିପାରେ, ଯାହା ବିଲ୍‌‌ଡିଂର ବାହ୍ୟ ବିବରଣୀ, ଆୟତନ ଏବଂ ଫିନିଶ୍‌‌କୁ ଦର୍ଶାଇଥାଏ। ଏହା ନିର୍ମାଣ ଟିମ୍‌‌କୁ ନିର୍ଭୁଲ୍ ଭାବେ ଡିଜାଇନକୁ କାର୍ଯ୍ୟକାରୀ କରିବାରେ ସାହାଯ୍ୟ କରିଥାଏ, ତେଣୁ ନିର୍ମାଣ ପ୍ରକ୍ରିୟା ଅଧିକ ସୁରୁଖୁରୁରେ ଏବ ଅଧିକ ଦକ୍ଷ ଭାବେ ସମ୍ପାଦିତ ହୋଇଥାଏ।

୨. ସହଜ ରକ୍ଷଣାବେକ୍ଷଣ

ଏଭଳି ଏକ ପ୍ଲାନ୍ ଘର ମାଲିକଙ୍କ ପାଇଁ ସେମାନଙ୍କ ଘରର ବାହ୍ୟ ଅଂଶରେ ରହିଥିବା ସମସ୍ୟାକୁ ଚିହ୍ନଟ କରିବା ଏବଂ ମରାମତି କରିବା ସହଜ କରିଦେଇଥାଏ। ରକ୍ଷଣାବେକ୍ଷଣ ପ୍ରକ୍ରିୟାକୁ ଅଧିକ ବ୍ୟବସ୍ଥିତ କରିବା ଏବଂ ଅଧିକ ଖର୍ଚ୍ଚ-ସାଶ୍ରୟୀ କରିବାକୁ ଏହା ସୁନିଶ୍ଚିତ କରିଥାଏ।

୩. ସମ୍ବଳ ସଞ୍ଚୟ

ଏଲିଭେସନ୍ ପ୍ଲାନ୍ ଜରିଆରେ ବିଲଡିଂର ବାହ୍ୟ ଡିଜାଇନର ଏକ ସ୍ପଷ୍ଟ ଅନୁମାନ ପାଇବା ଦ୍ୱାରା ବିଲ୍ଡରମାନେ ନିର୍ମାଣ ସମୟରେ ମହଙ୍ଗା ତ୍ରୁଟିଗୁଡ଼ିକୁ ଏଡ଼ାଇପାରନ୍ତି। ଏହାଦ୍ୱାରା, ପୁନର୍ବାର କାମ କରିବା କିମ୍ବା ଡିଜାଇନ୍ ବଦଳାଇବା ବାବଦୀୟ ଉଭୟ ସମୟ ଓ ସମ୍ବଳର ସଞ୍ଚୟ ସୁନିଶ୍ଚିତ ହୋଇଥାଏ।

୪. ସହଜ ପରିବର୍ତ୍ତନ

ବିଲଡିଂରେ କୌଣସି ପରିବର୍ତ୍ତନ କିମ୍ବା ଯୋଗ କରିବା ସମୟରେ ଏହି ପ୍ଲାନ୍‌‌ଗୁଡ଼ିକ ବିଶେଷ ରୂପେ ମୂଲ୍ୟବାନ ସାବ୍ୟସ୍ତ ହୋଇଥାଏ। କୋଠରୀର ସମ୍ପ୍ରସାରଣ କରିବା ହେଉ କି ଏକ ଅତିରିକ୍ତ ଝରକା ତିଆରି କରିବା ହେଉ ଅଥବା ଛାତର ରେଖାକୁ ପରିବର୍ତ୍ତନ କରିବା ହେଉ, ଏହି ପ୍ଲାନ୍ ଏକ ସନ୍ଦର୍ଭ ବିନ୍ଦୁ ରୂପେ କାମ କରିଥାଏ ଏବଂ ନିଖୁଣ ଓ ସୁସଙ୍ଗତ ପରିବର୍ତ୍ତନ ପାଇଁ ଅନୁମତି ଦେଇଥାଏ।

୫. ସହଜ ସୁଗମତା

ସହଜ ସୁଗମତା ଏଲିଭେସନ୍ ଡ୍ରଇଂ ତିଆରିର ଏକ ମହତ୍ତ୍ୱପୂର୍ଣ୍ଣ ବିଚାରଯୋଗ୍ୟ ଦିଗ ଅଟେ। ସେଥିରେ ବିଦ୍ୟମାନ କାନ୍ଥ ଓ ଗଛଗୁଡ଼ିକୁ ସାମିଲ କରାଯାଇ, ନିର୍ମାଣ କାର୍ଯ୍ୟରେ ବାଧାବିଘ୍ନ ସୃଷ୍ଟି କରିବାର ସମ୍ଭାବନା ରଖୁଥିବା କିମ୍ବା ବିଲଡିଂ ଚାରିପଟେ ଚଳାଚଳ କରିବାରେ ବାଧା ସୃଷ୍ଟି କରୁଥିବା ଜିନିଷଗୁଡ଼ିକୁ ଚିହ୍ନଟ କରାଯାଇପାରେ, ଯାହାପଳରେ ଘର ମାଲିକ କିମ୍ବା ବିଲ୍ଡର ସେଥିପ୍ରତି ଯତ୍ନବାନ ରହିପାରନ୍ତି ଏବଂ ସମ୍ଭାବ୍ୟ ସମସ୍ୟାଗୁଡ଼ିକୁ ଦୂର କରିବା ପାଇଁ ପଦକ୍ଷେପ ଗ୍ରହଣ କରିପାରନ୍ତି।

ଏଲିଭେସନ୍ ଡ୍ରଇଂ କ’ଣ ଏବଂ ଏଲିଭେସନ୍ ପ୍ଲାନ୍ ଡ୍ରଇଂ ଅଙ୍କନ କରିବାର ଉପାୟ

୧. ମୁଖ୍ୟ ମହଲା କାନ୍ଥ ଆଧାରରେଖା ଅଙ୍କନ କରିବା

ପାରମ୍ପରିକ ପଦ୍ଧତି ବ୍ୟବହାର କରି ଏଲିଭେସନ୍ ପ୍ଲାନ୍ ତିଆରି କରିବା ପାଇଁ, ଆପଣ ମୁଖ୍ୟ ମହଲାର କାନ୍ଥ ଆଧାରରେଖାରୁ ଅଙ୍କନ କରିବା ଆରମ୍ଭ କରିବାକୁ ହୋଇଥାଏ। ଆପଣଙ୍କର ଫ୍ଲୋର୍ ପ୍ଲାନ୍ ଡ୍ରଇଂକୁ ଦେଖି ଏବଂ ଯେକୌଣସି କାନ୍ଥର ଭୂସମାନ୍ତର ଦୂରତାକୁ ମାପି ଏହା କରାଯାଇପାରିବ। ବାହ୍ୟ ସାଇଡୱାଲ୍ ପାଇଁ କୌଣସି ସାଇଡିଂ ସାମଗ୍ରୀର ମୋଟେଇକୁ ମଧ୍ୟ ସାମିଲ କରିବା ନିଶ୍ଚିତ କରନ୍ତୁ।

୨. କାନ୍ଥଗୁଡ଼ିକର ଉଚ୍ଚତା ସ୍ଥିର କରିବା

ମୁଖ୍ୟ ମହଲା କାନ୍ଥଗୁଡ଼ିକୁ ମାପିବା ପରେ, ଆପଣଙ୍କୁ ବାହ୍ୟ କାନ୍ଥଗୁଡ଼ିକ ପାଇଁ ଭୂଲମ୍ବ ରେଖା ଅଙ୍କନ କରିବାକୁ ହୋଇଥାଏ। ଚୂଡ଼ାନ୍ତ ହୋଇ ନ ଥିବା ମହଲା ଉଚ୍ଚତାର କେତେ ଉଚ୍ଚାରେ କାନ୍ଥ ରହିବା ତାହା ସ୍ଥିର କରିବା ପାଇଁ ଏହା ଗୁରୁତ୍ୱପୂର୍ଣ୍ଣ ହୋଇଥାଏ। ବିଲଡିଂର ସେହି ଭାଗରେ କୋଠରୀଗୁଡ଼ିକର ସିଲିଂ ଉଚ୍ଚତାକୁ ବିଚାରକୁ ନିଅନ୍ତୁ ଓ ସେଥିରେ ତାହା ଉପରେ ଥିବା ଯେକୌଣସି ମହଲା କିମ୍ବା ସିଲିଂ କଡ଼ିର ଉଚ୍ଚତାକୁ ଯୋଡ଼ନ୍ତୁ।

୩. ଝରକା ଏବଂ ଦ୍ୱାରର ରୂପରେଖା ଅଙ୍କନ

କାନ୍ଥର ଉଚ୍ଚତା ସ୍ଥିର କରିବା ପରେ, ଝରକା ଓ ଦ୍ୱାରଗୁଡ଼ିକର ରୂପରେଖା ଆଙ୍କନ୍ତୁ। ବାହ୍ୟ ଦ୍ୱାର ଏବଂ ଝରକାଗୁଡ଼ିକର ଅବସ୍ଥିତିକୁ ସଠିକ୍ ଭାବେ ସ୍ଥିର କରିବା ପାଇଁ ଆପଣଙ୍କ ମେଜିଆର ଭୂସମାନ୍ତର ରେଖାରୁ ମାପନ୍ତୁ। ନିଖୁଣତାକୁ ସୁନିଶ୍ଚିତ କରିବା ପାଇଁ, ଆପଣଙ୍କ ଏଲିଭେସନ୍ ଡ୍ରଇଂରେ ପ୍ରତ୍ୟେକ ଝରକା ଓ ଦ୍ୱାରର ଆୟତନ ହାସଲ କରିବା ଲାଗି ଏକ ପୃଥକ୍ ଝରକା ଓ ଦ୍ୱାରର ଅନୁସୂଚୀକୁ ଦେଖନ୍ତୁ।

୪. ଛାତ ଅଙ୍କନ

ଏବେ ଆପଣ ନିଜ ପ୍ଲାନ୍ ପାଇଁ ଆପଣ ଚାହୁଁଥିବା ଛାତରେଖା ତିଆରି କରିପାରିବେ। ଗେବଲ୍, ଶେଡ୍, ହିପ୍ କିମ୍ବା ଗାମ୍ବ୍ରେଲ୍ ଭଳି ବିଭିନ୍ନ ପ୍ରକାର ଛାତରୁ ଆପଣ ଚାହୁଁଥିବା ସ୍ଥାପତ୍ୟଗତ ଶୈଳୀକୁ ବାଛନ୍ତୁ। ଛାତଟି ବାହ୍ୟ କାନ୍ଥ ଉପରକୁ ଝୁଲି ରହିବ ତାହା ବିଚାରକୁ ନିଅନ୍ତୁ ଏବଂ ଆପଣ ତିଆରି କରୁଥିବା ବାହ୍ୟ ଏଲିଭେସନ୍ ପ୍ଲାନରେ ଏକ ସମ୍ବନ୍ଧଶୀଳ ତଥା ଆଖିକୁ ସୁନ୍ଦର ଦେଖାଯାଉଥିବା ଡିଜାଇନ୍‌‌କୁ ସୁନିଶ୍ଚିତ କରନ୍ତୁ।

୫. ଡେକ୍ ଏବଂ ରେଲିଂ ଯୋଡ଼ିବା

ଝରକା, ଦ୍ୱାର, ଛାତ ଏବଂ ମୌଳିକ ଡ୍ରଇଂ ସମାପ୍ତ ହେବା ପରେ, ଆପଣ ଡେକ୍ କିମ୍ବା ପୋର୍ଚ, ରେଲିଂ, ଶିଡ଼ି ଆଦି ଯୋଡ଼ନ୍ତୁ। ଆପଣଙ୍କ ମୁଖ୍ୟ ମେଜିଆ ଓ ଘର ଚାରିପଟର ଚୂଡ଼ାନ୍ତ ଲ୍ୟାଣ୍ଡସ୍କେପିଂ ସ୍ତର ମଧ୍ୟରେ ରହିଥିବା ଉଚ୍ଚତା ତାରତମ୍ୟକୁ ନିର୍ଭୁଲ୍ ଭାବେ ମାପିବାକୁ ଭୁଲନ୍ତୁ ନାହିଁ।

୬. ଆଲୋଚନା କରିବା

ପ୍ରକଳ୍ପ ସହିତ ସମ୍ବନ୍ଧିତ ସମସ୍ତଙ୍କ ସହିତ ପ୍ରାରମ୍ଭିକ ଡ୍ରଇଂ ସମ୍ପର୍କରେ ଆଲୋଚନା କରନ୍ତୁ ଏବଂ ସମସ୍ତଙ୍କର ମତାମତ ଓ ପ୍ରସ୍ତାବଗୁଡ଼ିକୁ ସଂଗ୍ରହ କରନ୍ତୁ। ଏହି ସହଯୋଗମୂଳକ ମାର୍ଗ ଦ୍ୱାରା ଡିଜାଇନର ବ୍ୟାପକ ସମୀକ୍ଷା ହୋଇପାରିଥାଏ ଏବଂ ଡିଜାଇନ୍ ବାବଦୀୟ ଚିନ୍ତା କିମ୍ବା ପରିବର୍ତ୍ତନଗୁଡ଼ିକ ସାମିଲ ହେବା ସୁନିଶ୍ଚିତ ହୋଇଥାଏ। ତା’ପରେ ପ୍ଲାନ୍‌‌କୁ ସଂଶୋଧିତ କରାଯାଇ ଡ୍ରଇଂକୁ ଉନ୍ନତ କରାଯାଇପାରିବ।

୭. ଡିଜାଇନକୁ ଚୂଡ଼ାନ୍ତ କରିବା

ଆବଶ୍ୟକୀୟ ପରିବର୍ତ୍ତନ ଓ ପ୍ରସ୍ତାବଗୁଡ଼ିକୁ ସାମିଲ କରିବା ପରେ, ଏଲିଭେସନ୍ ଡ୍ରଇଂକୁ ଚୂଡ଼ାନ୍ତ କରିବାର ସମୟ ଆସିଯାଏ। ଡ୍ରଇଂଟି ଯେପରି ଗ୍ରାହକଙ୍କ କଳ୍ପନା ଅନୁରୂପ ହୁଏ, ନିର୍ମାଣ ନିୟମକୁ ଅନୁପାଳନ କରୁଥାଏ ଏବଂ ନିର୍ଦ୍ଦିଷ୍ଟ ଆବଶ୍ୟକତାଗୁଡ଼ିକୁ ପୂରଣ କରୁଥାଏ ତାହା ସୁନିଶ୍ଚିତ କରନ୍ତୁ।

ପ୍ରାୟତଃ ପଚରାଯାଉଥିବା ପ୍ରଶ୍ନ

୧. ପ୍ରଥମେ କ’ଣ? ଫ୍ଲୋର୍ ପ୍ଲାନ୍ ନା ଏଲିଭେସନ୍ ପ୍ଲାନ୍?

ସାଧାରଣତଃ, ଡିଜାଇନ୍ ପ୍ରକ୍ରିୟାରେ ଏଲିଭେସନ୍ ପ୍ଲାନ୍ ପୂର୍ବରୁ ଫ୍ଲୋର୍ ପ୍ଲାନ୍ କରାଯାଇଥାଏ। ଏଲିଭେସନ୍ ଡ୍ରଇଂରେ ବିଲଡିଂର ଉଚ୍ଚତା ସମ୍ବନ୍ଧୀୟ ଜ୍ଞାନ ରହିବା ଆବଶ୍ୟକ ହୋଇଥାଏ, ତେଣୁ ଢାଞ୍ଚାର ପଦଚିହ୍ନ ସ୍ଥିର ହେଲା ପରେ ହିଁ ତାହାକୁ ସ୍ଥିର କରାଯାଇପାରିବ।

୨. କେତେ ପ୍ରକାର ଏଲିଭେସନ୍ ରହିଛି?

ଅନେକ ପ୍ରକାର ଏଲିଭେସନ୍ ରହିଛି, ଯାହା ମଧ୍ୟରେ ସମ୍ମୁଖ, ପଛ, ପାର୍ଶ୍ୱ ଏବଂ ଆଭ୍ୟନ୍ତରୀଣ ଏଲିଭେସନ୍ ଅନ୍ତର୍ଭୁକ୍ତ। ଏହି ଏଲିଭେସନ୍ ଡ୍ରଇଂଗୁଡ଼ିକ ବିଲଡିଂର ସ୍ଥାପତ୍ୟଗତ ଡିଜାଇନ୍ ଆଧାରରେ ଭିନ୍ନ ଭିନ୍ନ ଦୃଷ୍ଟିକୋଣ ଓ ବିବରଣୀ ଯୋଗାଇଥାଏ।

୩. ଏକ ଘରର ଚାରୋଟି ଏଲିଭେସନ୍ କ’ଣ କ’ଣ ଅଟେ?

ଘରର ଚାରୋଟି ଏଲିଭେସନ୍ ମଧ୍ୟରେ ସମ୍ମୁଖ, ପଛ, ବାମ ପାର୍ଶ୍ୱ ଓ ଡାହାଣ ପାର୍ଶ୍ୱ ଏଲିଭେସନ୍ ଅନ୍ତର୍ଭୁକ୍ତ ହୋଇଥାଏ। ଏହି ଏଲିଭେସନ୍‌‌ଗୁଡ଼ିକ ବିଭିନ୍ନ ଦୃଷ୍ଟିକୋଣରୁ ବିଲଡିଂର ବାହ୍ୟ ରୂପକୁ ଦର୍ଶାଇଥାଏ, ଯାହାକୁ ବ୍ୟବହାର କରି ଡିଜାଇନର୍ ଏବଂ ଆର୍କିଟେକ୍ଟମାନେ ଢାଞ୍ଚାର ଆୟତନ, ବୈଶିଷ୍ଟ୍ୟାବଳୀ ଏବଂ ସୌନ୍ଦର୍ଯ୍ୟଗତ ଦିଗକୁ ଦର୍ଶାଇପାରିଥାନ୍ତି।